Redi for Preach and Kasem Blessing

WASWE, iu redi evritaem for preach long territory bilong iu? Olketa brata long Turku, long Finland, lukaotem chance for preach and olketa kasem blessing.

No longtaem go nomoa, olketa brata long Turku lukim samfala man from Asia wea kam for buildim tourist boat. Gogo wanfala brata savve long ples wea olketa stap. Hem savve tu hao long early morning olketa hia tekem bas from hotel for go long ples olketa waka long wharf. Hem kwiktaem talem go long olketa brata long English kongregeson long Turku.

Olketa elder kwiktaem duim samting for sharem message abaotem Kingdom long olketa. Long Sunday, tenfala pablisa hipap klosap long bas stop long seven klok long morning. Firstaem no eni wakaman kam. Olketa pablisa ting olsem, ‘Waswe, iumi nao leit? Waswe, olketa wakaman lusim Turku finis?’ Bat seknomoa wanfala man wea werem overall hem kam. Then narawan moa, and staka moa kam. No longtaem nomoa, staka hipap klosap long bas stop. Olketa pablisa start for preach long olketa and givim olketa buk long English languis. Hem klosap wan hour bifor evri wakaman faendem ples for sidaon long olketa bas, so diswan mekem olketa brata savve story witim olketa. Taem olketa bas go, olketa wakaman tekem 126 brochure and 329 magasin!

Diswan encouragem olketa brata for duim moa long week bihaen taem circuit overseer visitim olketa. Long 6:30 long morning, hem rain taem 24 pablisa meet for field service witim circuit overseer, bat olketa go long bas stop. Olketa tekem samfala pablikeson long Tagalog languis tu bikos staka wakaman hia kam from Philippines. Long datfala morning taem olketa bas go, olketa wakaman tekem 7-fala buk, 69 brochure, and 479 magasin. Olketa brata and sista wea duim datwan barava hapi tumas!

Bifor olketa wakaman go bak long kantri bilong olketa, olketa brata go visitim olketa long hotel wea olketa stap and story gud abaotem Kingdom. Samfala wakaman sei olketa Witness visitim olketa taem olketa go long nara kantri. Olketa wakaman thankiu long olketa brata bikos olketa visitim olketa taem olketa stap long Finland.

Waswe, iu redi evritaem for preach long territory bilong iu? Waswe, iu duim samting for preach long pipol wea garem difren languis? Sapos iu duim olsem, iu tu savve kasem blessing olsem olketa brata bilong iumi long Turku.

[Map and Piksa long page 32]

(For fully formatted text, see publication)

FINLAND

HELSINKI

Turku