Waswe, Iu Savve Gud Long Dadi Bilong Iu Long Heven?

WASWE, iu savve gud long dadi bilong iu? Sapos iu growap long famili wea evriwan lovem narawan, maet iu sei, ‘Ia, mi savve gud long hem!’ Tru tumas, plande pipol savve gud long dadi bilong olketa. Olketa savve wanem nao dadi hem laekem and no laekem, wanem nao hem duim taem wanfala samting hem happen, and wanem nao hem duim for lukaftarem famili bilong hem.

Bat nomata iu savve gud long dadi bilong iu, maet samfala taem hem duim samting wea iu no tingim. Tingim diswan. Maet wanfala pikinini ting long dadi bilong hem olsem kwaet man, bat taem samwan long famili hem accident, maet pikinini hia lukim dadi bilong hem kwiktaem duim samting for lukaftarem famili bilong hem.

So waswe, iu savve gud long Creator bilong iumi? Bible hem sei olsem abaotem hem: “Hem nao mekem iumi laef and mekem iumi savve wakabaot.” (Acts 17:28) Iumi mas duim nao wanem God hem laekem bikos hem nao mekem iumi laef. Hem nao Dadi bilong evriwan wea laef. (Isaiah 64:8) Waswe, iu garem kaen tingting olsem tu abaotem God? Sapos olsem, datwan hem gud tumas. Bat iumi savve lanem staka samting moa abaotem God bilong iumi, wea datwan bae helpem iumi long laef bilong iumi and mekem iumi hapi.

Tingting wea iu garem abaotem dadi bilong iu hem depend long hao gud nao iu savve long hem. Hem semsem tu witim God. Sapos iu savve gud long God, bae iu fren gud witim hem nao. Sapos iu lane abaotem God and duim wanem hem laekem, bae hem helpem iu long olketa hard taem wea kasem iu.

Wanem nao olketa wei bilong God? Datwan shud mekem iu garem wanem tingting abaotem hem? Sapos iu savve gud long God, waswe, hem bae laekem iu for duim samfala samting for hem? Nextfala article bae ansarem olketa kwestin hia.

[Blurb long page 3]

Tingting wea iu garem abaotem nara man hem depend long hao gud nao iu savve long hem