“Hem Nao Nambawan and Holy Nem Bilong God”
Nicholas from Cusa nao talem datwan long wanfala tok bilong hem long year 1430.a Hem man wea laek for lanem staka samting. Hem studyim Greek languis, Hebrew languis, idea bilong olketa man, religion, maths, and olketa star. Taem hem 22 year nomoa, hem savve tumas long olketa law bilong Roman Catholic church. Long 1448 hem kamap wanfala bigman long church.
Long samting olsem 550 year go finis, Nicholas from Cusa hem startim wanfala nursing hom (haos wea olketa olo stap wea olketa nurse lukaftarem olketa) long Kues. Datfala building hem stap yet, bat hem wanfala library distaem wea garem winim 300 buk bilong Cusa. Wanfala nao hem Codex Cusanus 220. Insaed long hem, hem garem tok wea Cusa givim long year 1430. Long datfala tok, In principio erat verbum (Long Start, Datfala Man for Toktok Hem Stap), Nicholas from Cusa hem raetem nem bilong Jehovah long Latin languis, wea hem nao Iehoua.b Long page 56 long datfala buk, hem sei olsem abaotem nem bilong God: “Hem nem wea God givim long hemseleva. Hem datfala Tetragrammaton, wea hem nao nem wea garem fofala leta . . . Hem nao nambawan and holy nem bilong God.” Samting wea Nicholas from Cusa talem hem sem samting wea Bible talem finis. Nem bilong God hem stap long firstfala raeting bilong Hebrew Scripture.—Ex. 6:3.
Disfala Codex Cusanus 220 hem wanfala barava old buk wea olketa transleitim datfala Tetragammaton olsem “Iehoua.” Diswan pruvim hao for staka handred year finis, pipol iusim olketa difren wei for transleitim nem bilong God wea semsem olsem “Jehovah.”
[Olketa Footnote]
a Samfala nara nem bilong Nicholas from Cusa hem Nikolaus Cryfts (Krebs), Nicolaus Cusanus, and Nikolaus von Kues. Kues nao hem nem bilong taon long Germany wea hem born long hem. Distaem nem bilong taon hia hem Bernkastel-Kues. Datfala taon hem stap samting olsem 130 kilometer south long Bonn, long Germany.
b Tok wea hem givim hem for sapotim teaching bilong Trinity.
[Piksa long page 16]
Library bilong Cusa