Waswe, Iu Tingim Yet?

Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:

• Why nao God no panisim Aaron bikos hem mekem datfala gold buluka?

Aaron brekem law bilong God abaotem wei for no worshipim idol. (Ex. 20:​3-5) Nomata olsem, Moses prea for Aaron, and prea bilong Moses garem “bigfala paoa” for helpem Aaron. (Jas. 5:​16) Aaron hem faithful for longfala taem finis. And nomata Aaron wakem wanfala gold idol wea luk olsem buluka, samting wea Aaron duim bihaen showimaot hem barava no laekem wei for worshipim idol. Evri son bilong Levi and Aaron disaed strong for saed witim Jehovah. (Ex. 32:​25-​29)​—⁠5/15, page 21.

• Wanem nao savve helpem wanfala Christian sapos marit partner bilong hem duim adultery?

Sapos partner wea no duim rong samting trae hard for followim Bible, hem no need for feel guilty sapos partner bilong hem duim adultery. Jehovah savve iu needim samwan for comfortim iu and encouragem iu. Jehovah savve iusim olketa nara Christian for comfortim iu.​—⁠6/15, page 30-​31.

• Wanem nao savve helpem wanfala man for kontrolem drink and no ova tumas?

Prea and wei for studyim Bible savve helpem hem. Hem important for hem lane for kontrolem hemseleva, followim wanem hem disaedem, and chusim olketa gudfala fren. Man wea disaed for drink mas markem haomas hem bae drinkim and lane for sei nomoa.​—⁠7/1, page 7-9.

• Wanem nao thrifala wei for steal wea pipol tingse hem gud nomoa?

Samfala sei hem olraet nomoa for man steal sapos hem poor. Samfala narawan sei hem olraet bikos “hem samting wea evriwan duim.” And samfala sei sapos iu faendem wanfala expensive samting wea samwan lusim, “iu savve keepim sapos iu nao faendem.” Bible nating agree witim thrifala wei hia for steal.​—⁠7/1, page 26-28.

• Wanem nao iu savve duim for helpem pikinini bilong iu laek for read?

Taem dadi and mami showimaot love and gudfala example, datwan savve helpem pikinini laek for read. Givim olketa buk long pikinini. Read big witim hem. Askem olketa kwestin and storyim wanem iufala readim. Askem pikinini for read kam long iu, and encouragem hem for askem kwestin.​—⁠7/15, page 26.