Lukim Nem Long Valley
SAINT MORITZ. Waswe, enitaem iu herem datfala nem? Maet iu herem datwan bikos hem wanfala resort long Engadine Valley long Switzerland wea staka pipol savve go for holiday. Datfala valley luk naes tumas. Hem garem olketa maunten wea snow kavarem and hem stap south east long Switzerland klosap long border long Italy. Bat hem no Saint Moritz nomoa wea pipol go for lukim long datfala valley. Swiss National Park tu hem long datfala valley, wea garem staka naes plant and animal wea mekem pipol praisem Jehovah. (Ps. 148:7-10) Bat start kam long midol long mek-17 century, nara samting tu stap kam kasem distaem.
Maet iu sapraes for lukim wanfala samting wea stap long staka haos long there. Iu savve lukim nem bilong God front long olketa haos, olsem antap long main door. Long olketa handred year wea go pas, hem kastom long there for paintim or karvem long wall or long ston olketa toktok for decoratem haos. Long daon hem piksa long wanfala haos olsem long vilij long Bever. Olketa raetem toktok olsem: “Olketa buildim haos long 1715. Jehovah nao start and Jehovah nao end. Iumi no savve duim eni samting sapos God no helpem iumi.” Tru tumas, datfala old saen garem nem bilong God tufala taem.
Iu savve lukim nara saen wea old winim datwan long vilij long Madulain. Datfala saen sei: “Psalm 127. Sapos Jehovah no helpem iumi for wakem haos, waka hia hem iusles nomoa. Lucius Rumedius. Year hem 1654.”
Why nao pipol raetem nem bilong God long olketa haos long datfala valley? Long mek-16 century, pipol garem Bible long Romansh languis, wanfala Latin languis wea pipol long Engadine iusim. Bible nao first buk wea olketa transleitim long datfala languis. Pipol tinghae long wanem olketa readim long Bible, dastawe staka raetem nem bilong olketa and olketa toktok from Bible wea garem nem bilong God long haos bilong olketa.
Tru tumas, toktok wea olketa raetem long olketa haos hia mekem pipol for savve long nem bilong Jehovah and praisem hem, nomata olketa raetem datwan staka handred year go finis. Olketa wea visit kam and olketa wea stap long datfala valley savve lanem moa samting abaotem nambawan God, Jehovah, taem olketa visitim nara building wea garem nem bilong God, hem nao Kingdom Hall bilong Olketa Jehovah’s Witness long Bever.
[Piksa long page 7]
© Stähli Rolf A/age fotostock