Olketa No Fraet for Preach!
Olketa tru Christian no fraet for preach nomata olketa kasem persecution. Iumi savve read abaotem olketa Christian wea no fraet for preach, long buk “Bearing Thorough Witness” About God’s Kingdom and Jehovah’s Witnesses—Proclaimers of God’s Kingdom. Olsem olketa Christian long first century, iumi tu savve askem Jehovah for givim holy spirit and helpem iumi no fraet for preach.—Acts 4:23-31.
Wanfala brata raet abaotem preaching waka wea gohed long taem bilong World War I. Hem sei: “Olketa wea worshipim Jehovah gohed strong for givimaot mek-seven volume bilong Studies in the Scriptures, wea garem title The Finished Mystery, and olketa givimaot staka copy. Long 1918, olketa givimaot Kingdom News No. 1. Then olketa givimaot moa Kingdom News No. 2, wea explainim why gavman tambuim datfala buk The Finished Mystery. Next samting wea olketa givimaot hem Kingdom News No. 3. Olketa anointed Christian long datfala taem givimaot olketa pablikeson hia long staka pipol wea stap long olketa difren ples. Wei wea olketa givimaot olketa Kingdom News showimaot olketa garem faith and no fraet.”
Distaem olketa wea just start for duim preaching waka kasem training long hao for duim datwan, bat long bifor hem no olsem. Wanfala brata from Poland wea stap long America storyim samting wea happen long firstaem wea hem duim preaching waka long 1922. Hem sei: “Mi no savve wanem for storyim abaotem olketa pablikeson bilong iumi and mi no savve gud long English. Mi nating forgetim wanem hem happen bikos mi hapi for go preach bat long semtaem mi fraet tu. Mi go preach seleva and mi noknok long office bilong wanfala doctor. Wanfala nurse nao kamaot. Taem mi openem basket bilong mi, evri buk foldaon. Mi no savve wanem nao mi talem bat datfala nurse tekem wanfala buk. Taem mi lusim office hia mi no fraet nao and mi savve Jehovah blessim mi. Long datfala day, mi givimaot staka buk long datfala bisnis territory.”
Wanfala sista sei: “Start long 1933, staka brata iusim olketa car wea garem speaker antap for talemaot message abaotem Kingdom.” Wanfala taem, sista hia go preach witim wanfala hasband and waef long ples wea garem olketa maunten long California, America. Hem sei: “Wanfala brata draevem car and go stop long maunten, bat mifala stap long taon. Taem brata pleim message from car, hem here olsem datfala message kam from heven. Pipol wea stap long taon lukaotem datfala brata bat no savve faendem hem. Taem brata finis for pleim datfala message, then mifala go preach long pipol long datfala taon. Mi savve go preach witim nara tufala brata wea car bilong tufala garem speaker bat mi luksavve plande pipol no laek herem message abaotem Kingdom. Nomata olsem, pipol savve herem datfala message evriwea. Hem no isi for iusim olketa car wea garem speaker for preach and man mas no fraet. Bat mifala luksavve Jehovah iusim samting wea fitim datfala taem. Datwan helpem plande pipol for herem message abaotem Kingdom and mekhae long nem bilong God, Jehovah.”
Start long 1930 go kasem 1945, olketa brata and sista iusim phonograph and olketa Bible tok wea olketa recordim for duim ministry. Wanfala sista sei: “Wantaem wanfala young sista preach from haos tu haos and iusim phonograph. Taem hem kasem wanfala haos and start for pleim tok wea olketa recordim, man wea ownim haos hem kros tumas and hem kickim datfala phonograph. Bat no eni record hem brek. Thrifala man wea sidaon long trak and kaikai, lukim wanem hem happen and askem sista for pleim record for olketa. Bihaen olketa tekem samfala pablikeson. Datwan mekem sista hia for hapi nomata hem kasem hard taem.” Tru tumas, olketa brata and sista long datfala taem mas no fraet for preach.
Datfala sem sista sei tu: “Mi tingim yet taem wea mifala start for duim street witnessing for offerim olketa magasin long 1940. Bifor olketa brata and sista savve laen ap and wakabaot go daon long street and karem olketa saen wea sei ‘Religion Is a Snare and a Racket’ and ‘Serve God and Christ the King.’ Long semtaem, olketa givim tu olketa free tract long pipol. Olketa brata and sista mas no fraet for duim datwan. Nomata hem no isi, datwan helpem pipol for luksavve long olketa wea worshipim Jehovah and for savve long nem bilong God.”
Nara sista sei: “Hem no isi for duim street witnessing and offerim olketa magasin long olketa smol taon. Long datfala taem, pipol barava againstim olketa Witness. . . . Man mas no fraet for standap long kona long street and holem magasin and singaotem samfala toktok abaotem datfala magasin. Nomata olsem, klosap evri Saturday mifala preach. Samfala pipol kaen long mifala. Samfala taem, olketa raf grup savve kam raonem mifala and mifala mas ranawe mekem olketa no duim eni nogud samting long mifala.”
Nomata Olketa Jehovah’s Witness kasem persecution long World War II, olketa gohed strong for preach. Wanfala campaign wea kamap long December 1, 1940, go kasem January 12, 1941, hem gohed for 43 day. Samting olsem 50,000 pablisa long America joinim datfala campaign and givimaot klosap 8 million buk.
Staka olo brata and sista tingim yet wei wea olketa mas no fraet for preach nomata olketa kasem hard taem. Samfala tingim yet olketa naesfala toktok wea evriwan savve talem for encouragem narawan for no fraet and gohed strong for preach. Iumi no savve sapos Jehovah bae givim iumi samfala niu direction long hao for preach bifor disfala rabis world bae finis. Bat iumi savve Jehovah bae helpem iumi gohed strong and no fraet for preach.
[Blurb long page 9]
Olketa wea preach abaotem Kingdom mas no fraet