Wanfala Gudfala Plan
THRIFALA young man long Africa laek tumas for go long distrik convention bilong olketa, bat ples bilong convention hem samting olsem 90 kilometer from hom bilong olketa. Hao nao bae olketa kasem ples hia? Olketa no garem transport and olketa road wea gogo for ples bilong convention hem nogud tumas. So wanem olketa duim nao, olketa askem thrifala baesikol bat olketa no faendem eniwan wea fitim for olketa raedem go long ples bilong convention.
Taem wanfala elder long kongregeson lukim olketa brata hia no garem eni transport, hem talem olketa for iusim oldfala baesikol bilong hem. Hem storyim long olketa wanem hem and olketa nara brata savve duim for go long olketa convention long bifor. Elder talem thrifala brata hia for iusim wanfala baesikol nomoa. Nomata idea bilong hem luk olsem isi nomoa, olketa mas plan gud firstaem. Bat hao nao thrifala man savve iusim wanfala baesikol nomoa for kasem ples bilong convention?
From olketa young brata no laek go long hot sun, taem hem early morning yet olketa taemapem evri basket bilong olketa long baesikol and olketa go nao. Wanfala long olketa raedem baesikol and tufala nara brata baeleg kam kwiktaem bihaenem hem. Bihaen hem raed go kasem 500 meter, hem stop and leim baesikol long wanfala tree for olketa nara brata savve lukim, bat hem putim long ples wea nara pipol no savve lukim for stealim. Then brata hia hem baeleg go.
Taem tufala wea baeleg kam kasem ples wea brata putim baesikol long hem, wanfala long tufala nao raedem baesikol for nara 500 meter and nara brata hem baeleg kam bihaenem hem, then gogo, hem moa bae raedem baesikol. So from thrifala brata hia plan gud olsem, thrifala no baeleg for 90 kilometer bat olketa raedem baesikol for 30 kilometer and baeleg for 60 kilometer nomoa. Nomata olketa waka hard, gud samting nao kamaot from datwan. Olketa kasem ples bilong convention wea olketa Christian brata and sista hipap long hem and olketa barava hapi. (Deut. 31:12) So waswe, bae iu waka hard olsem mekem iu savve go long distrik convention bilong iu?