Waswe, God Hem Lukim Samting wea Iu Duim?
WASWE, Jehovah datfala Nambawan Creator hem savve lukluk? Barava nao! Bible talem klia diswan olsem: “Datwan wea wakem eye, waswe, hem no savve lukluk?” (Psalm 94:9) Wei wea Jehovah lukluk long samting hem barava winim wei wea man lukluk long samting. Jehovah no lukim nomoa aotsaed long samting, bat hem “lukluk gud insaed long olketa heart.” (Proverbs 17:3; 21:2) Tru tumas, hem savve minim tingting, feeling, and olketa samting wea muvim iumi.
Jehovah hem luksavve long olketa hardfala samting wea iumi savve feisim, and hem savve ansarem olketa prea bilong iumi. Man wea raetem psalm hem sei olsem: “Jehovah hem lukluk long olketa wea raeteous, and hem lisin taem olketa singaot for help. Jehovah hem stap klosap long olketa wea sorre tumas; and hem sevem olketa wea barava wikdaon.” (Psalm 34:15, 18) Hem barava comfortim iumi for savve hao Jehovah minim olketa samting wea iumi savve feisim and hem savve ansarem olketa prea bilong iumi wea kam from heart!
Jehovah God hem luksavve long olketa samting wea man savve duim nomata long ples wea no eniwan savve lukim hem. Tru nao, “evri samting hem naked and showaot klia long datwan wea iumi mas givim ansa long hem.” (Hebrews 4:13) So nomata olketa samting wea iumi duim hem gud or nogud, God hem lukim evri samting. (Proverbs 15:3) Olsem example, long Genesis 6:8, 9 hem talem hao “Noah mekem Jehovah hapi” and hem “wakabaot witim trufala God.” Tru tumas, Jehovah hem appruvim and blessim Noah bikos hem obey and sapotim olketa raeteous principle bilong God. (Genesis 6:22) Bat pipol long taem bilong Noah barava raf and fasin bilong olketa hem barava nogud. God hem lukim samting wea pipol long datfala taem duim. Hem “lukim hao nogud fasin bilong man hem big tumas long earth and evri feeling and tingting wea kam from heart bilong man, hem nogud evritaem.” Gogo, Jehovah finisim pipol wea wicked long datfala taem, bat hem sevem Noah and famili bilong hem.—Genesis 6:5; 7:23.
Waswe, Jehovah hem hapi taem hem lukim samting wea iu duim? Tru nao, Jehovah hem “lukluk raonem full earth for showimaot strong bilong hem for olketa wea lovem hem witim full heart.” (2 Chronicles 16:9) Baebae Jehovah hem finisim evri pipol wea wicked from disfala earth and sevem olketa wea garem hambol heart.—Psalm 37:10, 11.