“Iu Savve Tekem Piksa Bilong Mitufala?”
Bihaen mek-tu day long wanfala convention long Querétaro, Josué wea hem wanfala Bethelite long Mexico, go wakabaot long taon. Hem meetim wanfala hasband and waef, Javier and Maru wea tufala tourist from Colombia. Tufala askem Josué for tekem piksa bilong tufala. From Josué and olketa fren bilong hem werem naesfala kaleko and badge card bilong convention, datwan mekem hasband and waef hia ask sapos olketa stap kam long wanfala graduation or spesol hipap. Josué talem hao olketa attendim wanfala convention bilong Olketa Jehovah’s Witness, and hem invaetem hasband and waef hia for kam long Sunday.
Bat Javier and Maru sei tufala shame for go attend bikos tufala no garem naesfala kaleko for werem long convention. Nomata olsem, Josué raetem nem bilong hem and telephone namba bilong Mexico branch office and givim long tufala.
Fofala month bihaen, Josué sapraes for herem nius from Javier. Javier and Maru attendim datfala convention and laekem Olketa Jehovah’s Witness for visitim tufala long Mexico City. No longtaem bihaen, olketa Witness study witim Javier and Maru and tufala start for attendim olketa kongregeson meeting. Tenfala month bihaen nomoa, tufala kamap pablisa. Nomata tufala muv go long Toronto, Canada, tufala gohed gud long spiritual wei, and gogo tufala baptaes.
Bihaen, Javier raetem wanfala leta long Josué and hem storyim wanem nao mekem hem for acceptim truth. Javier sei: “Bifor mitufala attendim datfala convention, mifala storyim hao mifala laekem God for helpem mifala. Mitufala savve iufala go long wanfala spesol meeting bikos iufala werem naesfala kaleko. Long datfala convention, mitufala tinghae long wei wea olketa showim mifala ples for sidaon, samwan helpem mifala for lukim olketa scripture long Bible, and gudfala wei wea evriwan showimaot. Olketa welkamim mitufala nomata kaleko wea mifala werem no fitim convention.”
Josué luksavve toktok wea King Solomon talem hem barava tru! Solomon sei: “Iu mas plantim olketa seed start long morning go kasem evening, bikos iu no savve which wan long olketa nao bae grow. Maet evri seed grow gud, or maet samfala nomoa grow bat olketa narawan no grow.” (Eccl. 11:6) Iu tu savve mekius long eni chance wea iu garem for invaetem narawan for attendim convention or for kam herem pablik tok. Maet Jehovah savve iusim iu tu for helpem olketa wea laek for savve long tru samting abaotem Bible, olsem Javier and Maru.—Isa. 55:1.
[Piksa long page 32]
Left go kasem raet: Alejandro Voeguelin, Maru Pineda, Alejandro Pineda, Javier Pineda, and Josué Ramírez long Mexico branch