Samfala Ask Olsem
Waswe, Olketa Disaster Hem Panis From God?
Nomoa, olketa disaster no panis from God. God no mekem olketa disaster happen for panisim pipol and bae hem no duim datwan long future tu. Why nao olsem? Bikos long 1 John 4:8, Bible hem sei “God hem love.”
Evri samting wea God duim showimaot love bilong hem. Man wea garem love bae no duim nogud samting long pipol bikos Bible hem sei “man wea lovem neiba no savve duim eni samting for spoelem hem.” (Romans 13:10) Bible hem sei long Job 34:12: “Hard tumas for God duim eni rabis samting.”
Hem tru, Bible talem finis olketa disaster bae kasem iumi, olsem “olketa bigfala earthquake.” (Luke 21:11) Bat hem no Jehovah wea kosim olketa disaster. Jehovah olsem wanfala niusman nomoa wea talem pipol wanfala cyclone klosap kam, bat hem no kosim datwan. Sapos olsem, wanem nao kosim olketa disaster?
Bible hem sei: “Full world hem stap andanit long paoa bilong rabis man,” wea hem nao Satan. (1 John 5:19) Hem man for killim man dae from taem bilong Adam and Eve kam kasem distaem. (John 8:44) Satan nating tinghae long laef bilong olketa man. Hem tingim hemseleva nomoa dastawe staka pipol long world distaem olsem hem tu. Samting wea olketa selfish man duim hem mekem pipol for mas lusim ples bilong olketa and stap long ples wea natural disaster kasem olketa plande taem, or for stap long ples wea danger tumas from olketa man spoelem finis. (Ephesians 2:2; 1 John 2:16) So olketa selfish man hia tu kosim olketa nogud samting wea kasem olketa man. (Ecclesiastes 8:9) Wanem nao olketa duim?
Plande samting wea man duim nao hem kosim olketa disaster. Tingim bigfala cyclone wea kosim flood long datfala taon, New Orleans, long America, and olketa landslide wea berem staka haos bilong pipol long Venezuela. Long olketa disaster hia, wind and rain spoelem plande samting bikos olketa man no savve gud long weather, olketa no wakem gud olketa building, olketa no plan gud, olketa no lisin long olketa warning, and bikos olketa bigman no disaedem stret samting.
Tingim wanfala disaster wea Bible storyim. Long taem bilong Jesus, wanfala taoa hem foldaon and 18 pipol nao dae. (Luke 13:4) Maet samting wea kosim datwan hem bikos olketa man no wakem gud datfala taoa or ‘seknomoa samting hem kasem olketa.’ Maet hem tufala samting evriwan nao wea mekem olketa dae, bat hem no God wea killim olketa dae.—Ecclesiastes 9:11.
Waswe, enitaem God hem kosim disaster? Ia, bat hem no olsem olketa disaster distaem wea killim dae eniwan nomoa. Jehovah chusim hu nao bae laef and hu nao bae dae long olketa disaster hia and hem kosim tu-thri disaster nomoa. Wanfala nao hem Flood long taem bilong Noah, and narawan hem long taem bilong Lot wea God finisim tufala taon, Sodom and Gomorrah. (Genesis 6:7-9, 13; 18:20-32; 19:24) God finisim olketa man wea duim rabis samting bat hem mekem olketa gudfala pipol stap laef.
Jehovah God garem paoa and hem barava laek for finisim evri samting wea mekem man safa taem olketa natural disaster kasem olketa. Psalm 72:12 talem diswan abaotem King wea God markem, Jesus Christ: “Hem bae sevem olketa wea poor wea singaot long hem for help. Hem bae helpem tu olketa wea safa bat no eniwan helpem olketa.”