Taem Olketa Christian Separate Olsem Olketa Separatem Wheat

NO LONGTAEM bifor Jesus hem dae, hem warnim olketa disaepol bilong hem: “Satan hem laek for separatem iufala olsem olketa separatem wheat.” (Luke 22:31) Wanem nao Jesus minim taem hem talem datwan?

Long taem bilong Jesus, olketa mas waka hard for harvestim wheat and hem tekem staka taem tu. First samting wea olketa wea harvestim wheat mas duim hem for kolektem olketa wheat from field. Bihaen, olketa hammerim olketa wheat hia againstim wanfala hard samting or olketa iusim olketa animal for pullim wanfala flat timba for smasem olketa wheat hia. Wei for duim olsem bae mekem wheat for stap separate from olketa nara samting. Next samting, olketa farmer savve torowem go ap wheat long air. Olketa seed foldaon long ples wea olketa hammerim wheat, and long semtaem wind hem blowim rabis bilong datfala wheat. Last samting olketa farmer duim, olketa separatem seed from olketa nara samting wea nogud.

Olsem Jesus hem talem, Satan hem nating givap for againstim olketa disaepol bilong Jesus long datfala taem, and distaem tu hem duim sem samting long iumi. (Eph. 6:​11) Hem tru, no evri hard samting wea iumi feisim distaem hem kam from Satan. (Eccl. 9:​11) Nomata olsem, Satan hem savve iusim eni samting for mekem iumi no faithful. Olsem example, maet hem testim iumi long wei for aftarem olketa material samting, for chusim hapitaem wea hem no fitim, or for duim dirty fasin. Maet hem iusim tu wei for fren witim olketa wea iumi skul witim, olketa wea iumi waka witim and olketa relative wea no Jehovah’s Witness for putim hevi long iumi for aftarem haefala education and for kasem gudfala waka. And tu, maet Satan trae iusim strongfala persecution for mekem iumi no faithful long God. Hem tru, Satan iusim staka wei for separatem iumi long tokpiksa wei.

Hao nao iumi savve stand strong againstim disfala strongfala enemy? Iumi no savve duim diswan long strong bilong iumiseleva. Satan hem strong winim iumi, bat iumi savve Jehovah hem barava strong winim Satan. Sapos iumi barava trustim Jehovah, prea strong for wisdom and for stand strong, and depend long direction bilong hem, bae hem strongim iumi for againstim olketa attak bilong Satan.​—Ps. 25:4, 5.

Taem iumi kasem test, iumi needim savve wea bae helpem iumi for “luksavve long samting wea stret and samting wea no stret” mekem iumi no foldaon long olketa trik bilong Satan. (Heb. 5:​13, 14) Jehovah savve helpem iumi for mekem datfala fasin for luksavve hem kamap moa big. So iumi need for evritaem followim datwan, nomata wanem samting kamap. Sapos iumi followim direction bilong Jehovah, bae hem gohed for sapotim wei wea iumi barava disaed strong for duim samting wea stret.​—Eph. 6:​10.

Maet Satan trae for separatem iumi olsem olketa separatem wheat. Bat witim strong wea iumi kasem from Jehovah, iumi savve stand strong againstim hem and garem strongfala faith. (1 Pet. 5:9) Tru tumas, Word bilong Jehovah hem promisim iumi olsem: “Againstim Devil, and hem bae ranawe from iufala.”​—Jas. 4:7.