Gudfala Religion Mekhae Long Olketa Stretfala Wei for Followim

GUDFALA religion helpem iumi for garem gudfala tingting and mekem iumi for garem olketa gudfala wei. Hem strongim iumi for duim stret samting and hem helpem iumi for kamap gudfala pipol. Hao nao iumi savve gudfala religion savve duim olsem?

Tingim wanem aposol Paul raetem long olketa firstfala Christian wea stap long Corinth, long Greece. Pipol bifor savve long datfala taon Corinth, from olketa barava nogud samting wea olketa long there savve duim. Paul talem disfala warning: “Olketa wea durong, wea worshipim idol, wea brekem law bilong marit, olketa jury man, olketa wea leidaon witim nara man, wea steal, wea greedy, wea savve drunk, wea story nogud abaotem narawan, wea konim narawan, olketa bae no kasem kingdom bilong God.” Paul talem tu: “Long bifor yet, samfala long iufala stap olsem tu. Bat iufala kamap klin, holy, and stret long nem bilong Jesus Christ and witim Spirit bilong God.” (1 Corinthians 6:​9-​11, The Holy Bible​—⁠New International Version) Tingim diswan, gudfala religion helpem finis samfala pipol wea bifor wei bilong olketa hem nogud. Hem mekem olketa klin and kamap stretfala pipol for worshipim God!

Bible talem tu disfala warning: “Taem bae kam wea pipol bae no laek for herem olketa gudfala teaching, bat olketa bae followim tingting bilong olketa seleva nomoa and lukaotem olketa teacher wea teachim nomoa samting wea olketa laek for herem.”​—⁠2 Timothy 4:​3, Today’s English Version.

Waswe, olketa religion wea iu savve long olketa duim olketa samting hia? Waswe, olketa followim toktok long Bible abaotem olketa samting wea stret and no stret? Or waswe, olketa ting nating long olketa trufala toktok long Bible, and talem nomoa ‘samting wea pipol laek for herem’?

For helpem iu luksavve sapos wanfala religion hem garem gudfala frut, hem gud sapos iu markem taem for faendem ansa long olketa kwestin hia.

TOPIC: Marit.

WANEM BIBLE TALEM: “Evriwan shud barava respectim and tinghae long marit, and hasband and waef mas keepim marit bilong tufala hem klin. God bae judgem olketa wea durong.”​—⁠Hebrews 13:​4, New Century Version.

KWESTIN: Waswe, religion hia strongim wei for man and woman marit bifor tufala stap tugeta?

TOPIC: Divorce.

WANEM BIBLE TALEM: Taem olketa askem Jesus sapos eni reason stap wea fitim man for divorce, hem talem olsem: “Eniwan wea lusim waef bilong hem and maritim narawan bae spoelem waef bilong hem bikos hem duim adultery. Bat sapos waef hem durong, hasband savve lusim hem.”​—⁠Matthew 19:​9, New Catholic Edition of the Holy Bible.

KWESTIN: Waswe, religion hia showimaot respect long toktok wea Jesus talem and letem pipol for divorce and marit moa sapos hasband or waef durong?

TOPIC: Sex.

WANEM BIBLE TALEM: “Ranawe from wei for durong. Olketa nara sin wea man savve duim hem aotsaed long body bilong hem, bat man wea durong hem sin againstim body bilong hemseleva.”​—⁠1 Corinthians 6:​18, NIV.

“Olketa woman tu iusim body bilong olketa long wei wea hem no stret. Olketa man tu olketa no interest long woman bat olketa iusim body bilong olketa for man duim sex witim man. Olketa man duim olketa nogud samting witim nara man, and from diswan olketa kasem nogud samting from nogud wei bilong olketa.”​—⁠Romans 1:​26, 27, TEV.

KWESTIN: Waswe, religion hia teachim hao hem no wanfala sin sapos man and woman wea no marit, or man witim man, or woman witim woman duim sex?

TOPIC: Olketa long gudfala religion evritaem strong for followim wanem Bible talem.

WANEM BIBLE TALEM: “Iufala no fren witim eniwan wea no biliv long Christ wea durong or wea hem greedy or worshipim idol or tok againstim nara man or wea savve drunk or konim narawan. Nomata for kaikai witim olketa, nomoa tu.” (1 Corinthians 5:​11, NCV) Olketa hia wea sei olketa Christian bat laek for duim kaen samting olsem, olketa shud kasem wanem? Bible sei for “aotem olketa nogud pipol olsem wea stap witim iufala.”​—⁠1 Corinthians 5:​13, NIV.

KWESTIN: Waswe, religion hia savve aotem nem bilong eniwan wea stap long religion bilong olketa wea no laek for followim wanem Bible talem?