Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long June 27, 2005. Skul overseer bae conductim wanfala 30-minute review long information wea kamap insaed olketa assignment start long week bilong May 2 go kasem June 27, 2005. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul, pp. 36-7.]
OLKETA POINT KAONSEL
1. Why nao wei for markem samting witim nara samting hem nambawan wei for teach? (Gen. 22:17; Ps. 1:3; Jas. 3:6) [1, be-SP p. 240 par. 2-4, box] Wei for markem samting witim nara samting hem needim tu-thri word nomoa bat hem mekem pipol garem klia piksa long mind. Sapos iumi iusim diswan long gudfala wei, hem savve kasem heart bilong olketa wea lisin long iumi and helpem olketa for rememberim wanem iumi talem, winim sapos iumi talem nomoa point.
2. Wea nao iumi savve faendem olketa example wea iumi savve iusim for teach long gudfala wei, bat wanem nao iumi mas careful long hem saed long diswan? [3, be-SP p. 242 par. 2-3] Word bilong God hem garem staka example bilong pipol wea laef bifor. Jesus story abaotem “waef bilong Lot” and “taem bilong Noah.” (Luke 17:32; Matt. 24:37-39) Taem iumi savve gud long Bible, iumi savve iusim olketa example hia. Sapos iumi chusim wanfala experience bilong distaem, iumi mas mek sure hem tru and hem fitim goal bilong iumi, and no storyim evri smol point wea no join witim goal bilong tok bilong iumi.
3. Wanem nao iumi need for tingim taem iumi chusim olketa tokpiksa wea bae muvim olketa? [5, be-SP p. 244 par. 1-2] Olketa tokpiksa shud fitim audience. Diswan minim iumi mas lukluk long living bilong pipol raonem iumi and barava tingim kastom bilong olketa wea lisin long iumi. (Mark 2:22; 4:2-9; John 10:1-5)
4. Why nao iumi shud iusim samting wea pipol lukim taem iumi teach, and hao nao Jehovah duim sem samting? [7, be-SP p. 247 par. 1-2, box] For mekem audience gohed for interest long samting iumi talem, iumi savve iusim samting wea olketa lukim. Man savve rememberim samting hem lukim winim sapos hem herem nomoa. Jehovah iusim olketa samting wea pipol lukim, olsem olketa star, haos bilong man wea wakem clay pot, botol-gourd plant, and tabernacle. (Gen. 15:5; Jer. 18:1-6; Jonah 4:6-11; Heb. 9:9, 23, 24)
5. Long field ministry, hao nao iumi savve iusim samting wea pipol lukim? [9, be-SP p. 248 par. 1–p. 249 par. 2] Iumi savve iusim piksa, map, chart wea showim taem, wei for kaontem olketa year wea stap insaed olketa pablikeson bilong iumi, and askem man for storyim wanem hem lukim. (Amos 7:7, 8; 8:1, 2) Iumi savve showim tu olketa video bilong iumi for teachim important truth long pipol.
ASSIGNMENT NO. 1
6. Wanem nao Word bilong God talem saed long wei for olketa pikinini kasem education? [1, w03-SP 3/15 p. 12 par. 2; p. 14 par. 3] Jesus hem kasem education, bikos taem hem 12 year nomoa, hem fit for story gud witim olketa full-grown savveman. (Luke 2:42, 46, 47) Hem lanem tu wanfala waka from dadi bilong hem Joseph, wea adoptim hem. Parents garem responsibility for trainim pikinini bilong olketa “long discipline and wei for stretem tingting wea kam from Jehovah,” for helpem olketa for kamap pipol wea “lovem savve.” (Eph. 6:4; Prov. 12:1)
7. Hao nao Jehovah showimaot interest long David taem hem young, and hao nao David showimaot interest long Jehovah? [2, w03-SP 4/15 p. 29 par. 4; p. 30 par. 3] Jehovah chusim David, last born son bilong Jesse, for kamap future king bilong Israel, from Hem luksavve hem fit. (1 Sam. 16:7) And David evritaem tingim wei wea hem fren witim Jehovah and depend long hem for leadim hem. (Ps. 25:4, 5)
8. Why nao Jehovah hapi long sakrifaes bilong Abel, and diswan mekem iumi sure long wanem samting? (Gen. 4:4) [3, w03-SP 5/1 p. 28 par. 4–p. 29 par. 1] Nomata hem maet luk olsem sakrifaes bilong Abel hem smol samting nomoa, Abel iusim best animal bilong hem. Datwan stand for best samting wea hem garem. Masbi Abel tingting gud abaotem wanem hem bae sakrifaesim, from diswan showimaot faith bilong hem. (Heb. 11:4) Diswan mekem iumi sure hao Jehovah lukim olketa “sakrifaes bilong praise” wea iumi givim long hem from faith and strongfala biliv long heart. (Heb. 13:15)
9. Wanem nao “discipline bilong Jehovah” wea Proverbs 3:11 sei iumi mas no rejectim? [6, w03-SP 10/1 p. 20 par. 2-4] Toktok hia no storyim eni discipline nomoa, bat hem story abaotem discipline wea followim olketa nambawan principle bilong God. Kaen discipline olsem garem staka difren part—kaonsel, instruction, training, repruv, wei for stretem samting, and panis tu. Iumi shud no rejectim diswan, from God lovem iumi dastawe hem teachim iumi, mekem iumi kamap moa strong, and helpem iumi. (Heb. 12:11)
10. Wanem nao mining bilong “wei for satisfae” wea stap long 1 Timothy 6:6-8? [8, w03-SP 6/1 p. 9 par. 1-2; p. 10 par. 1] Hem minim for satisfae long olketa samting wea man needim nomoa, nomata wanem living iumi garem, taem iumi depend long Jehovah and servem hem. Wei for satisfae mekem iumi putim service bilong God olsem fasfala samting long laef nomata iumi garem staka or lelebet material samting nomoa.
BIBLE READING EVRI WEEK
11. Wei wea Jonathan and David garem strongfala love hem piksarem wanem? (2 Sam. 1:26) [1, w89 1/1 p. 26 par. 13] Strongfala love wea Jonathan and David garem for each other hem olsem wan mind wea stap midolwan “nara sheep” and remnant bilong anointed sheep, wea olsem “wan sekson” anda long “wanfala shepherd nomoa,” Jesus. (John 10:16)
12. Wanem nao iumi lanem from taem wea David fastaem trae for tekem ark bilong covenant go long Jerusalem? (2 Sam. 6:2-9) (1) Wei for no followim instruction bilong God hem mekem man kasem bigfala trabol. (2) Nomata olketa wea fren gud witim Jehovah savve duim rong samting taem hard samting kamap. (3) Iumi shud evritaem torowem hevi bilong iumi long Jehovah and no blamem hem for olketa problem wea kamaot from wei wea iumi no followim olketa instruction bilong hem. [2, w05-SP 5/15 “Word Bilong Jehovah Hem Laef—Olketa Main Point From Buk Bilong Second Samuel”; w96-SP 4/1 p. 28 par. 5–p. 29 par. 1]
13. Bihaen David and Bath-sheba sin, why nao son bilong tufala dae, from Deuteronomy 24:15 and Ezekiel 18:20 sei wanfala son no need for dae from sin bilong dadi bilong hem? (2 Sam. 12:14; 22:31) Sapos olketa man nao judgem rong bilong David and Bath-sheba, tufala and son bilong tufala wea stap long bele yet bae dae. (Deut. 22:22) Wei wea son hem dae maet helpem David for barava luksavve hao Jehovah no hapi long sin wea hem duim. And tu, iumi no savve sapos datfala baby garem finis big sik. Bat iumi sure Jehovah deal witim datwan long wei wea followim justice. [3, w05-SP 5/15 “Kwestin From Reader”; w86 3/15 p. 31]
14. Hao nao iumi savve samting wea Ziba talem abaotem Mephibosheth hem laea nomoa? (2 Sam. 16:1-4) Iumi savve hao hambol man olsem Mephibosheth wea garem fasin for tinghae, hard tumas for garem plan olsem for aftarem hae position. For sure hem savve gud long faithful fasin wea dadi bilong hem, Jonathan, hem showimaot. Nomata Jonathan hem son bilong King Saul, hem hambol for luksavve long David olsem man wea Jehovah chusim for king bilong Israel. (1 Sam. 20:12-17) From Jonathan hem loyal fren bilong David, hard for hem teachim young son bilong hem for laek aftarem paoa olsem king. [5, w02-SP 2/15 p. 15 ftn.]
15. Why nao samting wea Mephibosheth duim long Ziba hem nambawan example for iumi? (2 Sam. 19:24-30) Taem David luksavve hao Ziba hem tok laea abaotem Mephibosheth, hem no panisim hem evribit. Nomata olsem, Mephibosheth no againstim wanem David disaedem. Hem ting strong long olketa samting wea moa important, hem nao wei wea king bilong Israel hem kam bak sef. Mephibosheth showimaot nambawan example saed long wei for gohed strong nomata hem cripple, narawan tok laea abaotem hem, and hem feel nogud. [6, w02-SP 2/15 p. 15 par. 12]