Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long February 28, 2005. Skul overseer bae conductim wanfala 30-minute review long information wea kamap insaed olketa assignment start long week bilong January 3 go kasem February 28. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul, pp. 36-7.]
OLKETA POINT KAONSEL
1. Hao nao iumi savve mekem mining bilong samting wea iumi talem hem moa klia? [1, be-SP p. 226 par. 1–p. 227 par. 1] Iusim toktok wea isi for pipol minim olsem Jesus duim insaed Sermon long Maunten. Iusim shortfala toktok, mekhae long tu-thri main point nomoa, organizem gud information, explainim olketa toktok wea pipol no minim, and no kwiktaem storyim wanfala scripture and then narawan moa taem iu no explainim klia yet first scripture.
2. Olketa wanem kaen toktok nao bae iumi need for explainim go moa? [2, be-SP p. 227 par. 2–5] (1) Olketa toktok wea Olketa Jehovah’s Witness nomoa bae minim olsem “pioneer,” “circuit overseer,” and “Memorial”; (2) olketa toktok wea pipol iusim bat olketa no minim stret olsem “soul,” “Armageddon,” and “fornication”; (3) olketa toktok from Bible wea join witim olketa kastom and wei for measurem samting bilong olketa bifor, olsem “cubit.”
3. Wanem nao bae helpem iumi for storyim wanfala subject long wei wea bae barava helpem olketa wea herehere? [6, be-SP p. 231 par. 1-3] Iumi shud ting raonem disfala subject taem iumi askem iumiseleva wanem, why, wanem taem, wea, hu, and hao. No storyim nomoa olketa point wea iu rememberim or talem moa samting wea pipol savve finis abaotem. Duim research for kasem moa savve abaotem datfala subject.
4. Hao nao iumi savve storyim wanfala scripture wea audience savve finis long hem long wei wea savve really helpem olketa? [7, be-SP p. 231 par. 4-5] Iumi chusim olketa part wea join witim theme bilong iumi. Olsem example, taem iumi readim Micah 6:8 iumi savve ask, “Wanem nao ‘justice’? Justice bilong hu nao diswan storyim? Wanem nao hem minim for ‘showimaot justice’?” Then iumi savve tingim theme, goal and audience bilong iumi taem iumi storyim disfala scripture.
5. Taem iumi encouragem olketa wea herehere for tingim samfala interesting part bilong wanfala scripture wea olketa savve finis long hem, hao nao datwan savve helpem olketa? [9, be-SP p. 232 par. 2-4] Bae iumi helpem olketa wea herehere for barava minim gud samting sapos iumi storyim olketa verse wea stap raonem wanfala scripture, hu nao man wea story, and samting wea gohed taem man raetem disfala scripture. Diswan bae helpem olketa for readim Bible long careful wei and for minim gud olketa samting wea happen wea Bible storyim. (Matt. 22:41-45; Luke 20:37, 38)
ASSIGNMENT NO. 1
6. Wanem nao hem insaed wei for teachim pipol for “fraet long trufala God and obeyim olketa komandment bilong hem”? (Eccl. 12:13) [1, be-SP p. 272 par. 3–p. 273 par. 1] Pipol mas lanem hao Datwan wea creatim heven and earth nao hem tru God. Hem nomoa savve talem samting wea bae kamap long future and bae fulfillim samting wea hem talem olsem hem duim planti taem finis bifor. Evri man mas givim ansa long hem. (Isa. 45:18, 21, 22; 55:10, 11; Acts 17:30, 31)
7. Hao nao iumi savve mekhae long nem bilong Jehovah and olketa nambawan fasin bilong hem? (Joel 2:32) [3, be-SP p. 274 par. 2-4] Taem iumi teachim pipol hao Creator garem nem, iumi savve helpem man for minim wanem nao olketa nambawan fasin bilong hem. (Ex. 34:6, 7) Taem iumi mekhae long olketa Kingdom blessing, olketa komandment and mark bilong God, iumi savve storyim wanem nao olketa samting hia hem teachim iumi abaotem olketa fasin bilong Jehovah. Iumi laekem pipol for garem gudfala wei for fraet long God, bikos future laef bilong iumi depend long hem. (Ps. 89:7; Rom. 14:12)
8. Waswe, hem important for kasem savve abaotem Jesus and for storyim hem long nara pipol? (John 17:3) [5, be-SP p. 276 par. 1] For man kasem laef olowe hem needim stretfala savve abaotem Jesus Christ. Will bilong God hem for evriwan “talemaot Jesus Christ nao hem Lord.” (Phil. 2:9-11) So, olsem olketa servant bilong God wea loyal, iumi mas story long nara pipol abaotem Jesus Christ. (1 Tim. 2:3-7)
9. Hao nao wei for God appruvim iumi and for iumi minim gud Bible hem join witim wei wea iumi minim waka bilong Jesus? [6, be-SP p. 276 par. 2] Olsem John 14:6 talem, thru long Jesus Christ nomoa iumi savve fren gud and story witim God. Jehovah mekem only Son wea hemseleva nao wakem main wan for fulfillim olketa purpose bilong Hem. (Col. 1:17-20) Olketa Bible profesi join witim diswan. (Rev. 19:10)
10. Hao nao iumi savve showimaot iumi bilivim Jesus Christ nao King? [8, be-SP p. 277 par. 4] Iumi showimaot wanem iumi bilivim taem iumi markem waka for preach and mek disaepol olsem barava important samting long laef bilong iumi. (Matt. 6:19-34; 24:14; 28:19, 20) Iumi mas showimaot tu trufala love olsem Jesus and followim “niu komandment” wea John 13:34, 35 talem.
BIBLE READING EVRI WEEK
11. Waswe, Terah, dadi bilong Abraham hem man for worshipim olketa idol? (Josh. 24:2) Long firstaem Terah hem nating worshipim Jehovah God. Luk olsem hem worshipim datfala moon-god wea evriwan long Ur savve abaotem wea nem bilong hem Sin. For followim kastom bilong olketa Jew, maet Terah hem savve wakem olketa idol. [2, w04-SP 12/1 “Olketa Main Point From Buk Bilong Joshua”]
12. Waswe, Gideon fraet for duim wanem Jehovah askem hem for duim? Why nao iu ansa olsem? (Judg. 6:25-27) Wei wea Gideon no fraet showaot long Hebrews 11:32-38, wea garem nem bilong hem witim olketa wea ‘kamap olketa strongfala man long war.’ Bat Gideon showim fasin for no ova tumas and gudfala tingting long wei wea hem duim wanem Jehovah askem hem for duim. Gideon waka long naet taem pipol bae no lukim hem. And tu, Gideon barava careful. Hem tekem tenfala servant, maet for mekem samfala security gard taem hem and olketa narawan helpem hem for distroem datfala altar and holy post. [4, w00-SP 8/1 p. 17 par. 12]
13. Wanem nao iumi savve lanem from wei wea Gideon story long tribe bilong Ephraim? (Judg. 8:1-3) Hem stopem wanfala faet for kamap midolwan olketa tribe taem hem iusim kaen toktok wea man isi for acceptim and wea daonem feeling for kros. Maet olketa long tribe bilong Ephraim garem praod fasin and wei for tingse olketa nao important. Bat, datwan nating stopem Gideon for trae mekem peace kamap. Long distaem tu, maet samfala kros long iumi gogo hem mekem olketa heitim iumi. Iumi mas trae for luksavve long feeling bilong olketa, and trae for minim tingting bilong olketa. [5, w00-SP 8/15 p. 25 par. 3-4]
14. Wanem nao showaot long wei wea pipol bilong Gibeah les for showimaot welkam? (Judg. 19:14, 15) Wanfala Israelite taon no savve showimaot disfala fasin. Nogud fasin bilong pipol bilong Gibeah showaot long wei wea olketa les for showimaot welkam and diswan showaot moa klia taem hem gogo for evening. Olketa Christian kasem encouragement for “garem fasin for showimaot welkam.” (Rom. 12:13) [8, w05-SP 1/15 “Olketa Main Point From Buk Bilong Judges”]
15. From ‘evri man getius for duim samting wea stret long eye bilong hemseleva,’ waswe, diswan mekem evri samting olobaot? Nomoa, from Jehovah hem provaedem staka samting for leadim pipol bilong hem. Hem givim Law and olketa priest for teachim olketa for followim wei bilong hem. Hae priest savve iusim datfala Urim and Thummim for faendemaot tingting bilong God abaotem olketa important samting. (Ex. 28:30) Long evri taon tu olketa older man stap wea fit for givim gudfala kaonsel. Taem wanfala Israelite mekius long olketa samting hia and “duim samting wea stret long eye bilong hemseleva,” hem kasem gud samting. [8, w05-SP 1/15 “Olketa Main Point From Buk Bilong Judges”]