Olketa Important Samting for Olketa Young Wan Lanem

GLADYS hem waka long wanfala skul long Mendoza wea datwan hem long Argentina. Wanday hem go pas long wanfala classrum and lukim teacher hem readim disfala buk Bible Story Buk Bilong Mia long olketa student bilong hem long class foa. Gladys go story witim datfala teacher and talem hao hem wanfala Jehovah’s Witness and askem sapos teacher laekem for hem showim hao for iusim disfala buk long wei wea bae helpem olketa student for kasem gudfala samting from datwan. From datfala teacher barava tinghae long samting wea Gladys talem, hem laek for gohed iusim buk hia for teachim olketa student long class bilong hem. Bat hem mas askem firstaem skul komiti. Hem hapi tumas taem olketa letem hem for duim samting wea hem askem.

Bihaen datwan, long wanfala day wea skul markem for encouragem olketa student for readim buk, datfala teacher markem olketa student bilong hem for readim wanfala chapter from datfala buk long olketa nara student. From gudfala samting wea kamaot from disfala program, datfala teacher kasem invitation for interview long wanfala program long television. Taem olketa storyim fasin bilong olketa skul pikinini, man wea interviewim datfala teacher hem askem hem olsem, “Wanem nao iu duim wea mekem iu savve kontrolem olketa pikinini long classrum bilong iu?” Teacher explainim hao hem iusim wanfala buk wea garem title Bible Story Buk Bilong Mi. Hem explainim hao nomata hem no teachim religion long classrum bilong hem, hem iusim disfala buk for teachim olketa gudfala fasin olsem respect, wan mind, waka gud tugeta, obeyim narawan, and love. Evriwan agree hao olketa samting hia hem important for olketa young wan lanem.

Waswe, iu laek for teachim olketa pikinini bilong iu for garem olketa fasin olsem? Iu savve askem wanfala long Olketa Jehovah’s Witness for wanfala copy bilong disfala interesting buk Bible Story Buk Bilong Mi.

[Footnote]