Oldfala Clay Pot wea Garem Bible Nem

Long 2012, pipol wea studyim olketa samting from bifor (archaeologist) faendem olketa smol pis bilong oldfala clay pot wea olketa wakem 3,000 year go finis. Olketa barava interest long diswan. Why nao olsem? No from olketa faendem olketa old pis clay nomoa bat bikos olketa garem raeting long hem.

Taem olketa archaeologist putim tugeta olketa pis clay hia, olketa faendaot datwan hem Canaanite raeting wea sei: “Eshba’al Ben Beda,” wea minim “Eshba’al, son bilong Beda.” Diswan nao hem firstaem for olketa archaeologist faendem disfala nem long eni oldfala samting.

Bible tu hem storyim narafala man wea nem bilong hem Eshbaal. Hem wanfala son bilong King Saul. (1 Chron. 8:33; 9:39) Professor Yosef Garfinkel wea hem wanfala long olketa wea faendem datfala clay pot, hem sei: “Hem interesting for savve disfala nem Eshba’al wea olketa archaeologist just faendem distaem, olketa iusim insaed long Bible long taem bilong King David nomoa.” Diswan hem narafala pruv wea showimaot olketa oldfala samting sapotim wanem Bible talem!

Long nara scripture long Bible, nem bilong disfala son bilong Saul, hem Ish-bosheth. (2 Sam. 2:10) Why nao olketa changem nem Eshbaal go long Ish-bosheth? Olketa man wea duim research sei man wea raetem Tu Samuel maet les for iusim nem Eshbaal bikos hem mekem olketa Israelite tingim Baal, god bilong olketa Canaanite wea olketa sei hem god bilong rain. Bat, long buk bilong First Chronicles hem iusim datfala nem Eshbaal.