“Mi Karem Raon Haos Bilong Mi”

LONG end bilong August and start bilong September, 1929, insaed long naenfala day nomoa winim 10,000 brata and sista barava busy for duim preaching waka long staka ples long United States. Olketa givimaot 250,000 buk and buklet. Samting olsem wan thousand long olketa brata and sista hia, hem olketa colporteur. Olketa kamap barava staka! Datfala pepa Bulletin,a sei hem “barava sapraesing samting” for lukim namba bilong olketa pioneer hem kamap thrifala taem moa big from 1927 go kasem 1929.

Long October 29, 1929, wanfala big problem saed long selen hem kamap. Olketa kolem datfala day Blak Tuesday. Bigfala problem long New York Stock Exchange mekem full world garem problem saed long selen and hem start bilong datfala Great Depression. Staka thousand bank klos daon and olketa bigfala factory klos daon tu. Staka million pipol lei off from waka bilong olketa. Long 1933, long United States, olketa bank tekem bak samting olsem 1,000 haos evriday bikos pipol no savve peim bak loan bilong olketa.

Hao nao olketa long full-taem service savve kasem need bilong olketa long hard taem olsem? Wanfala samting olketa duim hem for garem haos trak. Olketa wea stap long haos trak no need for peim rent or tax and datwan helpem olketa pioneer for gohed long ministry bilong olketa, and no need for peim staka samting.b Long taem bilong convention olketa no need for pei for stap long eni hotel tu. Long 1934, datfala pepa Bulletin garem plan bilong hao for wakem haos trak wea garem wata, ples for kuki, bed wea olketa savve foldim, and kaen walling wea satem cold wind.

Staka pioneer raonem world followim datfala plan and wakem haos trak. Victor Blackwell hem sei: “Noah no wakem eni boat bifor, and mi tu no wakem eni haos trak bifor.” Nomata olsem, Victor wakem haos trak bilong hem.

Avery and Lovenia Bristow garem wanfala haos trak. Avery sei: “Mi olsem wanfala turtle wea karem raon haos bilong mi.” Tufala hia pioneer witim Harvey and Anne Conrow wea haos trak bilong tufala garem walling wea hem pepa wea olketa paintim tar long hem. Evritaem olketa draev, samfala pepa savve foldaon. Avery sei: “No eniwan lukim kaen trak olsem bifor, and kam kasem distaem no eni trak olsem stap tu!” Bat Avery sei, “no eni famili hem hapi winim” Harvey and Anne Conrow witim tufala son bilong olketa. Harvey Conrow sei: “Mifala no short long eni samting, and from Jehovah lukaftarem mifala, mifala no warim eni samting taem mifala duim waka bilong hem.” Bihaen, fofala evriwan attendim Gilead Skul and duim missionary waka long Peru.

Giusto and Vincenza Battaino tu pioneer witim pikinini bilong olketa. Taem olketa savve bae olketa garem pikinini, tufala changem 1929 Model A Ford trak bilong olketa for kamap haos trak. Tufala sei haos trak hia hem “olsem naesfala hotel” taem olketa comparem witim tent wea olketa stap long hem bifor. Tufala gohed pioneer witim smol gele bilong tufala long assignment wea olketa barava enjoyim, wea hem nao for preach long pipol from Italy wea stap long United States.

Staka pipol willing for herem gud nius, bat hem hard for pipol wea poor and no garem waka for givim contribution for Bible literature. So olketa givim enikaen difren samting for kasem literature. Tufala pioneer listim 64 difren kaen samting wea pipol wea interest givim long olketa. Datfala list hem “olsem stock list bilong wanfala stoa.”

Fred Anderson meetim wanfala farmer wea laekem samfala buk bilong iumi, bat from hem no garem selen hem givim eyeglass wea mami bilong hem iusim bifor. Long next farm, wanfala man laekem literature bilong iumi bat hem sei: “Mi no garem eyeglass for read.” Datfala eyeglass wea Fred kasem barava fitim hem and hem hapi for givim contribution for olketa buk and eyeglass hia.

Herbert Abbott garem wanfala cage long trak bilong hem for putim kokorako insaed. Taem pipol wea laekem literature givim hem kokorako, and hem kasem thri or fofala, hem go salem olketa long market and peim petrol for trak bilong hem. Hem sei: “Samfala taem mifala no garem eni selen bat datwan no stopem mifala. Sapos mifala garem petrol, mifala gohed for preach, and trustim Jehovah for lukaftarem mifala.”

Wei wea pipol bilong Jehovah depend long hem and no garem tingting for givap helpem olketa for gohed long datfala taem wea laef hem no isi. Wantaem, hem barava big rain. Semtaem Maxwell and Emmy Lewis go aot from haos trak bilong tufala, wanfala tree hem foldaon antap and pisisim. Maxwell hem sei: “Olketa samting hia no stopem mifala. Hem samting wea happen nomoa, and mifala no ting for givap. Staka waka stap, and mifala laek for duim datwan.” Maxwell and Emmy gohed nomoa, and olketa fren helpem tufala for wakem moa haos trak bilong olketa.

Long distaem wea laef hem no isi, plande million pipol wea worshipim Jehovah tu willing for iusim taem and strong bilong olketa long waka bilong hem. Olsem olketa pioneer bifor, iumi tu disaed strong for gohed long preaching waka go kasem taem wea Jehovah sei datfala waka hem finis.