Kwestin From Reader
Long Nehemiah 8:10, Nehemiah talem olketa Jew for “kaikaim olketa kaikai wea gris,” bat long Leviticus 3:17 Law talem olsem: “Iufala mas no kaikaim eni gris.” Hao nao iumi savve minim tufala scripture hia?
Long Hebrew languis, datfala toktok “olketa kaikai wea gris” wea Nehemiah 8:10 storyim and datfala toktok “gris” wea Leviticus 3:17 storyim, tufala toktok hia no minim sem samting. Long Leviticus 3:17, Hebrew word cheʹlev wea iumi transleitim “gris,” hem minim gris bilong man and animal. (Lev. 3:3; Judg. 3:22) Olketa nara verse long Leviticus chapter 3 storyim hao olketa Israelite mas no kaikaim olketa gris long insaed long bele bilong animal wea olketa sakrifaesim and gris long tufala kidney bilong hem tu. Hem bikos “evri gris hem bilong Jehovah.” (Lev. 3:14-16) So gris wea stap long body bilong animal wea olketa Israelite sakrifaesim long Jehovah nao olketa mas no kaikaim.
Bat long Nehemiah 8:10, datfala Hebrew word mash·man·nimʹ wea iumi transleitim “olketa kaikai wea gris,” hem nomoa verse long Hebrew Scripture wea iusim datfala word. Word hia hem kam from datfala verb sha·menʹ, wea minim “fat, kamap fat.” Luk olsem main idea long olketa word wea join witim disfala verb hem nao wei for garem staka samting and for stap healthy. (Markem witim Isaiah 25:6.) Wanfala word wea kam from verb hia hem disfala noun sheʹmen, wea staka taem olketa transleitim “oil.” Hem stap tu long datfala toktok “olive oil.” (Deut. 8:8; Lev. 24:2) Long Nehemiah 8:10, luk olsem mash·man·nimʹ hem minim kaikai wea man iusim staka oil for kukim and maet hem meat bilong animal tu wea garem lelebet gris bat no bigfala haf gris bilong hem.
Jehovah tambuim olketa Israelite for no kaikaim bigfala haf gris bilong animal, bat olketa savve kaikaim olketa naesfala kaikai. Samfala kaikai olsem cake wea olketa wakem from wheat, olketa no kukim long gris bilong animal, bat olketa kukim long vegetable oil and staka taem long olive oil. (Lev. 2:7) Disfala buk Insight on the Scriptures minim hao “olketa kaikai wea gris” nao hem “kaikai wea no drae or bon nating, bat kaikai wea garem staka juice olsem olketa naesfala kaikai wea man kukim long vegetable oil.”
Olketa Christian savve hao Law tambuim olketa Israelite for no kaikaim gris. Bat olketa Christian no followim datfala Law distaem, and olketa no followim tu Law for sakrifaesim olketa animal.—Rom. 3:20; 7:4, 6; 10:4; Col. 2:16, 17.