Kasem Strong for Duim Return Visit

¹ Waswe, iu enjoyim wei for duim olketa return visit? Plande pablisa enjoyim datwan. Maet iu fraet lelebet firstaem, especially taem iu go bak long olketa haosholder wea showimaot lelebet interest nomoa long firstaem wea iu meetim olketa. Bat taem iu ‘kasem strong from God bilong iumi for no fraet for talemaot gud nius’ long wei for duim return visit, maet iu sapraes for lukim hao disfala waka hem isi tumas and savve mekem man satisfae. (1 Thess. 2:2) Hao nao hem olsem?

² Wanfala reason hem bikos return visit hem difren from firstaem wea iu meetim man. Iumi duim return visit long samwan wea iumi savve finis long hem, no long wanfala stranger, and plande taem hem moa isi for story witim samwan wea iumi savve winim wei for story long wanfala stranger. And nambawan samting wea kamaot from disfala waka, hem wei wea olketa return visit savve lead go long olketa Bible study wea muv ahed.

³ Taem iumi preach from haos tu haos, plande taem iumi meetim pipol wea no interest taem iumi visitim olketa bifor. So, why nao iumi go bak evritaem? Iumi luksavve hao living bilong pipol savve change and samwan wea maet no interest or wea againstim iumi lastaem maet showimaot interest next taem iumi kam. Dastawe, iumi prepare gud and prea for blessing bilong Jehovah mekem samting iumi talem bae mekem man interest.

⁴ Sapos long haos-tu-haos waka iumi willing for preach long pipol wea no interest lastaem, iumi shud barava willing for go bak long eniwan wea showimaot nomata lelebet interest long Kingdom message.—Acts 10:34, 35.

⁵ Plande long iumi insaed long truth distaem bikos wanfala pablisa hem patient for duim return visit long iumi. Sapos iu wanfala long olketa hia, maet iu askem iuseleva, ‘Hao nao datfala pablisa ting long mi long firstaem? Waswe, mi kwiktaem acceptim Kingdom message long firstaem wea mi herem datwan? Waswe, maet hem luk olsem mi no interest?’ Iumi shud hapi bikos datfala pablisa tingim hao iumi fit for hem duim return visit long iumi and from hem “kasem strong from God,” hem visitim iumi moa, and gohed for teachim truth long iumi. Waswe long olketa man wea interest lelebet long firstaem, bat bihaen luk olsem olketa trae for haed from iumi? Hem important for garem stretfala tingting, olsem experience long daon showimaot.

⁶ Taem tufala pablisa duim street witnessing long wanfala early morning, tufala meetim wanfala young woman witim pikinini. Woman hia acceptim wanfala magasin and askem tufala sista for kam long haos bilong hem long next Sunday. Tufala kam long barava taem, bat haosholder talem tufala hem no garem taem for story. Bat hem promis hem bae stap long next week. Tufala sista no sure sapos hem bae stap long datfala taem, bat datfala woman weitim tufala taem tufala kam bak. Olketa startim study witim hem, and woman hia muv ahed gud tumas. Bihaen shortfala taem, hem start for attendim olketa meeting evritaem and share long field service. Distaem hem baptaes finis.

⁷ Putim Faondeson Long Firstaem Iu Meetim Man: Plande taem iumi putim faondeson for gudfala return visit long firstaem iumi meetim man. Lisin gud long wanem haosholder talem. Wanem nao iu lanem from datwan? Waswe, hem interest long religion? Hem wari long living? Hem interest long science? history? environment? Long end bilong story bilong iutufala, iu savve askem wanfala kwestin wea bae mekem hem tingting, and iu savve promis for storyim ansa from Bible taem iu kam bak.

⁸ Olsem example, sapos haosholder interest long promis bilong Bible abaotem paradaes earth, hem fitim for iu story moa long diswan. Bifor iu lusim hem, maet iu ask olsem: “Hao nao iumi savve sure God bae fulfillim disfala promis?” Then talem moa: “Maet mi savve kam bak moa taem full famili stap long haos, and then mi savve showim iu ansa insaed Bible for disfala kwestin.”

⁹ Sapos haosholder no interest long eni topic wea iu storyim, iu savve askem wanfala kwestin insaed long Hao for Startim and Go Ahed for Story Abaotem Bible and iusim datwan for startim story bilong iu next taem.

¹⁰ Raetem and Keepim Stretfala Record: Haos-tu-haos record pepa bilong iu mas stret and garem evri information. Stretawe bihaen iu lusim haosholder, raetem daon nem and hao nao for faendem haos bilong hem. Raetem samting abaotem disfala man. Raetem subject wea iutufala storyim, olketa scripture wea iu readim, eni literature hem tekem, and kwestin wea iu bae ansarem taem iu go bak. Raetem day and taem wea iu firstaem meetim man and wanem taem iu talem bae iu go bak. From record pepa bilong iu garem evri information, no lusim! Keepim long sef ples mekem iu savve lukluk long hem bihaen. Gohed for tingim disfala man and wanem iutufala bae storyim next taem.

¹¹ Savve Long Olketa Goal Bilong Iu: First samting, duim best bilong iu for mekem haosholder no fraet long wei for iu story gud olsem fren. Showimaot iu interest long hem, bat no poke-nose tumas. Next samting, remindim hem abaotem kwestin wea iu askem lastaem. Lisin gud long tingting bilong hem, and talem thankiu for samting hem talem. Then, showim hao samting wea Bible talem savve helpem man. Sapos hem fitim, showim hem wanfala point wea join witim story bilong iufala insaed long datfala buk Savvy wea Lead Go long Laef Olawe. Remember, main goal long return visit hem for trae for startim Bible study.

¹² Wei wea Savvy buk tok stret hem muvim plande long iumi for “kasem strong” long olketa Bible study for encouragem olketa student for attendim olketa meeting and kaban witim organization bilong Jehovah. Long bifor, iumi savve weit go kasem taem samfala study for longtaem lelebet bifor iumi invaetem olketa for kaban witim iumi. Distaem, plande student attendim olketa meeting stretawe bihaen olketa start for study, and from diswan, olketa muv ahed kwiktaem.

¹³ Wanfala hasband and waef witness long wanfala man wea waka witim tufala. Taem hem showimaot interest long truth, tufala invaetem hem for studyim Bible witim Savvy buk. Long semtaem, tufala talem hem need for attendim olketa meeting, wea hem bae kasem ansa long plande kwestin bilong hem. Disfala man willing for acceptim invitation for study, and tu, hem study tufala taem evri week and hem start for attendim olketa meeting evritaem long Kingdom Hall.

¹⁴ Iusim Brochure Wanem Nao God Mas Kasem From Iumi?: Disfala brochure hem gud tumas for startim Bible study witim pipol wea fraet long God nomata olketa skul gud or nomoa. Hem garem gudfala study program wea storyim olketa main teaching bilong Bible. Disfala pablikeson hem barava gudfala tul for helpem pipol kasem savve bilong God. Hem explainim truth long barava klia and simpol wei mekem iumi evriwan fit for iusim for teachim pipol wanem God laekem olketa for duim. Plande pablisa garem privilege for conductim Bible study long disfala brochure.

¹⁵ Samfala pipol wea tingse olketa no garem taem for studyim Savvy buk maet willing for garem shortfala study insaed long Kasem brochure. Olketa bae hapi tumas long wanem olketa lanem! Insaed long tu-thri page nomoa, olketa bae faendem ansa long olketa kwestin wea pipol ting raonem for plande handred year: Hu nao God? Hu nao Devil? Wanem nao plan bilong God for earth? Wanem nao Kingdom bilong God? Hao nao iu savve faendem tru religion? Nomata disfala brochure talemaot truth long simpol toktok, message bilong hem garem bigfala paoa. Hem storyim olketa main point wea olketa elder bae reviewim witim olketa wea laek for baptaes and hem olsem firstfala tul wea lead go long study wea moa deep insaed long Savvy buk.

¹⁶ For offerim study long return visit, iu savve sei olsem: “Waswe, iu savve hao insaed tu-thri minute nomoa iu savve kasem ansa for wanfala important Bible kwestin?” Then, askem wanfala kwestin wea stap long start bilong wanfala leson long disfala brochure. Olsem example, sapos iu story witim wanfala olo, maet iu sei: “Iumi savve Jesus healim pipol bifor. Bat long future wanem nao bae Jesus duim for olketa sikman? olketa olo? olketa wea dae finis?” Olketa ansa stap long leson 5. Man wea interest long religion maet barava interest long disfala kwestin: “Waswe, God herem evri prea?” Ansa hem stap long leson 7. Olketa famili member bae want for savve: “Wanem nao God talem dadi, mami, and pikinini for duim?” Olketa bae faendaot taem olketa studyim leson 8. Samfala nara kwestin hem olsem: “Waswe, olketa wea dae finis savve spoelem pipol wea laef yet?” wea leson 11 hem explainim; “Why nao plande religion stap wea sei olketa Christian?” wea leson 13 storyim; and “Wanem nao iu mas duim for kamap fren bilong God?” wea leson 16 hem storyim.

¹⁷ Helpem Olketa wea Story Long Difren Languis: Wanfala pablisa wea story long English hem startim study witim wanfala man wea story long Vietnamese languis, and witim waef bilong hem, wea story long Thai languis. Olketa iusim pablikeson and Bible long English, Vietnamese, and Thai languis long study. Nomata diswan hard firstaem, disfala pablisa raet olsem: “Disfala hasband and waef muv ahed kwiktaem long spiritual wei. Tufala lukim need for start attendim olketa meeting witim tufala pikinini bilong tufala, and olketa readim Bible tugeta olsem famili evri naet. Dota bilong tufala wea six year hem garem wanfala Bible study.”

¹⁸ Taem iumi study witim pipol wea story long difren languis, iumi mas tok slow, klia, and iusim simpol toktok. Bat, remember, iumi mas showimaot respect long pipol wea story long difren languis. Iumi mas no deal witim olketa olsem smol pikinini.

¹⁹ Iusim gud olketa naesfala piksa insaed long Kasem brochure. From wanfala piksa talem staka samting, olketa piksa insaed disfala brochure bae talemaot plande samting long haosholder. Invaetem hem for readim olketa scripture long Bible bilong hemseleva. Sapos iu savve conductim study long taem wea wanfala famili member wea savve long Pidgin hem stap for transleitim, datwan bae gud tumas.—Lukim Our Kingdom Ministry, March 1984, page 8; Kingdom Ministry Belong You-me, October 1990, page 5-6.

²⁰ Duim Return Visit Kwiktaem: Hao long nao iu shud weit bifor iu duim return visit? Samfala pablisa go bak bihaen wan or tufala day. Samfala go bak long sem day! Waswe, datwan hem kwiktaem tumas? Klosap evritaem, hem gud nomoa long olketa haosholder. Plande taem pablisa wea duim return visit nao need for mekem grow gudfala tingting, and no fraet. Tingim olketa experience long daon.

²¹ Wanday wanfala pablisa wea 13 year hem waka from haos tu haos and hem lukim tufala woman wakabaot tugeta. From hem tingim encouragement wea iumi kasem for preach long pipol long eni ples wea iumi meetim olketa, hem go story long tufala woman hia long street. Tufala interest long Kingdom message and tufala evriwan tekem Savvy buk. Young brata hia kasem address bilong tufala, go bak bihaen long tufala day, and startim Bible study witim tufala evriwan.

²² Wanfala sista savve mekem arrangement for go bak wan week bihaen. Bat tu-thri day bihaen firstaem wea hem meetim man, hem savve givim haosholder wanfala magasin wea storyim point wea olketa tok abaotem bifor. Hem savve talem haosholder: “Mi lukim disfala article and tingse iu bae laek readim. Bae mi no stap for story distaem, bat mi bae kam bak long Wednesday aftanun olsem iumi planim finis. Waswe, datfala taem still fitim iu?”

²³ Taem samwan showimaot interest long truth, iumi savve sure samfala bae againstim hem. Wei wea iumi go bak kwiktaem bihaen firstaem wea iumi meetim hem bae strongim hem for feisim eni hevi wea hem kasem from olketa relative, klos fren, and nara pipol.

²⁴ Mekem Grow Interest Bilong Pipol Long Pablik Ples: Plande long iumi enjoyim wei for preach long street, long pablik transport, long ples wea olketa stoa stap, and long samfala ples moa. For join witim wei for offerim literature, iumi need for mekem interest grow. For duim datwan, iumi mas trae for kasem nem, address, and sapos hem fitim, telephone namba bilong evri man wea iumi meetim wea interest. Hem no hard for duim diswan. Taem iu klosap finis for story, aotem notebuk bilong iu and ask olsem: “Waswe, iumi savve gohed moa long disfala story narafala taem?” Or iu savve sei olsem: “Mi laekem iu for readim wanfala article wea mi sure iu bae interest long hem. Waswe, mi savve tekem kam long haos or office bilong iu?” Wanfala brata ask olsem nomoa: “Wanem nao telephone namba bilong iu?” Hem talem hao insaed long thrifala month, klosap evri man wea hem askem hapi for givim telephone namba bilong olketa.

²⁵ Iusim Telephone for Faendem Pipol and Mekem Interest Grow: Wanfala pioneer sista iusim telephone for story witim pipol wea stap long olketa building wea garem hae security. Hem duim olketa return visit tu long sem wei. Long firstaem hem story witim man, hem sei olsem: “Mi savve iu no savve long mi. Mi trae hard for story witim pipol long area bilong iu for sharem wanfala point from Bible. Sapos iu garem lelebet taem, mi laek readim promis wea stap long . . . ” Bihaen hem readim scripture, hem sei olsem: “Bae hem naes tumas sapos iumi lukim datwan, iaman? Mi hapi for readim datwan long iu. Sapos iu tu enjoyim, mi laek for ring kam bak moa and storyim narafala scripture.”

²⁶ Taem hem ring go bak, hem remindim haosholder abaotem samting wea tufala storyim lastaem and sei hem laek for read from Bible abaotem living wea bae kamap taem evri nogud fasin hem finis. Then for shortfala taem, tufala story abaotem Bible. Long plande taem wea hem story olsem long telephone, 35 pipol nao askem hem for kam long haos bilong olketa and hem startim sevenfala Bible study!

²⁷ Go Bak Long Pipol wea Interest Long Bisnis Area: Moa samting hem insaed long wei for duim stoa-tu-stoa witnessing winim wei for offerim magasin nomoa. Plande stoakeeper barava interest long truth, and iumi mas mekem datfala interest grow. Samfala taem, maet hem fitim for story abaotem Bible or duim study long datfala bisnis ples. Or maet iu savve meet witim disfala man wea interest long taem wea hem lunch or long narataem wea fitim.

²⁸ Wanfala traveling overseer hem story witim man wea ownim smol stoa and sei hem laek for showim hem hao for duim wanfala Bible study. Taem man hia askem hao long nao diswan, traveling overseer sei 15 minute nomoa. So, stoakeeper hangem wanfala saen long door wea sei: “Bae mi kam bak bihaen 20 minute,” tekem kam tufala chair, and tufala story tugeta long first faevfala paragraf insaed Savvy buk. From disfala man wea garem honest heart hem barava tinghae long samting wea hem lanem, hem attendim Pablik Meeting and Wastaoa Study long Sunday and agree for gohed long study long week bihaen.

²⁹ For offerim study long bisnis ples, maet iu sei olsem: “Bae hem tek 15 minute nomoa for mi showim Bible study program bilong mifala long iu. Sapos hem olraet, mi hapi for showim hao nao mifala duim.” Then, followim taem wea iu talem finis. Sapos hem no fitim for story longfala taem long ples bilong bisnis, maet hem moabeta for visitim stoakeeper long haos bilong hem.

³⁰ Go Bak Nomata Iu No Offerim Eni Literature: Nomata iumi offerim literature or nomoa, hem fitim for iumi duim return visit long evri man wea showimaot nomata smolfala interest. Bat, sapos hem klia hao haosholder no really interest long Kingdom message, hem gud for go faendem narawan moa.

³¹ Long haos-tu-haos waka, wanfala sista meetim wanfala woman wea story gud tumas bat hem strong for no acceptim olketa magasin. Pablisa hem raet olsem: “For samfala day mi tingting abaotem hem and disaed mi want for story long hem moa.” Gogo, sista hem prea, kasem strong, and noknok long door bilong datfala woman. Hem hapi tumas taem haosholder invaetem hem kam insaed. Hem startim Bible study witim hem, and study gohed moa long next day. Gogo, haosholder kam insaed long truth.

³² Plan Firstaem for Duim Plande Samting: Hem gud for iusim samfala taem each week for duim olketa return visit. Iu savve duim plande samting sapos iu plan gud. Arrange for duim olketa return visit long sem area wea iu bae duim haos tu haos. Taem iufala iusim wanfala trak, grup mas smol mekem each wan garem full chance for duim olketa return visit. Mas talem draeva firstaem wea nao olketa return visit stap mekem hem no westem taem for draev olobaot.

³³ Olketa wea win for duim olketa return visit and for startim Bible study sei hem important for showimaot iu really interest long pipol and gohed for tingim olketa bihaen iu visitim olketa. Hem important tu for garem wanfala interesting subject from Bible for story abaotem and for redyim faondeson for return visit bifor iu lusim man. And tu, hem important for go bak kwiktaem long man wea interest. Mas tingim evritaem goal for startim Bible study.

³⁴ Wanfala important fasin for win for duim return visit waka hem fasin for strong and no fraet. Hao nao iu savve kasem diswan? Aposol Paul ansa taem hem sei iumi mas “kasem strong” for talemaot gud nius long pipol “thru long God bilong iumi.” (1 Thess. 2:2) Sapos iu need for kamap moabeta long diswan, prea long Jehovah for help. Then, for join witim wanem iu prea abaotem, duim return visit long evri man wea interest. Iumi sure Jehovah bae blessim hard waka bilong iu!

[Box long page 3]

Hao for Win for Duim Olketa Return Visit

◼ Showimaot really interest long pipol.

◼ Chusim interesting subject from Bible for story abaotem.

◼ Redyim faondeson for each return visit.

◼ Gohed for tingim datfala man bihaen iu lusim hem.

◼ Go bak bihaen wan or tufala day for buildimap interest.

◼ Rememberim goal bilong iu for startim Bible study.

◼ Prea for kasem strong for disfala waka.