Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long October 31, 2005. Skul overseer bae conductim wanfala 30-minute review long information wea kamap insaed olketa assignment start long week bilong September 5 go kasem October 31, 2005. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul, pp. 36-7.]
OLKETA POINT KAONSEL
1. Hao nao iumi savve mek sure wei wea iumi teachim Word bilong God hem kasem heart bilong pipol? (Matt. 13:19) [1, be-SP p. 258 par. 1-2, box] Iumi need for trae kasem heart bilong pipol, wea hem nao feeling and samting wea savve muvim pipol, wea bae helpem olketa for fren gud witim God. Wei for luksavve long samting wea affectim finis heart bilong olketa bae helpem iumi for duim diswan. Then iumi shud trae for strongim olketa gudfala fasin, olsem love and wei for fraet long God. Hem barava important for kasem heart long wei olsem, mekem iumi savve helpem narawan lane for mekem Jehovah hapi.
2. Wanem nao savve helpem iumi for encouragem samwan for storyim feeling bilong hem, bat wanem nao iumi mas careful long hem? [2, be-SP p. 259 par. 1-2] Kaen kwestin olsem “Hao nao feeling bilong iu abaotem . . . ?” or “Wanem nao mekem iu bilivim hao . . . ?” savve mekem student tingting raonem samting and bae helpem teacher for savve wanem nao insaed heart bilong student. Teacher mas careful taem hem askem olketa kwestin, nogud student hem feel nogud from wei wea hem ask tumas. Teacher wea garem fasin for luksavve hem barava lisin gud, mekem hem savve long feeling wea no showaot long samting wea student talem, and mekem hem savve chusim information from Bible wea savve muvim datfala student. (Prov. 16:23)
3. Why nao hem important for mekhae long olketa nambawan fasin bilong Jehovah taem iumi teach? [3, be-SP p. 260 par. 1] For mekhae long olketa nambawan fasin bilong Jehovah, olsem gudfala fasin, mercy, and kaeness wea man no fit for kasem, bae muvim heart bilong student and helpem hem for garem bigfala love for God. Taem iumi iusim lelebet taem for muvim olketa wea lisin long iumi for ting raonem olketa fasin bilong Jehovah, bae diswan helpem olketa for fren gud witim God and bae strongim wei wea olketa fren witim hem. From God wakem iumi long image bilong hem, kaen story wea kam from heart olsem savve muvim man. (Gen. 1:27)
4. Hao nao iumi savve helpem olketa Bible student bilong iumi for luksavve long samfala samting olketa need for kamap moabeta long hem? [5, be-SP p. 260 par. 4–p. 261 par. 1] Iumi shud mek sure olketa minim hao fasin bilong olketa savve affectim wei wea olketa fren witim God. Fasin bilong olketa savve mekem Creator hapi or sorre. (Ps. 78:40-42; Prov. 27:11) Iumi savve helpem olketa Bible student bilong iumi for luksavve long olketa blessing wea kamaot from wei for obeyim olketa law bilong God, and for ting long wei for obey, no olsem wanfala hevi, bat for showimaot love long Jehovah. (Ps. 19:11; Isa. 48:17)
5. Wanem nao iumi savve duim for helpem olketa Bible student or olketa wea lisin long iumi for ting raonem wanem nao muvim olketa for duim samting? [7, be-SP p. 262 par. 1-2] Taem iumi teach, iumi shud encouragem olketa student or olketa wea lisin long iumi for askem olketa seleva olsem: ‘Why nao mi laek for duim diswan? Waswe, samting wea muvim mi for duim diswan, hem wei wea mi tinghae long evri samting wea Jehovah duim finis for mi? Hem tru, maet mi obeyim olketa mark bilong God, bat hao nao mi feel abaotem olketa?’ (Ps. 37:4) Iumi shud encouragem olketa Bible student or olketa wea lisin long iumi for prea long Jehovah for strong and faith for fraet long nambawan nem bilong hem. (Ps. 86:11)
ASSIGNMENT NO. 1
6. Wanem nao hem minim for “barava luk aotem” Jehovah, and hao nao iumi savve showimaot iumi duim datwan? (Heb. 11:6) [1, w03 8/15 p. 25 par. 2; p. 26 par. 1-2; p. 27 par. 2] For “barava luk aotem,” hem minim for barava aftarem and for “gohed for ask olowe,” for samting wea fitim will bilong God. (Luke 11:8; 1 John 5:14) Iumi savve showimaot hao iumi barava laekem Jehovah for hapi long iumi taem iumi duim eni theocratic waka wea iumi fit for duim witim full heart and strong bilong iumi. Insaed long diswan, hem wei for prepare gud for olketa meeting, trae hard for mekem ministry bilong iumi kamap moabeta, and for mekem iumiseleva free for duim full-taem service.
7. Wanem nao “datfala plan bilong healthy toktok,” and hao nao olketa elder savve showimaot olketa followim datwan olowe? (2 Tim. 1:13, 14) [3, w03 1/1 p. 29 par. 3–p. 30 par. 1] Long 1 Timothy 6:3, Paul sei datfala “healthy toktok” hem toktok “bilong Lord bilong iumi Jesus Christ.” From toktok bilong Jesus barava wan mind witim ‘evri Scripture wea kam from God and wea gud for teachim man,’ “datfala plan bilong healthy toktok” hem minim tu evri samting wea Bible teachim. (2 Tim. 3:16, 17) Olketa elder shud iusim Word bilong God and no olketa idea bilong man or idea bilong olketa seleva taem olketa teach long kongregeson. (2 Tim. 4:2) Disfala sem principle hem fitim preaching wea olketa duim long field ministry tu. (2 Tim. 4:5)
BIBLE READING EVRI WEEK
8. Waswe, 2 Kings 13:21, hem sapotim wei for mekhae long olketa old samting? Disfala story hem abaotem wanfala mirakol wea happen long olketa bon bilong wanfala profet bilong God. From Elisha hem dae finis and “nating savve long eni samting” long taem wea mirakol hia happen, paoa bilong Jehovah for duim mirakol nao mekem diswan kamap, thru long holy spirit wea hem active force bilong hem. (Eccl. 9:5, 10) Hem interesting tu hao Bible nating talem hao pipol mekhae long olketa bon bilong Elisha. [1, w05 8/1 “Word Bilong Jehovah Hem Laef—Olketa Main Point From Buk bilong Second Kings”]
9. Waswe, Hezekiah hem mekem agreement witim Egypt? (2 Ki. 18:19-21, 25) Nomoa. Rabshakeh hem laea taem hem sei Hezekiah depend long Egypt, and hem laea tu taem hem sei “Jehovah nao sendem” hem for kam. King Hezekiah hem wanfala faithful king wea depend evribit long Jehovah. [2, w05 8/1 “Word Bilong Jehovah Hem Laef—Olketa Main Point From Buk bilong Second Kings”]
10. Nomata olketa history buk bilong Assyria no talem hao Jehovah barava win long faet againstim Sennacharib, wanem samting long information hia nao hem interesting long iu? (2 Ki. 19:35, 36) Olketa raeting bilong Sennacherib saed long history long Oriental Institute Prism and Taylor Prism sei: “Disfala Jew, Hezekiah, hem nating willing for stap anda long mi, mi raonem 46-fala strong taon bilong hem wea garem wall, and staka smol vilij’ wea stap klosap long olketa, and mi tekova (long olketa) . . . Mi mekem Jerusalem, ples bilong king, kamap prison wea hem stap insaed, olsem bird wea stap insaed net.” Sennacherib sei wei wea paoa bilong hem mekem “pipol barava fraet” hem mekem Hezekiah fraet and no savve duim eniting nao. Nomata olsem, hem nating sei hem kasholem Hezekiah or tekova long Jerusalem, olsem hao hem talem abaotem olketa “strongfala taon” and olketa “smolfala vilij.” Diswan showimaot hao story bilong Bible abaotem strong army bilong Sennacherib wea finis evribit hem tru. [3, w88 2/15 p. 28 par. 2]
11. Hu nao dadi bilong Shealtiel? (1 Chron. 3:16-18) First Chronicles 3:17 and Matthew 1:12, showimaot Jeconiah (King Jehoiachin) hem dadi bilong Shealtiel. Bat Luke wea raetem wanfala Gospel hem sei Shealtiel hem “son bilong Neri.” (Luke 3:27) Luk olsem Neri givim dota bilong hem for Shealtiel maritim. Luke fit for sei Shealtiel hem son bilong Neri bikos olketa Hebrew savve sei wanfala son in-law, hem son bilong olketa, especially taem olketa raetem famili laen. Olsem tu, Luke sei Joseph, son bilong Heli, bat Heli hem dadi bilong Mary, waef bilong Joseph. (Luke 3:23) [5, w92 7/15 pp. 5-6]
12. Long taem bilong King Saul, hao nao olketa Reubenite, Gadite, and haf tribe bilong Manasseh showimaot nambawan example for evri servant bilong God distaem? (1 Chron. 5:18-22) Long wei wea fitim samting Jehovah promisim long Abraham, laen dadi bilong olketa, olketa barava strong for muvim territory bilong olketa go winim land bilong Gilead. (Gen. 15:18) Nomata diswan minim olketa Israelite hia mas faetem olketa Hagrite, olketa willing nomoa for duim datwan nomata olketa no staka. Olketa 44,760 nomoa. Bat olketa tekem 100,000 pipol olsem prisoner long disfala faet. Diswan hem no full army bilong Hagrite, bikos Bible sei ‘staka nao dae.’ Diswan showimaot klia, olketa Reubenite, olketa Gadite, and haf tribe bilong Manasseh bae hard for win seleva, and wei wea olketa win hem no from paoa bilong olketa. Olketa depend long Jehovah God for helpem olketa.