Leson Abaotem Praod and Hambol Fasin
WANFALA samting wea happen long laef bilong King David showimaot wei wea trufala hambol fasin hem difren evribit from praod fasin. Disfala samting hem happen bihaen David tekovarem Jerusalem and mekem datfala big taon kamap kapitol bilong hem. From David hem tingim Jehovah nao really King bilong Israel, hem mekem arrangement for tekem datfala Ark long Jerusalem. Datfala Ark piksarem wei wea God stap witim olketa. Disfala samting hem barava important long David, dastawe hem showimaot hapi bilong hem front long evriwan taem hem followim olketa priest wea karem datfala Ark. Olketa pipol wea stap long Jerusalem lukim king bilong olketa ‘jamp raon’ and ‘dance . . . witim full strong bilong hem.’—1 Chronicles 15:15, 16, 29; 2 Samuel 6:11-16.
Bat Michal, waef bilong David no join witim olketa long datfala hapitaem. Hem luk kam from wanfala window, and hem no hapi taem hem lukim David praisim Jehovah, bat hem “start for lukdaonem [David] insaed heart bilong hem.” (2 Samuel 6:16) Why nao Michal feel olsem? Luk olsem hem tinghae tumas long position bilong hemseleva, hao hem dota bilong firstfala king bilong Israel, Saul, and distaem hem waef bilong mek-tu king bilong Israel. Maet hem feel olsem hasband bilong hem wea hem king shud no daonem hemseleva front long olketa pipol wea hem rulim and for join witim olketa long disfala hapitaem. Taem David kam bak long haos, Michal showimaot praod feeling wea hem garem taem hem tok long David. Hem mekfani olsem long David: “King bilong Israel mekem hemseleva kamap olsem main man tuday taem hem duim krangge samting front long olketa slave gele bilong olketa servant bilong hem, olsem wanfala man wea emti-hed wea duim krangge samting!”—2 Samuel 6:20.
Wanem nao David duim taem hem herem toktok olsem? David tok strong long Michal and talem hem hao Jehovah rejectim dadi bilong hem, Saul, and appointim hem nao olsem king. And David hem sei tu: “Mi bae mekem miseleva go daon olsem olketa narawan, and bae mi go daon olsem wanfala man nating; and olketa slave gele wea iu storyim, bae mi mekem miseleva kasem glory witim olketa.”—2 Samuel 6:21, 22.
Tru nao, David hem disaed strong for gohed for sevem Jehovah witim hambol fasin. Disfala tingting bilong David hem helpem iumi for minim why nao Jehovah kolem David “wanfala man wea heart bilong mi hapi long hem.” (Acts 13:22; 1 Samuel 13:14) For tok stret, David hem followim nambawan example bilong hambol fasin bilong Jehovah God. Interesting samting hem hao toktok wea David iusim taem hem story long Michal, “bae mi go daon olsem wanfala man nating,” hem kam from wanfala Hebrew verb wea piksarem tu wei wea God ting long olketa man. Nomata Jehovah hem hae winim evriwan long universe, Psalm 113:6, 7 storyim hao hem “hambol for lukluk kam daon [from haefala position bilong hem for deal witim samwan wea moa low] long skae and earth, and hem mekem man nating wea foldaon long graon for standap; hem raisimap poor man from ples bilong asis.”
From Jehovah hem hambol, iumi minim why hem heitim “praod eye” bilong olketa praod pipol. (Proverbs 6:16, 17) From Michal hem praod tumas and no showimaot respect long king wea God chusim, hem no kasem privilege for bornem wanfala son for David. Hem no garem eni pikinini go kasem taem hem dae. Datwan hem wanfala important leson for iumi evriwan! Sapos iumi laekem God for appruvim iumi, iumi mas followim olketa toktok hia: “Garem hambol tingting taem iufala deal witim each other, bikos God hem againstim praod pipol, bat hem showimaot kaeness wea man no fit for kasem long olketa hambol wan.”—1 Peter 5:5.