Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long August 28, 2006. Skul overseer bae conductim wanfala 30-minute review long information wea kamap insaed olketa assignment start long week bilong July 3 go kasem August 28, 2006. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Hao nao wei for lukluk long audience savve helpem iumi for kamap olketa gudfala teacher? (Matt. 19:25, 26; Acts 14:9, 10) [July 3, be-SP p. 124 par. 3–p. 125 par. 3] Wei for lukluk long man wea iumi story witim showimaot iumi interest long hem and iumi garem important samting for talem. Kaenfala fasin and wei for smile savve helpem olketa wea lisin long iumi for relax. Wei for lukim wanem nao showaot long eye bilong olketa wea iumi story witim maet mekem iumi savve wanem nao best samting for duim.
2. Why nao hem important for toktok long natural wei, and wanem nao savve helpem iumi for showimaot diswan long field ministry? [July 17, be-SP p. 128 par. 1-5, box] Taem iumi toktok long natural wei hem helpem nara pipol for trustim iumi. Sapos iumi fraet and hol bak taem iumi toktok, maet pipol no interest long wanem iumi talem. Samfala samting wea savve helpem iumi for winim feeling for fraet and for toktok long natural wei long field ministry hem (1) prepare gud, (2) strongfala prea, (3) wei for ting raonem mercy bilong Jehovah wea hem invaetem evriwan for kasem laef olowe, (4) remember hao pipol free for chus and olketa savve acceptim or rejectim datfala message, and (5) remember hao assignment bilong iumi hem for preach.
3. Why nao iumi mas klin? [Aug. 7, be-SP p. 131 par. 1-3] Taem iumi klin and werem gudfala kaleko diswan givim glory long God and hem mekhae long organization bilong hem. (1 Cor. 10:31) Taem body and kaleko bilong iumi hem klin, narafala pipol bae lukim hao iumi respectim iumiseleva, and olketa bae moa willing for lisin long iumi.
4. Hao nao “fasin for showimaot respect and stretfala tingting” shud affectim lukluk bilong iumi and kaleko wea iumi werem? (1 Tim. 2:9) [Aug. 14, be-SP p. 131 par. 4–p. 132 par. 1] Man wea garem fasin wea showimaot respect hem no laek mekem nara pipol feel nogud. Balance tingting helpem iumi for garem gudfala tingting saed long lukluk and for stap klia long wei for ova tumas long stael kaleko and lukluk. Nomata iumi long skul, wakples, or iumi long ples bilong worship or long field ministry, kaleko bilong iumi shud evritaem showimaot iumi respectim olketa standard bilong God.
5. Wanem nao olketa Bible principle wea iumi shud followim for mek sure lukluk bilong iumi no showimaot iumi lovem world? [Aug. 28, be-SP p. 133 par. 2-3] First John 2:15-17 warnim iumi for no lovem world or olketa samting insaed long world. From iumi olketa servant bilong Jehovah, iumi stap klia long lukluk and kaleko wea followim world bilong Satan and wea no fitim wanfala Christian. Ephesians 2:2 storyim bighed fasin bilong disfala nogud world. Wei for no obeyim olketa wea garem paoa hem showaot long kaleko wea pipol werem distaem wea hem showimaot body, olobaot, and no wari long tingting bilong nara pipol. Winim wei for followim world saed long kaleko and lukluk, iumi followim example bilong olketa mature Christian. (1 Tim. 4:12; 1 Pet. 5:2, 3)
TOK NO. 1
6. Wanem nao best samting wea iumi kasem from wei for read? [July 10, be-SP p. 21 par. 3] Wei for read hem savve helpem man for “faendem barava savve bilong God.” (Prov. 2:5) Plande long olketa difren wei wea iumi servem God needim iumi for savve hao for read. Wei wea iumi readim samting savve barava affectim wei wea iumi duim gud ministry bilong iumi. And iumi mas read for prepare for olketa samting hia.
7. Wanem nao showimaot man hem wise or krangge? (Prov. 14:2) [July 24, w04-SP 11/15 p. 26 par. 5] Man wea garem stretfala fasin hem fraet long tru God, and “wei for fraet long Jehovah hem start bilong wisdom.” (Ps. 111:10) Man wea barava wise savve hao hem mas “fraet long trufala God and obeyim olketa komandment bilong hem.” (Eccl. 12:13) Man wea krangge duim samting wea nating fitim olketa mark bilong God saed long stretfala fasin. Evri samting wea hem duim hem no stret.
8. Why nao “savve hem isi samting long man wea minim samting”? (Prov. 14:6) [July 31, w04-SP 11/15 p. 28 par. 4-5] Man wea garem wei for minim samting hem no lukluk long each idea olsem separate samting bat hem savve hao for joinim tugeta evri samting hia and luksavve long full idea. Wei for lanem and rememberim olketa niu point hem moa isi for man wea minim samting bikos hem luksavve hao olketa niu samting hem join witim plan bilong Jehovah for earth and olketa man.
9. Wanem nao study? [Aug. 7, be-SP p. 27 par. 3] Study hem moa samting winim wei for readim samting nomoa. Hem needim iumi for iusim mind bilong iumi for spendem taem for ting raonem gud wanfala subject. Insaed diswan hem wei for ting raonem samting wea iu readim, markem datwan witim samting wea iu savve finis long hem, and for luksavve long olketa reason for samting olketa raetem.
10. Hao nao wei for ting raonem olketa creation bilong Jehovah savve helpem iumi? [Aug. 14, w04-SP 11/15 p. 8 par. 4] Hem shud helpem iumi long thrifala wei. Hem savve (1) mekem iumi tinghae long laef bilong iumi, (2) muvim iumi for helpem nara pipol for lane from creation, and (3) encouragem iumi for savve and tinghae go moa long Creator bilong iumi.
BIBLE READING EVRI WEEK
11. Long bifor, wanem nao ‘datfala toktok’ wea Jehovah talem wea mekem bigfala army bilong ‘olketa woman talemaot gud nius,’ and waswe distaem? (Ps. 68:11) Jehovah talem, or komandim, olketa man bilong Israel for faet againstim olketa nation wea enemy wea stap long Promis Land and for winim olketa. Taem olketa Israelite winim olketa enemy, olketa woman bilong Israel talemaot disfala gud nius long olketa celebration. Distaem, olketa woman wea minister talemaot gud nius abaotem wei wea tru worship hem win, olsem taem Michael and olketa angel bilong hem torowem Satan kam daon long earth, wea datwan fulfillim Word bilong Jehovah. Long wei wea fitim samting wea Word bilong God talem, olketa Christian woman talemaot long olketa nation tu hao klosap nao datfala Messiah King, Jesus Christ, bae finisim olketa. [July 3, w86 10/15 p. 30]
12. Wanem samting nao klosap mekem Asaph stop for duim stret samting, and hao nao hem kasem bak stretfala tingting? (Ps. 73:2, 3, 17) Nomata Asaph luksavve long gudfala fasin bilong Jehovah, wei for kavetem material samting bilong olketa man wea no raeteous and wea tok praod mekem hem daotem sapos man wea raeteous kasem eni gud samting. (Ps. 73:1, 13) Wei for go long “nambawan holy ples bilong God” and ting raonem diswan midolwan long olketa narawan wea worshipim Jehovah, stretem tingting bilong hem. Sapos iumi feel nogud taem hem luk olsem wicked pipol garem gudfala living, iumi savve kasem ansa for olketa kwestin bilong iumi long wei for hipap witim pipol bilong God for worshipim hem. [July 10, w93 7/15 p. 28 par. 3, 5; p. 30 par. 1]
13. Why nao man wea raetem Psalms kolem manna wea olketa Israelite kaikaim “grain bilong heven” and “bred bilong olketa maeti wan”? (Ps. 78:24, 25) Datfala manna hem kam from heven, from Jehovah. (Ps. 105:40) Maet “olketa maeti wan” minim olketa angel wea maet Jehovah iusim for givimaot datfala manna. (Ps. 103:20) [July 17, w06-SP 8/1 “Word Bilong Jehovah Hem Laef—Olketa Main Point From Buk Thri and Foa Bilong Psalms”]
14. Wanem nao “secret ples bilong Most Hae,” and hao nao iumi savve “stap” long there? (Ps. 91:1, 2) Datfala “secret ples” hem piksarem wei wea iumi stap sef long spiritual wei, wea no eni samting savve spoelem wei wea iumi fren witim Jehovah, wanfala spiritual paradaes. Datwan hem wanfala secret ples bikos olketa wea no trust long God no savve long datwan. Iumi mekem Most Hae kamap ples bilong iumi for “stap” taem iumi ting long hem olsem “sef ples and strong” bilong iumi, and taem iumi praisem hem olsem Sovereign Ruler bilong universe, and preachim gud nius abaotem Kingdom. [July 31, w06-SP 8/1 “Word Bilong Jehovah Hem Laef—Olketa Main Point From Buk Thri and Foa Bilong Psalms”]
15. Hao nao dae bilong olketa loyal wan bilong Jehovah hem big samting long hem? (Ps. 116:15) From Jehovah barava lovem tumas full sekson bilong olketa loyal worshiper bilong hem, hem kanduit letem evriwan long olketa for dae. (Ps. 116:8) Sapos Jehovah letem datwan for happen, bae luk olsem olketa enemy bilong hem nao strong winim hem. And tu, bae no eniwan stap long earth for startim niu world. [Aug. 28, w06-SP 9/1 “Word Bilong Jehovah Hem Laef—Olketa Main Point From Buk Faev Bilong Psalms”]