Wei for Witness wea No Needim Toktok
1 Creation bilong Jehovah wea no savve toktok givim staka information abaotem olketa fasin bilong God. (Ps. 19:1-3; Rom. 1:20) Olsem tu, gudfala wei bilong iumi, Christian fasin wea iumi garem, and lukluk bilong iumi savve givim witness wea no needim iumi for toktok. (1 Pet. 2:12; 3:1-4) Thru long fasin bilong iumi, each wan shud barava laek for ‘mekem teaching bilong God, Man for sevem iumi, luk naes tumas long evri samting.’—Titus 2:10.
2 Hao nao olketa man wea no perfect fit for mekem teaching bilong Bible luk naes? Olketa fit for duim diswan only thru long direction from Word bilong God and paoa bilong holy spirit. (Ps. 119:105; 143:10) Word bilong God “hem laef and garem paoa for duim samting and hem sharp winim eni tu-saed sword.” (Heb. 4:12) Hem savve go deep insaed long iumi and mekem iumi fit for garem niufala fasin. (Col. 3:9, 10) Holy spirit mekem grow insaed long iumi olketa nambawan fasin olsem kaenfala fasin, kwaet fasin, and fasin for bossim seleva. (Gal. 5:22, 23) Waswe, iumi letem toktok bilong God and spirit bilong hem affectim laef bilong iumi?—Eph. 4:30; 1 Thess. 2:13.
3 Nara Pipol Luksavve: Taem iumi showimaot olketa mark bilong Jehovah long living bilong iumi and waka hard for showimaot olketa fasin bilong hem, nara pipol bae luksavve. Olsem example, tingim experience bilong wanfala man wea olketa wakfren bilong hem savve spoelem hem from hem short. Wanfala sista wea olketa waka long sem office hem evritaem kaen long hem and respectim hem. Diswan muvim datfala man for askem datfala sista why nao hem difren. Sista hia explainim hao hem followim olketa Bible principle. Hem sharem datfala nambawan hope bilong Kingdom tu witim hem. Datfala man start for studyim Bible and gogo hem baptaes. Taem hem go bak long homples bilong hem, olketa relative bilong hem barava tinghae long gudfala fasin bilong hem, and samfala long olketa acceptim truth tu.
4 Long wakples, long skul, or taem iumi deal witim olketa relative and neiba, gudfala fasin bilong iumi, witim wei for givim witness savve mekem nara pipol givim glory long God.—Matt. 5:16.