Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long June 26, 2006. Skul overseer bae conductim wanfala 30-minute review long information wea kamap insaed olketa assignment start long week bilong May 1 go kasem June 26, 2006. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Wanem nao hem minim for changem voice, and why nao hem important? [May 1, be-SP p. 111, olketa box] Wei for changem voice hem for changem laod, fast, and for apim or daonem voice bilong iumi. Diswan hem wanfala important samting, from hem muvim feeling and hem muvim olketa wea lisin for duim samting. Wei for changem voice bae helpem olketa wea lisin long iumi for kasem barava mining bilong subject wea iumi storyim.
2. Hao nao maet iumi changem fast bilong iumi taem iumi givim wanfala tok? [May 8, be-SP p. 112 par. 3–p. 113 par. 1, box] Fast bilong iumi shud depend long wanem iumi talem. Dastawe, for changem fast bilong iumi hem no for iumi tok moa fast or for tok moa slow followim wanfala set wei nomoa. For example, plande taem hem moabeta for tok moa fast taem iumi storyim olketa point wea no important tumas or for storyim hapi samting. Bat long narasaed, iumi shud tok moa slow taem iumi storyim olketa bigfala pruv, and olketa main point.
3. Hao nao iumi savve showimaot iumi barava interest long subject wea iumi storyim long tok bilong iumi, and why nao diswan hem important? [May 22, be-SP p. 115 par. 1–p. 116 par. 2, olketa box] Wei for showimaot barava interest hem savve kamap no long taem wea iumi preparem nomoa datfala information, bat heart bilong iumi tu mas insaed diswan, wea minim iumi need for showimaot feeling long tok bilong iumi. (Ezra 7:10) Taem iumi biliv strong hao information bilong iumi hem gud and hem bae helpem olketa wea lisin, iumi bae hapi abaotem samting wea iumi bae talem. Diswan hem important bikos sapos iumi barava showimaot interest, datwan bae helpem audience bilong iumi for interest and maet muvim olketa for duim samting tu.
4. Why nao hem important for showimaot feeling taem iumi teachim olketa narawan, and wanem nao savve helpem iumi for duim diswan? [June 5, be-SP p. 118 par. 2–p. 119 par. 5] Wei for showimaot feeling bae mekem toktok bilong iumi savve here naes tumas and hem important bikos hem savve affectim laef and kasem heart bilong olketa wea lisin long iumi. Sapos iumi feel sorre long pipol, diswan bae helpem iumi for showimaot feeling olsem Jesus, and for really laek for helpem olketa. (Mark 1:40, 41; Luke 8:48)
5. Explainim why nao hem important for iusim olketa akson and lukluk bilong feis taem iumi story. (Matt. 12:48, 49) [June 19, be-SP p. 121, olketa box] Hem important for iumi minim hao olketa idea, feeling, and tingting hem no long wei for iusim voice nomoa, bat thru long olketa akson and lukluk bilong feis tu. Plande taem iumi iusim eye and mouth and wei for muvim hed for strongim toktok bilong iumi saed long feeling and samting wea iumi talemaot. Wei for no iusim olketa akson and lukluk long feis long gudfala wei, maet mekem pipol tingse datfala speaker hem no interest long samting wea hem storyim.
TOK NO. 1
6. Hao nao buk bilong Job mekhae long Jehovah and olketa raeteous mark bilong hem saed long living? [May 1, bsi06-SP p. 13 par. 39, 41] Datfala buk bilong Job hem storyim Jehovah olsem Olmaeti 31 taem, wea kamap staka taem winim olketa nara buk bilong Bible. Jehovah kasem praise evritaem for wei wea hem stap for olowe, garem hae position, wei wea hem showimaot wisdom, paoa, justice, loving-kaeness, and mercy. (Job 10:12; 36:26; 37:23) Hem strongim hao wei for vindicatem Jehovah hem moa important winim salvation bilong man. (Job 33:12) Buk hia hem againstim wei for lovem tumas material samting, worshipim idol, adultery, wei for mekhae long seleva, no showimaot justice, wei for favorim narawan, for no honest, and laea, wea evri samting hia lead go long wei for God no appruvim iumi. (Job 31:5, 9, 13, 17, 24-28)
7. Wanem nao pruvim buk bilong Psalms hem tru evribit? [May 15, bsi06-SP p. 16 par. 10-p. 17 par. 11] Bihaen hem resurrect, Jesus talem olketa disaepol bilong hem hao evri samting wea olketa raetem abaotem hem insaed buk bilong Psalms bae fulfill. (Luke 24:44) Hem showim hao buk bilong Psalms hem wanfala buk bilong olketa profesi. And tu, buk bilong Psalms agree evribit witim olketa nara scripture and olketa wea raetem olketa Christian Greek Scripture iusim toktok long buk bilong Psalms plande taem. (Acts 13:33; Rom. 3:13)
8. Long Proverbs 13:16, wanem nao disfala wei for wise hem minim? [May 22, w04-SP 7/15 p. 28 par. 3-4] Disfala wei for wise hem join witim savve wea man kasem taem hem lukluk long Bible and ting raonem evri samting. Man no kasem diswan long wei for followim tingting bilong narawan or for followim nomoa samting wea hem tingse hem stret. Man wea wise bae talem and duim samting long wisefala wei, wea difren from krangge man wea iusim tongue bilong hem for talem olketa nogud samting. Long wei olsem, man wea wise hem kontrolem gud tongue bilong hem and hem stap klia from olketa nogud samting wea savve kamap taem man toktok and no tingim feeling bilong narawan.
9. Hao nao holy spirit hem olsem wanfala helper, and wei for savve long diswan shud encouragem iumi for duim wanem samting? (John 14:25, 26) [June 12, be-SP p. 19 par. 2-3] Holy spirit savve mekem iumi rememberim olketa important samting wea iumi studyim finis. Hem no putim insaed long mind bilong iumi olketa samting wea iumi no lanem yet. Nomata plande year go pas finis, holy spirit helpem olketa wea raetem Gospel for no forgetim olketa information abaotem wanem Jesus talem and duim taem olketa stap witim hem. Diswan shud encouragem iumi for duim best bilong iumi for kasem moa savve abaotem Jehovah and olketa plan bilong hem, and for helpem olketa narawan for duim sem samting.
10. Long wanem wei nao Jesus bae kam, and wanem nao mining bilong “kam” wea stap long Matthew 16:28 wea Jesus storyim? [June 19, w04-SP 3/1 p. 16 box] Jesus hem kam, or arrive, long wei wea hem tanem kam tingting bilong hem long olketa man or olketa follower bilong hem, wea plande taem hem for givim judgment. (Matt. 24:46, 50; 25:19, 31) Long Matthew 16:28, Jesus hem kam long wei wea hem startim rul bilong hem olsem Messiah King long 1914.
BIBLE READING EVRI WEEK
11. Wanem nao iumi lanem from ansa Job givim long Jehovah wea stap long Job 42:1-6? Taem Job herem toktok bilong Jehovah and tingim olketa samting wea showimaot paoa bilong hem, diswan helpem Job for “lukim God,” wea minim hem luksavve long truth abaotem hem. (Job 19:26) Diswan mekem hem changem tingting bilong hem. Taem iumi kasem kaonsel wea kam from Bible, iumi shud barava want for luksavve hao iumi rong and need for change. [May 1, w06-SP 4/1 “Word Bilong Jehovah Hem Laef—Olketa Main Point From Buk Bilong Job”]
12. Wanem nao “samting nating” wea olketa nation gohed for tok abaotem? (Ps. 2:1, 2) Datfala “samting nating” hem wei wea olketa gavman bilong man gohed for keepim paoa bilong olketa. Diswan hem samting nating bikos plan bilong olketa bae fail. Olketa nation bae nating win taem olketa “againstim Jehovah and againstim anointed [king] bilong hem”! [May 8, w06-SP 6/1 “Word Bilong Jehovah Hem Laef—Olketa Main Point From Buk Wan Bilong Psalms”]
13. Olketa wanem faondeson nao olketa brekem daon? (Ps. 11:3) Diswan hem law, order, and justice wea hem nao olketa barava main samting wea evri man depend long hem. Taem pipol no stap gud and no garem justice, evri samting hia hem olobaot. Long taem olsem, ‘man wea raeteous’ mas barava trustim God. (Ps. 11:4-7) [May 15, w06-SP 6/1 “Word Bilong Jehovah Hem Laef—Olketa Main Point From Buk Wan Bilong Psalms”]
14. Long wanem wei nao praod man savve kasem reward long bigfala wei? (Ps. 31:23) Disfala reward hem panis wea man kasem. Reward bilong raeteous wan hem discipline wea kam from Jehovah taem hem duim mistek wea hem no min for duim. Bat, taem man wea praod no changem wei bilong hem, hem kasem panis long bigfala wei. (Prov. 11:31; 1 Pet. 4:18) [May 29, w06-SP 6/1 “Word Bilong Jehovah Hem Laef—Olketa Main Point From Buk Wan Bilong Psalms”]
15. Wanem comfort nao iumi savve kasem from Psalm 40 wea bae helpem iumi for deal witim wei wea iumi sin and olketa bigfala trabol bilong disfala world? (Ps. 40:1, 2, 5, 12) Wei for hope long Jehovah savve helpem iumi for deal witim sorre feeling and for aotem iumi from wanfala tokpiksa hol and from ‘wata wea mud.’ Sapos iumi tingim olketa blessing bilong iumi wea ‘staka tumas for iumi kaontem,’ no eni trabol or mistek savve winim iumi. [June 12, w06-SP 6/1 “Word Bilong Jehovah Hem Laef—Olketa Main Point From Buk Wan Bilong Psalms”]