No Lus Taem Olketa Gogo Long Open Sea
WINIM 1,200 big and smolfala island stap long Marshall Islands. Staka long olketa island flat tumas and olketa hill no winim 6 meter. From olketa island hia smol tumas, nomata man no go farawe long sea hem no savve lukim island nao. Nomata olsem, olketa solwata pipol long Marshall Islands long bifor kam, no lus long sea taem olketa padolem kanu bilong olketa go for olketa nara island, nomata olketa mas padol for plande handred kilometer. Hao nao olketa fit for duim datwan? Olketa iusim olketa simpol bat barava kleva “map” wea olketa kolem olketa stik chart.
From olketa gogo long sea evritaem, pipol long olketa island hia lanem hao olketa island mekem olketa wave followim wanfala gogo wea showimaot wea nao olketa, nomata island maet 30 kilometer from narafala island. Olketa mas savve long plande difren gogo bilong olketa wave, and hem nao why olketa iusim olketa chart hia for remindim olketa. Olsem iu savve lukim long piksa, olketa mekem olketa stik from pandanus rut or from leaf bilong kokonat and taemap olketa for mekem wanfala chart wea showimaot gogo bilong olketa wave. Olketa putim olketa smol sela for showimaot wea nao olketa island stap.
For plande year, hao for gogo long sea followim olketa stik chart hem wanfala secret wea tu-thri nomoa savve long hem. Hao nao wanfala young wan savve lane hao for iusim wanfala stik chart? Thru long training and practice. For teachim hem, wanfala savveman tekem hem long olketa gogo bilong hem for kasem olketa island wea no farawe tumas. Taem datfala young wan lane hao for luksavve long gogo bilong olketa wave, hem start for minim and trustim stik chart bilong hem. Gogo, hemseleva nao savve go long olketa farawe island.
Olsem tu, Word bilong God, Bible, savve olsem wanfala chart wea pointim iumi go stret long laef bilong iumi. Maet firstaem, samwan savve helpem iumi for minim olketa main samting insaed Bible. Then bihaen, taem iumi gohed for studyim Word bilong God and followim olketa principle bilong hem, iumi start for trustim samting wea hem talem. God talem leader bilong olketa Israelite, Joshua, for gohed readim Word bilong God evritaem for ‘mekem hem duim evri samting wea Law hem talem, wea bae mekem hem win long samting wea hem duim, and duim samting long wisefala wei.’ (Joshua 1:8) Tru nao, Bible savve olsem chart wea taem iumi followim datwan, iumi bae win for garem laef wea hapi.
[Piksa Credit long page 32]
© Greg Vaughn