Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long April 24, 2006. Skul overseer bae conductim wanfala 30-minute review long information wea kamap insaed olketa assignment start long week bilong March 6 go kasem April 24, 2006. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Taem iumi teach, why nao iumi shud stop lelebet taem idea hem change, bat wanem nao maet stopem iumi for duim datwan? [2, be-SP p. 98 par. 2-3] Wei for stop lelebet savve givim audience chance for ting raonem samting iu talem, for followim idea, and for luksavve iumi bae storyim difren samting. Taem iumi stop lelebet, hem strongim olketa main point long audience, givim chance for information muvim olketa, and bae helpem olketa for rememberim olketa main point hia. Samting wea mekem samfala speaker hariap go long nextfala idea and no stop lelebet hem wei for trae talem tumas information.
2. Why nao hem important for stop lelebet taem iumi witness long nara pipol? [3, be-SP p. 99 par. 5–p. 100 par. 4] Wei for stop lelebet savve mekem story bilong iumi and ministry bilong iumi kamap moabeta. Hem savve givim chance for haosholder talem tingting bilong hem, wea datwan bae encouragem hem for tingting raonem samting iutufala storyim. Wei wea iumi stop lelebet long olketa taem wea fitim, savve mekem hem storyim wanem nao long heart bilong hem, wea bae mekem iumi fit for helpem hem. (Prov. 20:5)
3. Why nao stretfala wei for strongim mining hem important taem iumi givim tok, and hao nao iumi savve duim datwan long gudfala wei? [4, be-SP p. 101 par. 1-5, box] Taem iumi strongim olketa main word and toktok long stretfala wei, iumi keepim interest bilong audience taem iumi gohed for encouragem and muvim olketa. Iumi savve strongim olketa word long wei for tok big, talem samting witim feeling wea moa strong, wei for story slow and klia, stop for lelebet taem, iusim olketa akson and changem feis, and changem saond bilong voice. For strongim mining long stretfala wei, iumi mas minim gud datfala information and barava wantem olketa wea lisin for rememberim and followim datwan. (Neh. 8:8)
4. Taem iumi read long pablik, hao nao iumi savve mek sure iumi strongim olketa main idea? [6, be-SP p. 105 par. 1-6] Iumi mas savve gud long olketa main idea bilong full information bilong iumi firstaem. Diswan bae helpem iumi for savve wanem point for strongim. Taem iumi readim wanfala pablikeson long wanfala Bible study or long meeting, iumi shud strongim olketa ansa wea join witim olketa kwestin, and wea join witim olketa subheding.
5. Why nao wei for tok big fitim hem important taem iumi teach, and wanem nao savve helpem iumi for savve sapos toktok bilong iumi hem big fitim? [7, be-SP pp. 107-8] Sapos nara pipol no isi for herem iumi, mind bilong olketa maet wakabaot and olketa no herem important samting wea iumi story abaotem. So maet iumi fail for muvim audience for duim samting wea olketa herem. Best wei for savve sapos toktok bilong iumi hem laod fitim hem for lukluk long audience. Sapos iu lukim samfala long audience wea luk olsem olketa no herem iu gud, iumi need for tok big moa. Wei for tingim haomas pipol, hu nao insaed audience, and noise wea savve disturb bae affectim hao big nao toktok bilong iumi.
TOK NO. 1
6. Long wanem wei nao laef bilong olketa Christian distaem hem klosap semsem witim Esther and Mordecai, and hao nao iumi savve followim example bilong tufala? [1, bsi06-SP p. 11 par. 17] Olketa Christian distaem klosap semsem witim Esther and Mordecai, long wei wea olketa stap anda long “olketa paoa wea moa hae,” long world wea no followim God and olketa traem best for followim law bilong kantri, and peim bak “olketa samting bilong Caesar long Caesar, bat olketa samting bilong God long God.” (Rom. 13:1; Luke 20:25; Esther 1:1; 2:5, 7, 8, 21-23) Nomata olsem, wei wea Mordecai no obeyim komand bilong king for baodaon long Haman, datfala man from Agag, showimaot hao wei wea olketa Christian obeyim gavman shud fitim will bilong God. (Esther 3:1-4; 5:9) Olketa Christian savve lukaotem tu wei for stretem samting followim law sapos need kamap. (Esther 4:6-8; Acts 25:11)
7. Wanem nao Solomon storyim taem hem sei, “evri samting hem iusles nomoa and hard waka for aftarem wind”? (Eccl. 2:11) [3, w04-SP 10/15 p. 4 par. 3-4] Long datfala story bilong Solomon, hem storyim wei wea man iusim full laef bilong hem for aftarem hapitaem and for hipimap olketa material samting bilong disfala world. Solomon hem buildim olketa haos and garem olketa garden flaoa, frut tree, olketa servant, animal, property, and riches. Hem barava interest tu long olketa spesol art. Nomata olsem, olketa samting hia no savve helpem hem for olowe and no mekem hem barava feel satisfae. (Eccl. 2:1-10) Hem lukim hao samting wea bae mekem man feel barava satisfae olowe hem wei for aftarem olketa spiritual samting. (Eccl. 12:13)
8. Hao nao iumi savve mekem grow love bilong iumi for God? (Mark 12:30) [5, w04-SP 3/1 pp. 19-21] Iumi savve mekem love bilong iumi for God kamap moa big long wei for mekem savve bilong iumi abaotem hem and plan bilong hem kamap moa big thru long wei for studyim gud Word bilong hem, Bible. Iumi savve ting raonem tu olketa samting wea hem duim and mining bilong olketa samting wea iumi lanem. (Ps. 77:6, 11, 12) Wei for ting bak long olketa gud samting wea iumi experiencem taem iumi servem Jehovah and gud samting wea iumi kasem from iumi duim olketa samting followim wei wea hem markem, savve strongim tu love bilong iumi for hem. (Prov. 3:5, 6)
9. Hao nao olketa spiritual samting hem helpem man winim wei for lovem olketa material samting? [6, w04 10/15 pp. 5-7] Wei for aftarem spiritual standard hem mekem man hapi for olowe and kasem olketa gud samting, bat wei for lovem olketa material samting hem mekem man satisfae for lelebet taem nomoa and hem lead go long dae. (Prov. 11:4; Matt. 5:3; 2 Cor. 4:18) Wei for lovem material samting savve pullim pipol for lukaotem wei for kamap rich, garem position, and kasem paoa long wei wea no honest, bat spiritual standard hem encouragem man for givim samting winim wei for kasem samting. (Isa. 48:18; 1 Tim. 6:9, 10)
10. Wanem nao savve helpem iumi for no letem nara samting disturbim iumi taem iumi lisin long olketa assembly and convention? [7, be-SP pp. 15-16] Wanfala important samting hem for barava rest gud long naet mekem iumi fit for lisin gud. Keepim theme bilong datfala day strong long mind bilong iumi, ting raonem title bilong each part long program, and trae for tingim wanem bae kamap long datfala part. Wei for raetem note savve helpem iumi for followim gud wanem tok hem abaotem and hem keepim tingting bilong iumi long program.
BIBLE READING EVRI WEEK
11. Why nao Haman garem wanfala kava ovarem feis bilong hem? (Esther 7:8) Haman no kavarem feis bilong hemseleva from hem shame or feel nogud. Luk olsem, olketa bigman long haos bilong king nao kavarem feis bilong hem, maet for showim bigfala shame or trabol. Maet diswan nao first samting wea olketa duim taem olketa killim hem dae. [1, w86 3/15 p. 25]
12. Wanem kaen spirit nao affectim tingting bilong Eliphaz? (Job 4:15, 16) [2, w05-SP 9/15 p. 26 par. 2] Nogud toktok wea Eliphaz talem showimaot hao datfala spirit hem no wanfala long olketa raeteous angel bilong God. (Job 4:17, 18) Wanfala wicked spirit nao affectim Eliphaz. Toktok bilong hem showimaot tingting wea no followim God. Dastawe, Jehovah repruvim Eliphaz and tufala fren bilong hem for wei wea tufala laea! (Job 42:7)
13. Waswe, toktok bilong Job long Job 7:9, 10 and Job 10:21 showimaot hem no biliv long resurrection? Nomoa. Long olketa verse hia Job storyim samting wea hem feisim long datfala taem. Maet diswan hem minim hao sapos Job dae, no eniwan long datfala taem bae lukim hem moa. Long tingting bilong olketa, hem bae no kam bak go kasem taem wea God markem. Maet samting wea Job minim tu hem wei wea man no savve resurrectim hemseleva from Sheol. Wanem Job 14:13-15 talem hem klia hao Job hem garem hope long wanfala resurrection wea bae kamap long future. [3, w06-SP 4/1 “Word Bilong Jehovah Hem Laef—Olketa Main Point From Buk Bilong Job”]
14. Wanem nao maet mining bilong toktok bilong Job, taem hem sei: “Mi ranawe witim skin bilong teeth bilong mi”? (Job 19:20) Taem iumi tingim olketa samting wea olketa scientist faendemaot taem olketa iusim microscope no longtaem go nomoa, luk olsem no eni need stap for trae explainim samting wea Job talem. (it-2 p. 977) Taem Job talem hao hem ranawe witim skin bilong samting wea luk olsem no garem skin, maet hem minim nao hem no tekem eniting witim hem taem hem ranawe. [5, w06-SP 4/1 “Word Bilong Jehovah Hem Laef—Olketa Main Point From Buk Bilong Job”]
15. Wanem nao Job minim taem hem sei: “Bae mi no lusim faithful fasin bilong mi,” and wanem nao iumi lanem from diswan? (Job 27:5) No eniwan savve tekem awe faithful fasin bilong Job bikos faithful fasin hem depend long love bilong man seleva for God. So iumi shud mekem love bilong iumi for Jehovah kamap moa strong mekem iumi keepim faithful fasin bilong iumi. [6, w06-SP 4/1 “Word Bilong Jehovah Hem Laef—Olketa Main Point From Buk Bilong Job”]