Pipol Long Farawe Ples Herem Truth

TUVA REPUBLIC long Russia hem stap long barava south part long Siberia. Mongolia stap south and east long datfala ples. Staka pipol long Tuva stap long olketa vilij wea farawe and wea no isi for olketa Witness kasem mekem olketa savve preach long there. Nomata olsem, lelebet longtaem go nomoa wanfala grup from olketa vilij hia kam long Kyzyl, kapitol taon bilong Tuva for wanfala meeting wea gohed for samfala day. Taem Maria, wanfala pioneer long Kyzyl, faendaot olketa hia kam, hem luksavve hem garem chance nao for preach long olketa hia wea no herem gud nius staka taem.

Maria story olsem abaotem wanem hem happen: “Long skul wea mi teach long hem, olketa arrangem wanfala meeting wea gohed for samfala day for storyim hao for helpem pipol wea drink tumas, tekem drug, and tekem olketa nara nogud samting. Samting olsem 50 pipol from olketa farawe vilij long Tuva nao bae kam. Pipol hia hem olketa teacher, olketa doctor wea studyim mind and wei bilong pipol, olketa wea duim waka for helpem olketa pikinini, and olketa narawan.” Maria garem chance nao for preach long olketa, bat hem no isi samting for hem duim. Hem sei: “Mi savve shame ia, and hem no isi for mi duim enitaem preaching. Nomata olsem, mi prea long Jehovah for helpem mi no fraet and for iusim disfala chance for preach long olketa.” Waswe, Maria duim datwan?

Maria hem sei: “Mi faendem wanfala Awake! magasin wea story abaotem olketa samting wea pipol savve fraetem tumas. Mi tingse wanfala doctor wea studyim mind and wei bilong pipol nao maet interest long datfala magasin, so mi tekem datwan long skul. Long datfala day wanfala teacher wea kam long meeting hem kam long office bilong mi and mi offerim magasin hia long hem. Hem barava laekem, so hem tekem. Hem sei hem tu savve fraetem wanfala samting. Long next day, mi givim hem datfala buk, Questions Young People Ask​—⁠Answers That Work, Volume 1. Hem barava laekem datwan tu. From hem hapi for tekem datfala buk, mi tingim maet olketa nara teacher tu interest long buk hia. So mi tekem wanfala full box long Young People Ask buk and olketa nara buk long skul.” Kwiktaem nomoa evri buk hem finis. Maria story olsem abaotem wanem hem happen: “Staka narawan wea waka witim teacher wea mi givim Young People Ask buk long hem, olketa kam long office bilong mi and askem mi: ‘Wea nao mifala savve tekem olketa buk?’ ” Olketa kam long barava ples nao!

Lastfala day bilong meeting hem long Saturday. From Maria no waka long datfala day, hem putim olketa buk antap long olketa tebol long office bilong hem. Hem raetem note olsem long wanfala board: “Olketa Teacher! Iufala savve tekem eni buk hia wea iufala laekem. Iufala savve tekem eniwan for olketa fren bilong iufala tu. Olketa nambawan buk hia bae helpem iufala long waka bilong iufala and bae strongim famili bilong iufala tu.” Wanem nao happen? Maria hem sei: “Mi go long office bilong mi long datfala day and mi lukim klosap evri buk hia olketa tekem nao. Mi kwiktaem go tekem olketa niu buk and magasin.” Taem datfala meeting hem finis, Maria hem offerim 380 magasin, 173 buk, and 34 brochure. Olketa wea kam for datfala meeting go bak long ples wea olketa waka long hem and olketa tekem olketa buk hia witim olketa. Maria hem sei: “Mi barava hapi tumas pipol long olketa farawe ples long Tuva herem truth!”​—⁠Eccl. 11:⁠6.

[Piksa long page 32]

RUSSIA

[Piksa long page 32]

TUVA REPUBLIC