Showimaot Interest—Long Wei for Luksavve
1 Jehovah God and Christ Jesus barava luksavve long need bilong pipol and tufala helpem olketa. (2 Chron. 16:9; Mark 6:34) Taem iumi luksavve long interest and tingting bilong pipol wea iumi meetim long ministry, maet bae iumi fit for changem story bilong iumi abaotem gud nius for fitim haosholder.
2 Luksavve Long Evri Samting: Jesus hem man for luksavve. (Mark 12:41-43; Luke 19:1-6) Iumi savve duim sem samting taem iumi kasem haos bilong haosholder and lukim olketa samting bilong church wea olketa iusim for decoratem haos, raeting wea stap long olketa trak, or olketa toy wea stap aotsaed long haos, and long wei olsem, iumi fit for mekem story bilong iumi hem samting wea savve barava helpem datfala man.
3 Feis bilong man and samting wea hem duim savve showimaot feeling bilong hem. (Prov. 15:13) Maet samwan wea hem lovem hem dae, or samfala barava nogud samting happen long hem wea mekem hem needim comfort. Maet hem bae hapi for herem samfala scripture wea iumi readim wea barava fitim samting wea kasem hem. (Prov. 16:24) Waswe, haosholder hem kwiktaem for go eni ples, or hem holem baby wea krae? Sapos olsem, maet hem moabeta for arrange witim hem for kam bak narafala taem. Taem iumi showimaot kaenfala fasin and “minim feeling bilong narawan,” iumi savve muvim datfala man for lisin taem iumi go bak.—1 Pet. 3:8.
4 Changem Story Bilong Iu: Aposol Paul hem lukim hao Athens hem taon wea garem wanfala altar wea olketa dedicatem “Long God wea Man No Savve Long Hem.” Datfala samting hem affectim hao hem talemaot gud nius, from hem sei: “Samting wea iufala worshipim bat no savve long hem, diswan nao mi talem long iufala.” Teknik wea Paul iusim muvim samfala for lisin long message bilong kingdom and for kamap olketa wea biliv.—Acts 17:23, 34.
5 Long sem wei tu, wei wea iumi luksavve long interest bilong man savve helpem iumi for changem story bilong iumi. Askem olketa kwestin wea savve mekem haosholder talem tingting bilong hem. Tingim olketa scripture wea bae mekem interest bilong hem kamap moa big. (Prov. 20:5) Wei wea iumi luksavve and showimaot interest long nara pipol bae helpem iumi for sharem gud nius long gudfala wei.