Kwestin From Reader
Jesus preach long evri ples long Israel. So why nao aposol Peter sei olketa Jew and olketa bigman bilong olketa “no barava minim samting wea [olketa] duim” taem olketa killim dae Jesus?—Acts 3:17.
Taem aposol Peter story long olketa Jew abaotem wanem olketa duim for killim dae Messiah, hem sei: “Mi savve iufala and olketa bigman bilong iufala tu no barava minim samting wea iufala duim long Jesus.” (Acts 3:14-17) Maet samfala Jew no luksavve Jesus hem Messiah or maet olketa no minim wanem hem teachim. Bat olketa narawan no laek luksavve Jesus hem Messiah bikos olketa no laek duim olketa samting wea God hapi long hem, olketa no laekem pipol from nara ples, olketa jealous, and olketa heitim Jesus.
From staka pipol no laek duim olketa samting wea God hapi long hem, olketa no tinghae long wanem Jesus teachim. Staka taem Jesus iusim olketa tokpiksa taem hem story. Hem savve talemaot mining bilong olketa tokpiksa long pipol wea laek savve. Bat samfala pipol no askem hem for minim long olketa, so olketa go from hem. Long wanfala taem, samfala disaepol tu no hapi long tokpiksa wea Jesus talem. (John 6:52-66) Olketa hia no luksavve hao olketa tokpiksa wea Jesus talem hem for mekem olketa changem tingting bilong olketa and wanem olketa duim. (Isa. 6:9, 10; 44:18; Matt. 13:10-15) Olketa no laek luksavve long profesi wea talem hao Messiah bae iusim olketa tokpiksa taem hem teachim pipol.—Ps. 78:2.
Olketa narawan no laekem wanem Jesus teachim bikos olketa les long hem. Taem Jesus teach long sinagog long hom bilong hem, Nazareth, pipol “barava sapraes.” Bat olketa hia no laek luksavve Jesus hem Messiah bikos olketa kwestinim samfala samting abaotem hem. Olketa sei: “Wea nao disfala man lanem olketa samting hia? . . . Hem nao datfala carpenter wea hem son bilong Mary. Hem brata bilong James, Joseph, Judas, and Simon, iaman? Olketa sista bilong hem tu stap witim iumi!” (Mark 6:1-3) Pipol long Nazareth no tinghae long wanem hem teachim bikos hem big kam long famili wea poor nomoa.
Waswe long olketa bigman bilong pipol hia? Staka long olketa garem sem tingting olsem pipol hia. (John 7:47-52) Olketa les long wanem Jesus teachim tu bikos olketa jealous long hem. Olketa jealous bikos staka pipol kam for herem Jesus. (Mark 15:10) And staka bigman kros bikos Jesus talem olketa hao olketa savve laea tumas. (Matt. 23:13-36) From olketa no laek luksavve long hem, Jesus tok strong long olketa olsem: “Barava nogud samting nao bae kasem iufala wea savve tumas long Law, bikos iufala aotem key wea openem door for savve abaotem God. Iufala no go insaed datfala door [Kingdom] and iufala trae for stopem olketa narawan wea laek go insaed tu!”—Luke 11:37-52.
Jesus preachim gud nius long Israel for thri and haf year. Hem lanem staka narawan for preach tu. (Luke 9:1, 2; 10:1, 16, 17) From Jesus and olketa disaepol bilong hem preach long staka ples, olketa Pharisee komplen olsem: “Iumi hard waka nating nomoa bikos evriwan followim hem nao!” (John 12:19) So hem no stret for sei olketa Jew no barava minim evri samting wea olketa duim. Bat olketa “no barava minim” hao Jesus hem Messiah. Olketa fit for lanem samfala samting moa abaotem Messiah and lovem hem, bat olketa no duim datwan. Samfala help for killim dae Jesus. Dastawe aposol Peter talem staka olsem: “Iufala mas repent and changem wei bilong iufala, mekem Jehovah savve forgivim olketa sin bilong iufala, strongim iufala, and sendem kam datfala Christ wea God chusim for iufala, wea hem nao Jesus.” (Acts 3:19, 20) Iumi mas tingim hao staka thousand Jew witim “staka priest,” olketa lisin long gud nius. Olketa luksavve Jesus hem Messiah. So olketa repent and Jehovah hapi long olketa.—Acts 2:41; 4:4; 5:14; 6:7.