KAVA SUBJECT: WHY NAO STAKA PIPOL SAFA? WANEM TAEM BAE HEM FINIS?
Staka Innocent Pipol Dae!
Noelle hem wanfala smol gele wea klosap foa year nomoa. Hem lovem evriwan and hem laekem tumas for draw. Wanfala evening hem plei aotsaed long haos bilong olketa and gogo hem foldaon long swimming pool and hem draon.
Long December 14, 2012, wanfala man sutim dae 26 pipol long wanfala skul long Connecticut, long U.S.A. Long memorial service bilong olketa, President Obama readim aot nem bilong 20-fala pikinini wea dae long datfala taem. Samfala long olketa hem Charlotte, Daniel, Olivia, and Josephine. Olketa pikinini wea dae olketa six and seven year nomoa. President Obama sei: “Olketa nogud samting olsem mas no happen moa.”
Long 1996, Bano and famili bilong hem lusim Iraq and muv go long Norway. Olketa fren bilong disfala gele savve kolem hem Sunshine. Bat long July 22, 2011, Bano wea 18 year nomoa, hem wanfala long 77 pipol wea dae taem wanfala man sutim olketa. Datfala krangge man hem tok praod taem hem sei: “Mi sorre tumas . . . bikos mi no savve killim dae samfala pipol moa.”
Olketa report showimaot olketa sorre samting olsem hem happen evriwea long world. Olketa nogud samting wea kamaot from olketa accident, crime, war, terrorism, and natural disaster savve mekem pipol sorre and safa tumas. Staka innocent pipol safa and dae nating nomoa!
Samfala pipol sei God no tingim iumi and blamem God for olketa nogud samting wea happen. Olketa narawan sei God hem lukim nomoa wei wea iumi safa bat hem no duim samting for helpem iumi. Samfala narawan sei hem will bilong God nao for olketa samting olsem happen. Pipol garem staka difren idea abaotem datwan. Wea nao iumi savve kasem ansa wea iumi savve trustim and mekem iumi satisfae? Long nara tufala article, bae iumi lukim wanem Bible talem abaotem why pipol safa and hao nao datwan bae finis.