Wei wea Kongregeson Buk Study Overseer Showim Interest Long Man Wanwan
1 Organization arrangem Kongregeson Buk Study long wei wea hem ‘savve helpem evriwan insaed grup for grow long spiritual wei. . . . Diswan showimaot loving-kaeness bilong Jehovah and hao hem kea for pipol bilong hem.’ (om-SP p. 75; Isa. 40:11) Buk study overseer garem important waka for givim help olsem for man wanwan.
2 Long Buk Study: From olketa buk study grup smol, buk study overseer hem fit for savve gud long olketa member insaed grup bilong hem. (Prov. 27:23) Plande taem olketa chance stap for kaban tugeta bifor and bihaen long study evri week. Insaed wanfala month, maet hem fit for story witim klosap evriwan insaed long datfala grup. Diswan helpem olketa member bilong datfala buk study feel free for story witim hem taem olketa kasem test or needim encouragement.—Isa. 32:2.
3 Buk study overseer trae for encouragem evriwan insaed grup for givim koment. Wanfala wei hem duim diswan hem for conductim study long kaen and isi wei. (1 Thess. 2:7, 8) Hem luk aotem olketa wei for mekem evriwan join insaed datfala study, and olketa young wan tu. Sapos samfala feel shame for ansa, hem maet givim help taem hem story seleva witim olketa and arrange fastaem witim olketa for readim wanfala scripture or for givim koment long wanfala paragraf. Or maet hem showim olketa hao for givim koment long toktok bilong olketa seleva.
4 Sapos assistant bilong buk study overseer hem wanfala ministerial servant, overseer savve arrange for hem conductim study wanfala taem evri tufala month. Diswan bae givim chance for overseer lukluk long datfala assistant and givim samfala idea for helpem hem. Hem nambawan arrangement for helpem olketa brata mekem wei bilong olketa for teach kamap moabeta!—Titus 1:9.
5 Long Field Ministry: Wanfala main responsibility bilong buk study overseer hem for lead insaed long preaching waka. (Num. 27:16, 17) Hem mekem olketa gudfala arrangement for grup witnessing and trae for helpem evriwan insaed grup for kasem hapi long ministry bilong olketa. (Eph. 4:11, 12) For duim diswan, wanfala goal bilong hem nao hem for waka witim each member long grup bilong hem insaed long ministry. Hem waka tugeta tu witim service overseer, for arrange for olketa wea laek for kamap moabeta long samfala part long ministry bilong olketa for kasem help from pablisa wea garem moa savve.
6 Olsem Wanfala Loving Shepherd: Buk study overseer hem interest long olketa wea living bilong olketa mekem olketa savve share long smol wei nomoa insaed preaching waka. Saed long olketa wea faendem hard tumas from olketa olo or olketa no savve lusim haos bikos long sik or eni nara reason, hem mek sure olketa savve long arrangement wea letem olketa for reportim 15 or 30 or 45 minute sapos olketa no savve reportim wanfala full hour insaed long month. (Kongregeson Service Komiti disaedem hu nao fit for insaed long diswan.) Hem interest tu long olketa insaed grup wea maet no active pablisa, and hem trae helpem olketa for waka moa witim kongregeson.—Luke 15:4-7.
7 Iumi tinghae tumas long loving interest wea olketa buk study overseer showim! Wei wea olketa interest long man wanwan helpem evriwan kasem wan mind long datfala faith . . . , and kasem full wei wea Christ showaot.”—Eph. 4:13.