Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long April 25, 2005. Skul overseer bae conductim wanfala 30-minute review long information wea kamap insaed olketa assignment start long week bilong March 7 go kasem April 25, 2005. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul, pp. 36-7.]
OLKETA POINT KAONSEL
1. Taem iumi preparem tok, hao nao iumi savve iusim gud datfala information wea olketa markem, and why nao diswan hem important? [2, be-SP p. 234 par. 1-3, tufala box] For iusim gud datfala information wea olketa markem hem minim, full tok, olketa scripture, and main point, mas followim subject wea olketa markem. Taem iumi duim diswan hem showimaot iumi tinghae long program wea faithful wise slave arrangem for provaedem spiritual kaikai. (Matt. 24:45)
2. Haomas information wea olketa assignim long iumi nao iumi mas iusim long wanfala tok? [2, be-SP p. 234 par. 4–p. 235 par. 1] Iumi shud iusim information wea fitim nomoa taem wea olketa markem. Iusim nomoa olketa point wea mekem iumi kasem goal bilong tok bilong iumi. Iumi shud no mekem tok olsem wanfala review bilong staka information. Diswan savve spoelem gudfala wei for teach and wei for storyim go moa olketa important point.
3. Hao nao iumi savve iusim olketa kwestin mekem iumi encouragem pipol for story taem iumi duim field ministry? (Acts 8:30) [3, be-SP p. 236 par. 2-5] Plande Witness encouragem pipol for story thru long wei for chusim samfala topic wea pipol long datfala ples interest long hem and olketa savve askem kwestin olsem, “Waswe, enitaem iu tingim . . . ?” or “Wanem nao tingting bilong iu . . . ?” Wei wea iumi givim chance for pipol talemaot tingting bilong olketa mekem plande pipol willing for lisin long iumi.
4. Hao nao iumi savve iusim olketa kwestin for helpem olketa Bible student iusim ‘paoa for tingting stret?’ (Rom. 12:1) [5, be-SP p. 238 par. 2] Taem iumi storyim olketa main point, iumi savve askem olketa extra kwestin for helpem student no readim nomoa olketa ansa long paragraf. Iumi savve ask olsem: “Hao nao samting wea iumi storyim hem fitim disfala nara point wea iumi lanem? Why nao hem important? Diswan shud affectim laef bilong iumi long wanem wei?” Taem iumi askem olketa kwestin olsem winim wei for talem nomoa samting wea iumi bilivim, iumi helpem olketa student for iusim ‘paoa for tingting stret.’
5. Wanem nao goal bilong olketa kwestin wea stap long Romans 8:31, 32 and Isaiah 14:27? [7, be-SP p. 239 par. 1-2] Long olketa scripture hia Paul and Isaiah iusim olketa kwestin for showimaot wei wea tufala garem strong biliv. Olketa kwestin hia showimaot hao no eniwan savve denyim olketa point wea tufala storyim. Iumi savve iusim olketa kwestin olsem for strongim go moa story bilong iumi.
TOK NO. 1
6. Hao nao iumi savve ‘putim Christ olsem faondeson’ taem iumi duim waka for mek disaepol? (1 Cor. 3:11) [1, be-SP p. 278 par. 1-2] For ‘putim Christ olsem faondeson,’ iumi need for helpem pipol showimaot faith long ransom sakrifaes bilong Jesus olsem only samting wea mekem man kasem salvation. Olketa student mas lanem hao Jesus hem example for olketa and for ting long olketa Gospel olsem samting wea olketa need for followim long klos wei. (1 Pet. 2:21) Taem olketa wea iumi teachim mas disaedem samting iumi shud encouragem olketa for askem olketa seleva: ‘Wanem nao Jesus bae duim sapos hem kasem kaen samting olsem? Waswe, samting wea mi chus for duim hem bae showimaot mi tinghae long evri samting wea hem duim for mi?’ (John 14:15, 21)
7. From Jehovah hem givim finis full paoa for rul long Son bilong hem long 1914, why nao iumi gohed for prea for, “Mekem kingdom bilong iu kam”? (Matt. 6:9, 10) [2, be-SP p. 279 par. 4] Taem iumi prea for, “Mekem kingdom bilong iu kam,” hem minim iumi laekem Kingdom bilong God wea gohed rul distaem for barava fulfillim olketa profesi olsem Daniel 2:44 and Revelation 21:2-4. Iumi kasem komand for talemaot olketa blessing wea disfala Kingdom bilong God wea rul finis bae klosap for mekem kamap. (Matt. 24:14)
8. Why nao evri Christian shud interest for savve hao for read, and hao nao Jesus showimaot example saed long diswan? [5, w03-SP 3/15 p. 10 par. 5; p. 12 par. 2] From God provaedem Word bilong hem wea olketa raetem, hem expectim olketa worshiper bilong hem for fit for read and raet. Taem iumi readim and minim Bible and olketa Bible pablikeson hem bae moa isi for iumi followim kaonsel bilong God and for “iusim word bilong truth long stretfala wei.” (2 Tim. 2:15) Jesus garem education, from nomata hem 12 year nomoa, hem savve hao for story gud witim olketa man long temple wea garem education. (Luke 2:46, 47)
9. Hao nao example bilong Josiah and Jesus helpem olketa young wan for muv ahed long spiritual wei? [6, w03-SP 4/1 p. 8 par. 3-4; p. 10 par. 3] Young King Josiah hem askem olketa for readim Word bilong God long hem. Samting wea hem herem hem kasem heart bilong hem and muvim hem for servem Jehovah and for strongim go moa tru worship. (2 Chron. 34:14-21, 33) Jesus ting long service bilong hem for Jehovah no olsem wanfala goal nomoa, bat olsem wanfala assignment wea hem mas fulfillim. Hem kasem hapi and hem satisfae taem hem duim will bilong God. (John 4:34) For olketa young wan muv ahed long spiritual wei, stret samting nao mas muvim olketa, wea datwan kamaot from wei for savve gud long Creator.
10. Why nao iumi savve trustim God? (Prov. 3:5, 6) [7, w03-SP 11/1 p. 4 par. 6-7] Iumi savve trustim Jehovah God bikos hem holy and no savve kamap nogud or spoelem man. (Isa. 6:3) And tu, love bilong God hem affectim evri samting wea hem duim. (1 John 4:8) And hem nomoa barava minim iumi evribit. (Ps. 139:1, 6)
BIBLE READING EVRI WEEK
11. Why nao Hannah prea long Jehovah for “strongim king bilong hem” bat long datfala taem no eni king stap long Israel? (1 Sam. 2:10) Jehovah talemaot finis long Law Bilong Moses hao olketa Israelite bae garem wanfala king. (Deut. 17:14-18) Taem Jacob klosap for dae, hem talem disfala profesi: “Datfala iron stik [wea hem saen bilong wanfala king] bae no lusim Judah.” (Gen. 49:10) And tu, Jehovah sei olsem abaotem Sarah—wea hem laen bilong olketa Israelite: “Olketa king bae kam from hem.” (Gen. 17:16) So Hannah, hem prea abaotem king wea bae kamap long future. [1, w05-SP 3/15 “Word Bilong Jehovah Hem Laef—Olketa Main Point From Buk Bilong First Samuel”]
12. Wanem nao iumi lanem from wei wea Israel hem lus taem olketa faet nomata ark bilong covenant stap witim olketa? (1 Sam. 4:3, 4, 10) Wei for tingse olketa samting olsem garem paoa hem savve leadim man for kasem trabol. Nomata “datfala ark bilong covenant bilong Jehovah” hem holy samting, hem no garem paoa for protectim man. Iumi mas ‘protectim iumiseleva from olketa idol.’ (1 John 5:21) [1, w05 3/15 “Word Bilong Jehovah Hem Laef—Olketa Main Point From Buk Bilong First Samuel”; w02-SP 7/1 pp. 6-8]
13. Why nao 1 Chronicles 2:13-15 sei David nao mek-seven son bilong Jesse, bat long 1 Samuel 16:10, 11 hem sei hem mek-eit? Bible showimaot hao Jesse garem “eitfala son.” (1 Sam. 17:12) Luk olsem wanfala son dae bifor hem garem chance for marit and garem pikinini. From hem no garem pikinini, hem bae no garem eni raet insaed tribe and tu hem no important for hem stap insaed record bilong laen bilong Jesse. [5, w02-SP 9/15 p. 31]
14. Wanem “nogud spirit” nao spoelem Saul? (1 Sam. 16:14) Datfala nogud spirit wea mekem Saul no garem peace hem nao wei wea mind and heart bilong hem laekem nogud samting—feeling insaed hem for duim samting wea no stret. Taem Jehovah aotem holy spirit bilong hem, hem no protectim Saul nao and gogo olketa nogud fasin bilong hemseleva start for bossim hem. From God aotem holy spirit from hem and hem letem datkaen nogud spirit for stap, Bible kolem datwan “wanfala nogud spirit from Jehovah.” [5, w05-SP 3/15 “Word Bilong Jehovah Hem Laef—Olketa Main Point From Buk Bilong First Samuel”]
15. Waswe, samting wea datfala spirit wea sei hem nao “Samuel,” hem talem thru long datfala woman long Endor, hem kamap tru? (1 Sam. 28:16-19) Nomoa. Saul hem garekil nogud taem olketa faet witim olketa Philistine, bat olketa no killim hem dae, hemseleva suisaed. (1 Sam. 31:1-4) And hem no tru hao evri son bilong Saul bae dae witim hem, from son bilong hem Ish-bosheth hem nating dae long datfala taem. [8, w88 1/15 p. 3 par. 3-4]