Famili Bae Kasem Gud Samting!
FAMILI WORSHIP hem important bikos datwan bae helpem iu for “stretem and trainim [pikinini] followim tingting bilong Jehovah.” (Eph. 6:4) Sapos iu dadi or mami, iu luksavve olketa pikinini savve kwiktaem for lus interest. Wanem nao iu savve duim for mekem olketa no lus interest? Tingim wanem samfala dadi and mami duim finis.
George, wea stap long California, America, sei: “Taem olketa pikinini smol, mi and waef trae hard for mekem famili Bible study interesting. Samfala taem mifala werem kaleko olsem pipol long bifor and actim olketa story wea mifala readim from Bible Story Buk Bilong Mi. Mifala wakem olketa samting olsem sword, iron stik bilong king, olketa basket, and samfala samting moa. Mifala pleim tu samfala game wea samwan bae actim eniwan from Bible and narawan bae trae for talem ‘hu nao hem.’ Mifala mekem tu game wea garem olketa kwestin abaotem Bible wea samfala hem isi and samfala hem hard. Mifala duim olketa project, olsem for wakem ark bilong Noah or for raetem daon olketa year wea samting wea Bible storyim hem happen. Samfala taem mifala drawim samfala man long Bible or wanem happen long story. Distaem mifala garem project for drawim evri samting for faet wea Ephesians 6:11-17 storyim, and for mifala wanwan explainim wanem each samting hem piksarem. Olketa samting hia helpem mifala for enjoyim famili study bilong mifala.”
Wanfala sista wea nem bilong hem Debi, wea stap long Michigan, America, sei: “Mi and hasband bilong mi faendem hem no isi for mekem gele bilong mitufala wea thri year for interest long olketa Bible story. Bat wanday, taem mi readim story abaotem Isaac and Rebekah from Bible Story Buk Bilong Mi, mi tekem tufala dole and iusim for actim Isaac and Rebekah. Datwan mekem hem barava interest! Long olketa month bihaen, mifala iusim tufala dole hia for actim staka narawan long Bible. Taem mifala readim wanfala story, gele bilong mitufala lukaotem eni dole or samting wea stap long haos for iusim for actim datfala story. Haos bilong Rahab mifala wakem long box wea shoe stap insaed and mifala putim wanfala red string long hem. Mifala putim false snek wea 1.5 meter raonem stik bilong brum for piksarem copper snek wea Numbers 21:4-9 storyim. Mifala keepim evri samting for act insaed long big canvas basket. Mitufala hapi tumas for lukim gele bilong mitufala savve lukluk evritaem insaed ‘Bible story basket’ bilong hem. Hem naes for lukim hemseleva actim olketa story hia!”
Hem no isi for teachim pikinini. Dadi and mami need for duim samting evriday for helpem pikinini for laek worshipim Jehovah. Bat Famili Worship hem main wei for helpem dadi and mami for duim diswan. Tru tumas, famili bae kasem gud samting from wei for duim Famili Worship!