Waswe, Iu Traem Finis Disfala Idea?

Sapos iu studyim Bible witim eniwan distaem, iu savve askem datfala student sapos eni fren bilong hem, relative, or eniwan wea hem savve, bae interest for lanem wanem nao Bible hem teachim. Plande taem, bae student talem iu nem bilong samfala wea laek for study. Taem iu visitim olketa hia for askem sapos olketa laek for studyim Bible, iu savve sei olsem: “[Nem bilong student] hem enjoyim wei for studyim Bible, and hem tingse iu tu maet laek for kasem gud samting from free Bible study program bilong mifala.” Then for shortfala taem, showim hao for duim study long Kasem brochure.

Sapos wanfala student bilong iu hem muv ahed gud long study, maet iu savve encouragem hem for storyim Bible study arrangement bilong iumi long olketa fren and famili bilong hem wea maet interest for study. Hem savve invaetem olketa for kam join long study bilong iutufala. Or sapos datwan no fitim, hem savve mekem arrangement for iu meetim olketa for showim hao for duim study. Taem iu duim olsem datwan bae encouragem student for sharem savve bilong hem abaotem Bible witim olketa narawan.

Olketa wea iu duim return visit long olketa tu maet talem iu samwan wea laek for study, nomata olketa seleva no acceptim Bible study yet. Taem iu offerim Kasem brochure long olketa, iu savve ask olsem, “Waswe, iu savve long eniwan wea bae laekem wanfala copy bilong disfala brochure?”

From iumi savve hao end hem klosap tumas, iumi laek duim evri samting wea iumi fit for duim for helpem pipol herem and acceptim gud nius. Waswe, iu traem finis disfala idea?