Showimaot Interest—Long Wei for Kaen
1 “Jehovah hem kaen.” (Ps. 145:8) Nomata hem Sovereign bilong Universe, hem kaen, hem tingim narawan, and hem showimaot respect taem hem deal witim olketa man wea no perfect. (Gen. 13:14; 19:18-21, 29) Wei for followim example bilong God bilong iumi wea kaen, savve mekem iumi storyim gud nius long wei wea hem here naes. (Col. 4:6) Diswan hem minim moa samting winim wei for story gud long man witim respect nomoa.
2 Long Haos tu Haos: Waswe sapos iumi visitim wanfala man long taem wea no fitim or hem barava busy tumas for story witim iumi? Hem gud for luksavve long diswan and story for shortfala taem nomoa, or askem hem sapos iumi savve kam bak for lukim hem long narataem. Iumi no forcem pipol for tekem literature sapos olketa les. Wei for tingim olketa narawan bae muvim iumi tu for showimaot respect for olketa samting wea pipol ownim. Olsem example, iumi klinim leg bilong iumi bifor iumi go insaed long haos and no tekem flaoa long area bilong olketa, and tu, iumi teachim olketa pikinini bilong iumi for duim sem samting. Sapos no eniwan stap long haos and iumi laek for leavim literature, iumi shud mek sure iumi putim long ples wea olketa nara pipol bae no lukim. Tru nao, kaenfala fasin bae muvim iumi for duim sem samting wea iumi laekem olketa narawan for duim for iumi.—Luke 6:31.
3 Long Street Witnessing: Taem iumi duim street witnessing, iumi savve showimaot respect long wei for no blokem road bilong pipol for wakabaot and no hipap front long door bilong olketa stoa. Iumi need for luksavve sapos man hem busy or nomoa, and for story nomoa witim olketa wea isisi wakabaot and no long olketa wea hariap for go samwea. Samfala taem maet iumi need for tok big from ples hem noise. Nomata olsem, iumi duim diswan long wei wea showimaot respect and no for mekem nara pipol luk kam long iumi. (Matt. 12:19) Taem iumi kaen, tingim narawan, and showimaot respect long olketa difren wei hia, iumi followim example bilong Jehovah, God bilong iumi.