Waswe, Abraham Garem Olketa Camel?

BIBLE storyim hao camel hem wanfala long olketa animal wea Pharaoh givim long Abraham. (Gen. 12:16) Taem wakaman bilong Abraham travel farawe go long Mesopotamia, hem “tekem tenfala camel from olketa camel bilong masta bilong hem.” So Bible storyim klia hao long samting olsem 4,000 year go finis, Abraham garem olketa camel.​—Gen. 24:10.

Nomata olsem, samfala no agree witim datwan. New International Version Archaeological Study Bible sei: “Staka savveman sei olketa scripture wea storyim olketa camel hem no stret witim wanem history talem, bikos staka bilivim pipol no iusim olketa animal hia go kasem 1200 B.C., staka year bihaen long taem bilong Abraham.” Olketa sei olketa story wea Bible storyim abaotem camel hem no tru bikos pipol no iusim camel long taem wea Bible story abaotem.

Bat samfala savveman sei nomata pipol barava iusim olketa camel samting olsem 3,000 year go finis, datwan no minim pipol no iusim olketa camel bifor datfala taem. Datfala buk Civilizations of the Ancient Near East sei: “Olketa wea duim research no longtaem go nomoa talem hao pipol long southeastern Arabia start for iusim camel winim 4,000 year go finis. Pipol savve keepim olketa camel for tekem milk bilong hem, hair, skin, and meat bilong hem. Bat no longtaem bihaen, olketa start for iusim olketa camel for travel tu.” Luk olsem olketa bon and olketa nara oldfala samting wea pipol faendem long graon pruvim pipol iusim olketa camel bifor Abraham hem born.

Olketa oldfala raeting pruvim datwan tu. Datfala sem buk sei: “Long Mesopotamia, olketa raeting long clay garem list wea wanfala animal long datfala list hem [camel] and samfala stamp garem tu piksa wea showimaot datwan. Olketa samting hia showimaot maet pipol long Mesopotamia iusim olketa camel samting olsem 4,000 year go finis,” wea hem tu taem wea Abraham stap laef.

Samfala savveman storyim tu hao olketa bisnisman long South Arabia wea salem incense iusim olketa camel for karem cargo bilong olketa taem olketa akrosim desert for go long Egypt and Syria and maet long datfala taem nao pipol long datfala ples start for iusim camel. Luk olsem pipol duim kaen bisnis olsem start long 2000 B.C.E. Genesis 37:25-28 storyim samfala bisnisman long laen bilong Ishmael iusim camel for tekem incense go long Egypt, wea datwan hem samting olsem wan handred year bihaen Abraham stap laef.

Nomata maet staka pipol no iusim olketa camel long Middle East samting olsem 4,000 year go finis, pruv showimaot samfala pipol iusim olketa camel. The International Standard Bible Encyclopedia sei: “Hem no fitim for sei olketa scripture wea storyim hao pipol iusim camel hem no tru. Olketa bon and olketa oldfala samting wea pipol faendem long graon pruvim pipol iusim camel bifor [Abraham] stap laef.”