Olketa Gohed Strong Long “Taem Bilong Test”

TAEM World War I hem start long 1914, pipol evriwea luksavve Olketa Bible Student bae no join insaed long war. (Isa. 2:2-4; John 18:36; Eph. 6:12) Wanem nao happen long pipol bilong Jehovah long Britain?

Long 1916, Britain garem law wea sei olketa singol man wea 18 go kasem 40 year mas joinim army. Datfala law sei tu gavman no savve forcem man wea no laek joinim army bikos long “religion or konsens” bilong hem. Gavman garem olketa spesol kot for disaedem sapos olketa bae letem man no joinim army, and sapos olketa bae panisim hem or nomoa, or givim nara waka long hem or nomoa.

Nomata datfala law hem stap, gavman putim samting olsem 40-fala brata long prison and sendem 8-fala long datfala faet long France. From olketa brata long Britain no agree witim diswan, olketa raetem wanfala leta long Prime Minister, Herbert Asquith, and 5,500 pipol saenem wanfala pepa for showimaot olketa tu no agree.

Then kot bilong army sei bae olketa sutim dae 8-fala brata hia wea go long France bikos olketa no willing for faet long war. Bat taem olketa laen ap for sutim olketa dae, olketa disaed for putim olketa brata hia long prison for tenfala year. Olketa sendem olketa go bak for stap long prison long England.

Gogo, olketa mekem wanfala law wea sei olketa man wea marit tu mas joinim army. Long Manchester, England, olketa kotem Henry Hudson, wanfala Bible Student wea hem doctor tu. Long August 3, 1916, datfala kot sei hem brekem law, hem mas peim fine, and olketa sendem hem go long army. Long semtaem tu, long Edinburgh, Scotland, olketa kotem James Frederick Scott, wanfala colporteur wea 25 year. Kot sei hem no guilty. Gavman no acceptim datfala disison, bat olketa disaed for leavim datwan and kotem nara brata long London, wea nem bilong hem Herbert Kipps. Datfala kot sei hem guilty, hem mas peim fine, and olketa sendem hem go long army.

Kasem September 1916, namba bilong olketa brata wea apply for no joinim army hem 264. Faevfala long olketa hia nomoa winim case bilong olketa. Kot markem 154 for duim hard waka olsem for wakem road or digdig for olketa ston. Twenti thri go waka long army bat no insaed faet, and nara 82 olketa sendem go long army. Samfala moa olketa sendem go long prison. Staka pipol no hapi long nogud samting wea happen long olketa man hia long prison, so gavman aotem olketa from army prison and putim olketa long olketa nara prison.

Edgar Clay and Pryce Hughes, wea hem branch overseer long Britain bihaen, tufala help for wakem wanfala dam long Wales. Bat Herbert Senior, wanfala long eitfala brata wea kam bak from France, olketa sendem hem go long Wakefield Prison long Yorkshire. Olketa narawan duim hard waka long Dartmoor Prison wea laef hem barava hard. Winim eni nara prison, Dartmoor Prison nao garem staka prisoner wea no laek joinim army bikos long konsens bilong olketa.

Frank Platt, wanfala Bible Student wea agree for duim nara waka long army bat no insaed faet, hem kasem bigfala persecution taem olketa trae forcem hem for faet. Atkinson Padgett lanem truth no longtaem bihaen hem joinim army. Olketa bigman bilong army barava raf tu long hem taem hem no laek join insaed faet.

Long 100 year bifor, olketa brata bilong iumi no barava minim gud evri samting saed long wei for no teksaed long war. Nomata olsem, olketa traem best for mekem Jehovah God hapi. Olketa brata wea iumi storyim long disfala article showimaot gudfala example for no teksaed long barava hardfala “taem bilong test.” (Rev. 3:10)—From branch office bilong iumi long Britain.