Kwestin From Reader

Haomas klinfala animal nao Noah tekem insaed long ark​—sevenfala long evri klinfala animal or sevenfala man wan and sevenfala mere wan?

Bihaen Noah hem finis for buildim ark, Jehovah hem talem hem olsem: “Iu and famili bilong iu mas go insaed long ark, bikos mi lukim hao iu nomoa iu raeteous midolwan long disfala genereson. Iu mas tekem sevenfala long evri klinfala animal, man wan and mere wan, and long evri animal wea no klin iu mas tekem tufala nomoa, man wan and mere wan.” (Genesis 7:​1, 2) Samfala Bible transleison olsem The New English Bible, The New Jerusalem Bible, and Tanakh​—The Holy Scriptures, transleitim datfala Hebrew verse olsem, “sevenfala man wan and sevenfala mere wan.”

Long Hebrew languis datfala toktok “sevenfala” hem really minim “sevenfala sevenfala.” (Genesis 7:2) Bat nomata long Hebrew languis olketa talem moa wanfala namba, datwan hem no minim for dabolem datfala namba. Olsem example, long 2 Samuel 21:20 hem storyim “wanfala man wea barava big fogud wea garem sixfala finger long each hand and sixfala finger long each leg.” Long Hebrew languis olketa talem moa datfala namba “sixfala,” bat diswan hem no minim datfala giant garem twelvfala finger long each hand and twelvfala finger long each leg. For followim olketa rul bilong Hebrew languis, wei wea olketa talem moa datfala namba hem really minim namba bilong olketa finger wea stap long each hand and namba bilong olketa finger wea stap long each leg.

So datfala toktok “sevenfala sevenfala” wea Genesis 7:2 hem storyim hem no minim sevenfala man wan and sevenfala mere wan, and tu, datfala toktok “tufala” wea Genesis 7:​9, 15 hem storyim hem no minim tufala man wan and tufala mere wan. So Noah hem tekem insaed long ark sevenfala long evri animal wea klin and tufala long evri animal wea no klin.

Bihaen long datfala word “sevenfala” wea Genesis 7:2 storyim, why nao datfala verse garem disfala toktok “man wan and mere wan”? Samfala tingse Noah hem kasem instruction for tekem sevenfala man wan and sevenfala mere wan bilong evri klin animal insaed long ark mekem olketa savve garem pikinini. Bat Noah hem no just tekem olketa klin animal hia for mekem olketa savve garem pikinini nomoa. Long Genesis 8:​20 hem talem iumi hao bihaen long Flood, taem olketa go aotsaed long ark, “Noah start for buildim wanfala altar long Jehovah and tekem samfala long evri klinfala animal and samfala long evri klinfala bird and for bonem olketa olsem sakrifaes antap long datfala altar.” From hem garem datfala mek-seven animal bilong olketa klin animal, Noah hem savve sakrifaesim datfala mek-seven animal long Jehovah mekem hem bae garem thrifala man wan and thrifala mere wan wea stap for garem pikinini.