King Hem Hapi Tumas!

LONG August 1936, long Swaziland, Robert and George Nisbet go long Swaziland Royal Kraal, wea hem compound bilong King Sobhuza II. Tufala iusim saond car for pleim samfala music and samfala tok bilong Brata Joseph Rutherford. King Sobhuza hem hapi tumas for herem datwan. George sei: “King sei hem laek for baem datfala record player, olketa record, and laodspeaker wea mifala iusim for talemaot Kingdom message, and mitufala no savve nao wanem for talem long hem!” Wanem nao tufala duim?

Robert talem hem tufala no savve salem olketa samting hia. Why nao olsem? Bikos evri samting hia hem no bilong tufala. King laek for savve hu nao ownim olketa samting hia.

Robert sei long hem: “Wanfala nara King nao ownim evri samting hia.” Then Sobhuza askem hu nao datfala King. Robert sei: “Hem Jesus Christ, wea hem nao King long Kingdom bilong God.”

Witim bigfala respect, Sobhuza sei: “Hem wanfala nambawan King. Mi no laek tekem eni samting bilong hem.”

Bihaen, taem Robert raet abaotem diswan, hem sei: ‘Mi barava tinghae long gudfala wei bilong disfala Paramount Chief, King Sobhuza. Hem savve tumas for story long English and hem no show-off witim tu. Hem man wea barava isi tumas for story witim hem. Mi story witim hem long office bilong hem for samting olsem 45 minute, taem George gohed pleim music aotsaed.’

Robert sei tu: ‘Bihaen, long datfala sem day, mifala visitim The Swazi National School, wea mifala kasem wanfala barava interesting experience. Mifala preach long principal and hem lisin gud. Taem mifala talem hem mifala garem record player and ask for pleim datwan for evriwan long skul, hem hapi long datwan and hipimap klosap 100 student for sidaon long grass and herem datfala recording. Olketa boy long datfala hae skul skulim agriculture, gardening, carpentry, building, English, and maths. Olketa gele skulim nursing, hao for waka long haos, and narafala samting for helpem olketa.’ Granmami bilong Paramount Chief nao startim datfala skul.

King Sobhuza hem welkamim olketa pioneer for preach long datfala Royal Kraal start long 1933. Wantaem, hem hipimap 100 man wea gaedem hem for lisin long wanfala recording. Hem kasem subscription for olketa magasin bilong iumi and acceptim samfala pablikeson. Kwiktaem nomoa King garem klosap evri buk bilong iumi long library bilong hem! Long World War II, Swaziland stap anda long rul bilong British and olketa tambuim olketa buk bilong iumi. Nomata olsem, King hem keepim gud olketa buk bilong hem.

For staka year, King Sobhuza II hem welkamim olketa Witness long datfala Royal Kraal long Lobamba, and hem invaetem olketa bigman bilong church tu for kam herehere long olketa Bible tok. Taem wanfala Witness wea nem bilong hem Helvie Mashazi hem story abaotem Matthew chapter 23, samfala bigman wea kros olketa getap kwiktaem and trae forcem hem for sidaon. Bat King stopem olketa and talem Brata Mashazi for gohed long tok bilong hem. And tu, King talem audience for raetem evri scripture wea Brata Mashazi storyim!

Long narataem, bihaen wanfala pioneer brata givim tok long there, fofala bigman bilong religion wea herem datfala tok sei: “Distaem mifala no bigman nao, mifala Olketa Jehovah’s Witness.” Then olketa askem datfala pioneer brata sapos hem garem eni buk olsem olketa buk wea King Sobhuza garem.

From olketa year bilong 1930 go kasem taem wea King Sobhuza dae long 1982, hem respectim Olketa Jehovah’s Witness and no letem eniwan persecutim olketa from olketa no keepim olketa kastom bilong pipol long Swaziland. Dastawe olketa Witness tinghae long wanem hem duim for olketa and barava sorre taem hem dae.

Long start bilong 2013, winim 3,000 pablisa nao stap long Swaziland. From population bilong kantri hia hem lelebet winim wan million pipol, olketa garem 1-fala pablisa for evri 384 pipol. Olketa garem winim 260 pioneer long 90 kongregeson, and 7,496 nao attendim Memorial long 2012. So maet olketa garem staka pablisa moa long future. Tru nao, olketa brata wea preach long Swaziland long olketa year bilong 1930 barava duim gudfala waka.—From branch office long South Africa.