Waswe, Iu Kaikai Gud Long Spiritual Wei?
1 Plande pipol sei hao ‘samting wea iumi kaikaim savve affectim iumi.’ Tru tumas, wei wea body bilong iumi strong and healthy hem depend nao long samting iumi kaikaim. So wei wea iumi kaikai long spiritual wei bae affectim iumi long gud or nogud wei tu, from Jesus hem sei: “Man mas laef, no from bred nomoa, bat from evri toktok wea kamaot from mouth bilong Jehovah.” (Matt. 4:4) Sapos olsem, waswe, iu kaikai gud long spiritual wei? Waswe, iu chusim nomoa samting wea iu laek kaikaim? Waswe, iu kaikai kwiktaem nomoa? Or waswe, iu hapi for markem taem for enjoyim olketa spiritual kaikai wea balance evritaem?
2 Tingting Gud Abaotem Samting wea Iu Kaikaim: Jehovah provaedem “kaikai long barava taem” and “wanfala feast bilong olketa nambawan kaikai,” thru long “faithful and wise slave.” (Matt. 24:45; Isa. 25:6) Iumi mas kaikai gud long spiritual wei, mekem iumi kasem gud samting from olketa nambawan samting hia.
3 Maet hem gud for iu askem iuseleva olsem: ‘Waswe, mi readim text and koment bilong each day? Waswe, mi readim and ting raonem Bible evriday? Waswe, mi prepare for olketa meeting bilong kongregeson long wei for studyim datfala information firstaem? Waswe, mi readim finis olketa niu pablikeson?’
4 Jesus promis olsem: “Hapi nao olketa wea luksavve long spiritual need bilong olketa . . . Hapi nao olketa wea laekem tumas raeteous fasin, from olketa bae satisfae.” (Matt. 5:3, 6) So kaikai gud long spiritual wei long wei for fulimap mind and heart bilong iu witim savve abaotem God.