“Wanfala Barava Spesol Taem”

LONG 1870, wanfala smol grup long Pittsburgh (Allegheny), Pennsylvania, U.S.A., start for duim deep study long Bible. Charles Russell nao leadim datfala grup, and subject wea olketa studyim hem ransom sakrifaes bilong Christ. Taem olketa duim datwan, olketa luksavve ransom hem barava important samting long plan bilong Jehovah. Olketa hapi for luksavve ransom mekem wei for pipol kasem laef, and nomata pipol wea no savve long Jesus tu bae kasem gud samting from datwan! From olketa tinghae long datwan, olketa celebratem dae bilong Jesus evri year for rememberim hem.—1 Cor. 11:23-26.

Gogo, brata Russell pablisim Zion’s Watch Tower magasin, wea mekhae long teaching bilong ransom sakrifaes bilong Christ, wea hem nao main wei wea God showimaot love. Watch Tower sei taem bilong Memorial bilong dae bilong Christ hem “wanfala barava spesol taem,” and hem encouragem olketa wea readim Watch Tower for celebratem datwan long Pittsburgh, or long eni nara ples wea olketa savve hipap long hem. Datfala magasin sei tu: “Nomata sapos tufala or thrifala wea garem sem biliv olketa hipap tugeta,” or nomata wanfala nomoa, bat “Lord bae stap witim olketa.”

Evri year, staka brata and sista kam for celebratem Memorial long Pittsburgh. Invitation for olketa wea kam hem sei: “Mifala bae welkamim iufala.” Tru nao, olketa Bible Student long Pittsburgh willing for givim kaikai and ples for stap long olketa spiritual brata and sista wea kam. Long 1886, long month bilong Memorial, olketa holem wanfala convention wea gohed for samfala day. Datfala Watch Tower sei: “Mifala invaetem iufala wea barava lovem Lord, and olketa follower bilong hem, and wea tinghae long olketa tru teaching, for iufala kam.”

For samfala year, olketa Bible Student long Pittsburgh holem olketa convention for olketa wea bilivim teaching abaotem ransom wea kam for celebratem Memorial. Taem namba bilong olketa Bible Student kamap big, namba bilong pipol wea attendim Memorial evriwea long world hem grow tu. Ray Bopp bilong Chicago ecclesia (kongregeson) sei long olketa year bihaen 1910, hem tekem tu-thri hour for pasim raon bred and wine bikos klosap evriwan wea attend kaikaim bred and drinkim wine.

Wanem kaen bred and wine nao olketa iusim? Olketa savve Jesus iusim wine long datfala Evening Kaikai Bilong Lord. Nomata olsem, long firstaem Watch Tower sei olketa savve iusim juice bilong grape, or juice bilong drae grape wea olketa boelem, mekem samfala wea garem problem long alcohol no ova tumas long hem. Bat olketa garem wine tu for olketa wea tingse “wine nao olketa shud iusim.” Bihaen nao olketa Bible Student luksavve red wine wea no mix witim eni samting hem piksarem blood bilong Jesus.

Wei for rememberim dae bilong Jesus helpem olketa brata and sista for tingting strong abaotem gud samting wea olketa kasem from datwan. Bat long samfala kongregeson, taem olketa celebratem Memorial, hem olsem taem wea olketa sidaon long dae bilong wanfala man, and bihaen program finis, evriwan go aot kwaet nomoa. Datfala buk, Jehovah, wea olketa pablisim long 1934 sei taem olketa celebratem Memorial, olketa shud no sorre from Jesus hem dae, bat olketa shud hapi from hem kamap King long 1914.

Long 1935, wanfala bigfala change kamap wea affectim hao olketa celebratem Memorial bikos olketa luksavve hu nao datfala “big crowd” wea Revelation 7:9 storyim. Bifor datfala year, pipol bilong Jehovah tingse disfala ‘big crowd’ hem olketa Christian wea dedicate long God bat no strong long worship bilong olketa. Bat long datfala taem, olketa luksavve disfala big crowd hem olketa wea faithful for worshipim God and olketa garem hope for laef long paradaes long earth. Bihaen disfala change hem kamap, brata Russell Poggensee hem tingting raonem diswan and hem sei: “Mi no kasem anointing witim holy spirit bilong Jehovah wea mekem mi sure mi garem hope for go long heven.” Brata Poggensee and staka narawan wea faithful olketa stop nao for kaikaim bred and drinkim wine, bat olketa gohed for attendim Memorial.

Long datfala “barava spesol taem,” wanfala samting wea olketa duim for showimaot olketa tinghae long ransom hem nao for join insaed olketa spesol preaching campaign. Long 1932, Bulletina hem encouragem olketa Christian for duim preaching waka and no kamap man wea attendim Memorial or olketa meeting long kongregeson nomoa. Long 1934, datfala Bulletin invaetem samfala wakaman moa taem hem askem disfala kwestin: “Waswe, bae iumi garem 1,000 auxiliary pioneer long taem bilong Memorial?” Datfala Informant sei olsem abaotem olketa anointed wan: “Sapos olketa duim preaching waka nao olketa bae hapi.” Gogo, olketa wea garem hope for laef long earth tu duim datfala waka.

Pipol bilong Jehovah ting long datfala naet wea olketa celebratem Memorial hem barava important taem long year. Olketa celebratem Memorial nomata samfala taem datwan hem no isi. Long 1930, Pearl English and sista bilong hem Ora, wakabaot for samting olsem 80 kilometer for attendim Memorial. Taem Harold King wea hem missionary long China stap seleva long wanfala smol cell, hem raetem olketa poem and olketa song abaotem Memorial. And tu, hem iusim juice bilong blak currant frut for olsem wine, and rice for olsem bred. Olketa Christian long Eastern Europe, Central America, and Africa no letem wei wea gavman tambuim waka or eni war, for stopem olketa for celebratem Memorial. Nomata wea iumi stap or wanem nao happen long iumi, iumi hipap tugeta for praisem Jehovah God and Jesus Christ long barava spesol taem bilong Memorial.