Samfala Ask Olsem
Waswe, Flood Long Taem Bilong Noah Barava Kasem Full Earth?
Datfala Flood long taem bilong Noah happen winim 4,000 year go finis. No eniwan wea lukim datfala Flood hem laef yet distaem mekem hem savve storyim long iumi. Bat wanfala report talem hao long datfala taem, datfala big Flood hem kamap hae winim olketa haefala maunten.
Datfala old report hem talem olsem: “Bigfala rain gohed long earth for foti-fala day. . . And wata kavarem earth gogo evri haefala maunten long earth hem kava nao. Datfala wata hem [samting olsem 6.5 meter] hae winim olketa maunten, gogo olketa maunten kava nao.”—Genesis 7:17-20.
Samfala tingse datfala story abaotem hao Flood kasem full earth hem wanfala kastom story nomoa or maet hem ova tumas. Bat hem no olsem! For tok stret, bigfala haf long earth hem wata nomoa. Samting olsem 71 percent long disfala earth hem solwata. So evri wata long datfala flood hem stap yet. And sapos olketa ice long earth hem melt, solwata bae fulap and gogo bae hem kavarem olketa big taon olsem New York and Tokyo.
Olketa savveman wea studyim olketa samting long graon long northwest saed long America faendem hao long bifor, samting olsem 100 barava bigfala flood nao kasem datfala ples. Wanfala flood olsem hem kam olsem wanfala wall wata wea 600 meter hae and fast bilong hem 105 kilometer for wanfala hour. Datfala flood garem winim 2,000 cubic kilometer wata wea hevi bilong hem winim tu trillion ton. Diskaen samting wea olketa faendemaot mekem samfala savveman for bilivim hao wanfala flood hem kasem full earth.
Pipol wea bilivim hao Bible hem toktok bilong God savve hao disfala flood hem kasem full earth. Datwan hem trufala samting. Jesus hem story long God olsem: “Toktok bilong iu nao tru.” (John 17:17) Aposol Paul talem hao God laekem “evri difren kaen man mas sev and kasem stretfala savve abaotem tru samting.” (1 Timothy 2:3, 4) Hao nao bae Paul lanem tru samting long olketa wea followim Jesus sapos Bible hem garem olketa kastom story nomoa?
Jesus hem bilivim hao Flood hem happen and hem bilivim tu hao hem kasem full earth. Long profesi bilong hem abaotem taem wea hem stap and end bilong disfala world, hem talem hao samfala samting bae happen olsem hem happen long taem bilong Noah. (Matthew 24:37-39) Aposol Peter tu storyim datfala Flood long taem bilong Noah olsem: “Long sem wei tu, world long datfala taem hem finis taem bigfala wata kavarem.”—2 Peter 3:6.
Toktok wea Peter and Jesus talem bae no garem mining for iumi wea stap long taem bilong end distaem sapos datfala story abaotem Noah and Flood wea kasem full earth hem kastom story nomoa. Diskaen story bae mekem man konfius and bae no helpem hem for laef taem bigfala trabol wea big winim Flood long taem bilong Noah kasem disfala world.—2 Peter 3:1-7.
God storyim mercy wea hem showim for pipol bilong hem olsem: “Long sem wei mi talem hao wata long taem bilong Noah bae no kavarem disfala earth moa, mi bae no kros long [iufala] or tok long [iufala].” Long sem wei iumi savve bilivim hao Flood long taem bilong Noah hem kavarem disfala earth, iumi savve bilivim hao God bae showimaot kaenfala wei long olketa wea trustim hem.—Isaiah 54:9.