Spesol Tok for Pablik

Wanem Taem Nao Trufala Peace Bae Kamap and Pipol Stap Gud?

For staka thousand year, olketa man trae hard for mekem trufala peace kamap and for pipol stap gud, bat olketa no savve mekem datwan kamap. Why nao olsem? Bible storyim tufala reason why hem hard tumas for olketa man mekem datwan happen. Bible storyim tu hao God promisim bae hem mekem trufala peace kamap long full world and olketa man bae stap gud.

Long wanem wei nao bae God mekem trufala peace kamap and pipol stap gud? And long wanem taem nao bae datwan happen? Wanem nao iu need for duim mekem iu stap long datfala taem? Bae iumi savve long ansa long olketa kwestin hia long wanfala tok wea garem title, “Wanem Taem Nao Trufala Peace Bae Kamap and Pipol Stap Gud?” Disfala Bible tok bae kamap long winim 230 kantri long world. Long staka ples, disfala tok bae kamap long Kingdom Hall bilong Olketa Jehovah’s Witness long Sunday, April 18, 2010. Olketa Jehovah’s Witness long ples wea iu stap bae hapi for talem iu taem and ples wea disfala tok bae kamap. Mifala laekem tumas for iu kam.