Waswe, Iu Disaed Strong for Attendim Distrik Convention?

Olketa Christian distaem luksavve hao olketa convention bilong olketa hem taem for kasem spiritual encouragement and instruction from Word bilong God. Olketa ting long olketa bigfala hipap hia olsem barava important samting for helpem olketa “standap evribit witim biliv wea strong long full will bilong God.” (Colossians 4:12) Dastawe, iumi Olketa Jehovah’s Witness barava sapotim olketa hipap hia witim full heart, and waka hard for attendim “Obeyim God” Distrik Convention bilong disfala year. Samfala mas winim olketa hardfala samting for kam long convention and olketa need for garem faith. Ting raonem olketa example hia and hao iumi savve followim faith bilong olketa long wei for attendim olketa distrik convention.

Long Papua New Guinea, wanfala grup pipol wea interest nomoa, laekem tumas for attendim wanfala distrik convention long Port Moresby. Olketa go askem wanfala man long vilij wea garem trak wea pablik savve haerem and askem haomas nao kost for hem tekem olketa go long convention. From total selen wea hem askem hem winim wanem olketa garem, olketa mekem arrangement for fixim kitchen bilong datfala man. Datwan mekem olketa fit for kasem distrik convention and kasem gud samting from full program.

Wanfala hasband and waef long Malawi wea age bilong tufala winim 60 year, witim son bilong tufala and waef bilong hem and baby bilong son bilong tufala, olketa raedem bicycle for 80 kilometer for attendim convention. Olketa lusim vilij long six klok long morning and arrive long convention long 9 klok long naet.

Long Mozambique, wanfala grup travel for thrifala day long bicycle for kasem convention. Wanfala naet olketa sleep long bush, and herem olketa lion singaot klosap nomoa. Nomata olketa torowe firewood go for ples wea olketa lion singaot kam, olketa animal hia stap raon nomoa go kasem morning. Narafala Witness wea go long sem convention hem meetim wanfala lion long road. Hem standap kwaet go kasem taem datfala lion hem go. Olketa Witness hia barava hapi for talem long convention hao olketa ‘sev from mouth bilong lion.’—2 Timothy 4:17.

Wanfala hasband and waef long Philippines travel for tufala day for kasem convention. Tufala wakabaot for 70 kilometer, and tufala karem tufala smol pikinini thru long bush wea staka worm wea olketa kolem leech hem stap and thru long olketa river wea flood from cyclone. Nomata olsem tufala barava no laek for missim convention.

Tufala woman long Zaire wakabaot winim 500 kilometer for kasem convention bilong olketa, wea minim tufala wakabaot followim road for 14-fala day. Long Zaire tu, wanfala olo man wea 70 year hem raedem bicycle for 260 kilometer for kasem convention. Nomata ples hem farawe and hard, datwan no stopem hem. Important samting hem for no missim convention. Evriwan tingim hao olketa kasem gud samting from hard waka bilong olketa.

Ndjaukua Ulimba hem 73 year, and hem travel for samting olsem 450 kilometer. Hem wakabaot for 16-fala day. Disfala man hem go farawe olsem for attendim wanfala convention bilong Olketa Jehovah’s Witness wea savve kamap wantaem evri year. Bihaen long convention, hem barava hapi and strong long spiritual wei, and wakabaot for nara 16-fala day for kasem bak hom. Waswe, hem kasem eni gud samting? Barava nao! Ndjaukua Ulimba duim diswan evri year. Sapos health bilong hem fitim, bae hem followim datfala sem gogo moa disfala year for go long convention.

Olketa Witness long Thursday Island luksavve long need for keepim spiritual saed bilong olketa strong, so olketa disaed for go long wanfala convention long mainland long Australia, and for kasem long there hem 1,300 kilometer. From olketa no garem inaf selen for baem pasis for go long aeroplane, olketa lukaotem nara wei for kasem convention.

First samting wea olketa brata duim, olketa baem wanfala old boat wea no garem engine, propeller, olketa sail, and anchor. Olketa lukluk raon long olketa nogud boat wea stap and gogo olketa faendem wanfala wea garem big faev-cylinder diesel engine and wanfala gearbox. Olketa baem datwan, and olketa hapi for faendem olketa sail, anchor, and staka nara part. Bat, olketa no faendem yet eni shaft or propeller.

Olketa askem wanfala man wea ownim wanfala slipway, wea hem ples for olketa boat, sapos hem savve lukluk raon long datfala ples. Datfala man mekfani and talem hao sapos hem faendem wanfala shaft olketa Witness savve tekem. Man hia barava sapraes taem olketa brata hia faendem wanfala shaft. Long wanfala morning bihaen datwan taem olketa brata go preaching from haos tu haos, olketa kikim wanfala samting insaed long grass. Hem wanfala propeller wea barava fitim datfala boat bilong olketa!

Taem datfala boat hem redi, full kongregeson, wea 25 nao insaed, redi for datfala gogo wea bae tekem sevenfala day. Taem olketa lusim ples, wanfala kastom man “cursim” olketa. Wanfala naet boat hia pas long wanfala reef. Olketa brata mekius long datfala chance for kasem staka fish. Long morning, taem hae tide hem kam, boat start for float moa bat sea hem full insaed and olketa mas gohed belaotem wata go kasem Australia.

Taem olketa arrive long Townsville, Australia, wanfala rich man wea ownim wanfala slipway meetim olketa. Hem readim long niuspepa hao olketa barava waka hard for kam long convention, and hem laek for helpem olketa. Hem strong for sei hem nao mas fixim datfala boat nomata olketa no savve peim hem or helpem hem from olketa bae stap long convention. Nomata kost for duim datfala waka hem savve 500 pounds ($7,390.00), datfala man askem nomoa, 40 pounds ($591.20).

Waswe, iu plan finis for attendim 2005 “Obeyim God” Distrik Convention? Maet iu no need for go long olketa hardfala gogo olsem olketa faithful wan hia. Bat nomata iu feisim samfala hard samting, mifala encouragem iu for no missim convention.

Olketa preparem finis wanfala nambawan program. Sapos iu enjoyim wei for hipap tugeta and interest for lane hao for kasem really peace, samting wea bae happen long future, or hao for kamap moabeta for duim will bilong God, mifala promis hao bae iu kasem staka gud samting from convention. Jehovah encouragem iumi for waka hard for attend and promisim iumi olsem: “Testim mi, . . . for faendemaot sapos mi bae openem olketa gate bilong heven and barava kapsaetem wanfala blessing long iufala go kasem taem wea no eniwan wantem eni samting moa.” (Malachi 3:10) Waswe, iu acceptim invitation bilong Jehovah for attendim Distrik Convention long disfala year?