Kwestin From Reader

Information long service year report hem minim wanem?

Evri year iumi kasem report abaotem preaching waka. Olketa pablisim datwan long Yearbook and long Kingdom Ministry Bilong Iumi. Iumi hapi for savve abaotem samting wea pipol bilong Jehovah long world duim for preach abaotem Kingdom and for teachim long nara pipol. Bat for minim gud datfala report, iumi need for savve wanem nao samfala title and namba hem minim. Tingim samfala example hia.

Service year. Service year hem start long September and finis long August long year bihaen. Report wea olketa pablisim hem for service year wea go finis. Olsem example, report wea stap long February 2011 Kingdom Ministry Bilong Iumi hem for 2010 service year wea start long September 1, 2009, go kasem August 31, 2010.

Peak namba and average namba bilong olketa pablisa. Olketa pablisa hem olketa wea baptaes finis and olketa wea anbaptaes pablisa. “Peak namba bilong olketa pablisa” hem namba bilong olketa pablisa long wanfala month long service year wea winim namba bilong olketa pablisa long olketa nara month. Maet insaed datfala namba hem report bilong samfala pablisa wea givim leit report bilong olketa for month bifor. For savve long “average namba bilong olketa pablisa,” iumi addim evri namba bilong olketa wea givim report for each month long year then iumi divaedem namba hia long 12. Bae iumi kasem average namba bilong olketa pablisa.

Evri hour. Olsem report talem, Olketa Jehovah’s Witness iusim winim 1.6 billion hour long preaching waka. Bat taem wea iumi iusim for olketa nara samting olsem for duim shepherding kol, go long olketa meeting, study seleva, and ting raonem wanem iumi lanem, hem no insaed long datfala namba.

Selen. Long 2010 service year, Olketa Jehovah’s Witness spendem winim $155 million for lukaftarem olketa spesol pioneer, missionary, and traveling overseer. Bat selen wea olketa spendem for printim olketa Bible, buk, and magasin hem no insaed long datfala selen. And selen wea olketa spendem for lukaftarem winim 20,000 brata and sista wea volunteer long olketa Bethel no insaed long datfala selen tu.

Olketa wea kaikaim bred and drinkim wine long Memorial. Diswan hem namba bilong olketa Witness wea baptaes wea kaikaim bred and drinkim wine long Memorial. Bat maet disfala namba hem no tru namba bilong olketa anointed Christian wea stap long earth. Olsem example, maet samfala mistek for tingse olketa garem hope for go long heven bikos long wanem olketa bilivim bifor or bikos tingting and feeling bilong olketa no balance. So hem hard for iumi savve long tru namba bilong olketa anointed Christian wea stap long earth and iumi no need for savve long datwan. Governing Body no raetem nem bilong evriwan wea kaikaim bred and drinkim wine long Memorial.a

Bat iumi savve samfala anointed “wakaman bilong God” bae stap long earth taem bigfala trabol hem start. (Rev. 7:1-3) Olketa waka hard distaem for preach long pipol and teachim olketa. Service year report helpem iumi for savve long waka wea pipol bilong Jehovah duim long full world.

[Footnote]