Wanem for Talem Abaotem Olketa Magasin

Wastaoa June 15

“Staka long iumi bae waka for full laef bilong iumi. Samfala ting hem gud samting bat olketa narawan no ting olsem. Wanem nao tingting bilong iu? [Letem hem ansa. Then readim Ecclesiastes 2:24.] Disfala magasin showim hao Bible savve helpem iumi for garem balance tingting abaotem waka. Hem storyim tu hao for deal witim hevi wea kamap from waka.”

Awake! June 22

“Long tingting bilong iu, waswe, community bilong iumi bae kamap moabeta sapos evriwan followim disfala toktok? [Readim Ephesians 4:28. Then letem hem ansa.] Disfala magasin storyim hao kost bilong olketa samting long stoa savve hae tumas bikos long wei wea pipol steal from stoa. Hem showim tu hao klosap nao wei for steal long stoa and evri nara criminal fasin bae finis.”

Wastaoa July 1

“Iumi evriwan savve long pipol wea luk olsem olketa win long laef bat nomata olsem olketa feel samting hem miss from laef bilong olketa. Long tingting bilong iu, wanem nao olketa luk aotem? [Letem hem ansa. Then readim Matthew 5:3.] Disfala magasin storyim wanfala important samting wea savve mekem man garem peace long mind—wei for satisfaem spiritual need bilong iumi.”

Awake! July 8

“From distaem staka luk aotem waka, for faendem waka hem kamap bigfala problem. Disfala magasin storyim faevfala point wea savve helpem man for faendem waka. [Showim hem olketa subheding wea moa blak long article “Five Keys to Finding a Job.”] Hem givim tu gudfala advaes long hao for no lusim wanfala waka wea iumi garem finis.” Readim Proverbs 22:29, wea toktok bilong hem stap long page 10.