Education wea Mekem Man Kasem Laef
1 Hem hapi samting for lukim eye bilong pipol shaen taem olketa minim truth wea stap insaed Word bilong God! For sharem long nara pipol savve bilong God and plan bilong hem for olketa man, hem barava mekem man satisfae. Datkaen education savve mekem man kasem laef olowe.—John 17:3.
2 Why Hem Nambawan: Distaem pipol savve kasem education long plande difren kaen wei and abaotem staka difren subject. (Eccl. 12:12) Bat savve olsem nating winim “olketa nambawan samting bilong God.” (Acts 2:11) Waswe, education long world help for mekem olketa man fren witim Creator and for savve long plan bilong hem? Waswe, hem helpem pipol for savve wanem nao happen taem iumi dae or why staka pipol tumas safa? Waswe, hem mekem pipol garem hope? Waswe, hem help for mekem famili stap gud? Nomoa. Education wea God provaedem nomoa savve helpem iumi for kasem olketa stretfala ansa abaotem olketa barava important kwestin long laef.
3 Education wea kam from God provaedem samting wea disfala world barava no garem—wei for man mekem gudfala fasin bilong hem kamap moabeta. Taem man hem acceptim and followim olketa teaching from Bible, diswan bae aotem from heart bilong hem wei for heitim difren kala skin, wei wea man ting tribe bilong hem gud winim olketa narawan, and wei for mekhae long kantri. (Heb. 4:12) Hem muvim pipol for lusim evri difren kaen raf fasin and for ‘werem olsem kaleko datfala niu fasin.’ (Col. 3:9-11; Mic. 4:1-3) And nara samting moa, education from God hem strongim plande million pipol for lusim olketa nogud fasin wea olketa garem for barava longfala taem wea no mekem God hapi.—1 Cor. 6:9-11.
4 Why Hem Barava Important Distaem: Barava Nambawan Teacher bilong iumi helpem iumi for luksavve long taem wea iumi stap insaed distaem. Olketa judgment wea hem talem thru long profesi garem information wea fitim distaem, and iumi mas talemaot datwan long evri ples long earth. (Rev. 14:6, 7) Christ hem rul long heven distaem, false religion evriwea long world klosap for finis, and Kingdom bilong God hem redi for distroem evri gavman long earth. (Dan. 2:44; Rev. 11:15; 17:16) Dastawe, hem barava important for pipol luksavve long King bilong God wea rul distaem, go aot from Bigfala Babylon, and singaot long nem bilong Jehovah long faith. (Ps. 2:11, 12; Rom. 10:13; Rev. 18:4) Iumi laek share evribit for givim long nara pipol education wea mekem man kasem laef.