Showimaot Iu Barava Kea for Pipol Thru Long Wei for Kaen
1 Wanfala woman wea les long Olketa Jehovah’s Witness tingim firstaem wea hem meetim wanfala Witness. Hem sei: “Mi forgetim nao samting wea mifala story abaotem, bat mi rememberim hao hem kaen, showimaot wei for fren, and hem hambol. Diswan muvim mi for laek fren witim hem.” Toktok hia mekhae long wei wea hem important for iumi showimaot iumi kea for pipol wea iumi preach long olketa.—Phil. 2:4.
2 Love Hem Kaen: Wanfala wei iumi savve showimaot love for nara pipol hem nao for kaen. (1 Cor. 13:4) Man wea kaen hem tingim nara pipol and lukaotem eni wei for helpem olketa. Hem tru preaching waka showimaot kaenfala fasin. Bat, for showimaot iumi kea hem no minim iumi just preach nomoa long pipol. Toktok wea iumi talem and hao iumi talem datwan, wei wea iumi kaen, garem gudfala fasin, lisin gud, and tu, lukluk long feis bilong iumi taem iumi story long haosholder, bae showimaot iumi barava kea for olketa.—Matt. 8:2, 3.
3 Wei for lovem and tingim nara pipol bae muvim iumi tu for givim help wea olketa needim. Taem wanfala pioneer brata preach from haos tu haos, wanfala olo widow woman no laek for lisin taem hem savve hao brata hia hem wanfala Witness. Hem sei hem klae long ladder long kitchen for fixim laet taem brata kam long haos bilong hem. Brata sei long hem: “Datwan hem danger samting for iu duim seleva.” Woman hia invaetem brata for go insaed long haos, and brata hia fixim datfala laet then hem go. Taem son bilong disfala woman visit for savve hao nao mami bilong hem, mami storyim long son samting wea brata duim for hem. Son hia barava tinghae tumas long diswan, so hem lukaotem datfala brata for talem thankiu bilong hem. Diswan openem wei for story gud, and from datwan, son hia willing for studyim Bible.
4 Taem iumi kaen, iumi showimaot love wea Jehovah garem for pipol and iumi mekem message abaotem Kingdom hem luk naes. So iumi evritaem laek for ‘showimaot iumi olketa minister bilong God . . . thru long wei for kaen.’—2 Cor. 6:4, 6.