Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long June 26, 2006. Skul overseer bae conductim wanfala 30-minute review long information wea kamap insaed olketa assignment start long week bilong September 4 go kasem October 30, 2006. [Samting for tingim: Long olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Taem iumi story, why nao hem important for iumi no fraet, and hao nao iumi savve daonem feeling for wari? [Sept. 11, be-SP p. 135 par. 5–p. 137 par. 2, olketa box] Sapos iumi fraet, audience bae ting strong long iumi nomoa and no long samting wea iumi talem. Iumi savve daonem feeling for wari long wei for barava prepare gud, practicem big tok bilong iumi, prea long Jehovah for help, and kasem moa savve thru long wei for share long field service, givim koment long olketa meeting, and givim olketa tok long skul.
2. Taem pipol ask abaotem olketa biliv bilong iumi, why nao iumi shud trae for iusim Bible for givim ansa? [Oct. 9, be-SP p. 143 par. 1-3] Main reason iumi iusim Bible hem bikos datwan nao Word bilong God, and olketa biliv bilong iumi, evri samting iumi duim, and hope bilong iumi for future garem strongfala faondeson long olketa promis from God insaed long Bible. (2 Tim. 3:16, 17) Long wei wea followim example bilong Jesus, iumi no talem toktok bilong iumiseleva, bat iumi evritaem iusim Bible taem iumi ansarem olketa kwestin. (Matt. 4:3-10; Luke 24:27, 44-47)
3. Hao nao iumi savve kamap moabeta long wei for iusim Bible? [Oct. 16, be-SP p. 144, box] Iumi savve kamap moabeta long wei for iusim Bible taem iumi readim Bible evriday, iusim olketa scripture taem iumi koment long olketa meeting, and taem iumi faendaot wanem nao Bible talem bifor iumi disaedem samting. Taem iumi no savve wanem Bible hem sei abaotem wanfala samting, iumi no guess or talem tingting bilong iumiseleva bat iumi duim research.
4. Why nao hem important for evritaem iusim Bible taem iumi teach long ministry, and hao nao iumi savve encouragem olketa narawan for iusim Bible long olketa kongregeson meeting? [Oct. 23, be-SP pp. 145-6, olketa box] Samting wea Bible talem savve barava helpem pipol wea garem honest heart winim eni samting wea iumiseleva savve talem. Taem man seleva lukim samting wea Bible talem, datwan savve barava affectim hem. Taem iumi givim tok long kongregeson, invaetem audience for luk followim olketa scripture wea iumi bae readim, and mek sure iumi givim inaf taem for olketa faendem.
5. Taem iumi introducem wanfala scripture, wanem nao tufala goal bilong iumi? [Oct. 30, be-SP p. 147 par. 2] Taem iumi introducem wanfala scripture, goal bilong iumi hem for mekem man luk forward for herem, and for mekhae long reason why iumi iusim datfala scripture.
TOK NO. 1
6. Wanem living message nao insaed long Psalms? [Sept. 18, bsi06-SP p. 17 par. 23] Psalms givim bigfala savve long olketa main teaching bilong Bible, wea main samting hem story abaotem nao hem Jehovah, Man wea muvim olketa for raetem Psalms. Long kliafala wei Psalms showimaot hao hem Creator bilong universe and evri samting insaed long hem. (Ps. 8:3-9; 90:1, 2; 100:3; 104:1-5, 24; 139:14)
7. Long wanem taem nao olketa raetem olketa proverb and mekem olketa for kamap datfala buk Proverbs? [Oct. 2, bsi06-SP p. 20 par. 5] Luk olsem bigfala haf olketa raetem long taem wea Solomon hem rul (1037-998 B.C.E.) bifor hem start for no faithful. From olketa raetem wanfala part bilong Proverbs long taem wea Hezekiah hem rul (745-717 B.C.E.), masbi olketa finis for kolektem olketa proverb and mekem olketa kamap wanfala buk bihaen long rul bilong hem. Insaed diswan hem last tufala part bilong disfala buk wea King Hezekiah arrange for olketa kolektem tu. (Prov. 25:1) Wanfala footnote for Proverbs 31:31 long “New World Translation of the Holy Scriptures—With References” talem diswan: “Samfala [edition] bilong [Hebrew] text showim trigrammaton, wea minim thrifala leta, ‘Chehth, Zaʹyin, Qohph’ (חזק) wea stand for signature bilong King Hezekiah for showimaot waka bilong olketa secretary bilong hem for mekem copy hem finis.”
8. Wanem nao wanfala proverb, and why nao Hebrew nem bilong datfala buk hem fitim? [Oct. 9, bsi06-SP p. 20 par. 6] Wanfala proverb hem shortfala toktok wea garem bigfala mining and wea plande taem storyim tufala samting wea semsem or markem samting witim nara samting for mekem man wea lisin for tingting. Long firstaem, olketa Hebrew Bible kolem disfala buk followim firstfala word long buk, “mish·lehʹ,” wea minim “olketa proverb.” “Mish·lehʹ” kam from datfala Hebrew word “ma·shalʹ,” wea luk olsem datwan kam from wanfala word wea minim “mas olsem” or “mas markem.” Toktok hia barava fitim for samting wea insaed long disfala buk.
9. Long Proverbs 2:1-5, wanem nao mining bilong datfala encouragement for gohed for lukaotem savve, wei for minim samting, and fasin for luksavve “long sem wei wea iu bae lukaotem silver, and olketa riches wea haed”? [Oct. 16, be-SP p. 38 par. 4] Wei wea Proverbs markem wei for lukaotem olketa important samting hia witim wei for lukaotem olketa samting wea garem hae price, hem strongim hao only wei for kasem olketa richfala reward hem for waka hard. For duim research iumi mas waka hard, bat for duim bae helpem iumi for faendemaot tingting bilong God long olketa samting, for stretem olketa rong idea, and helpem iumi for barava hol strong long truth. And tu, hem bae mekem tok bilong iumi moa interesting, garem moa mining, iumi bae hapi for givim, and pipol bae barava enjoyim.
10. Hao nao buk bilong Proverbs showimaot goal bilong hem for iumi kasem gud samting from hem? [Oct. 23, bsi06-SP p. 21 par. 19] Goal bilong Proverbs hem showaot long olketa first verse bilong hem, wea mekhae long savve, wisdom, and wei for minim samting, wea hem nao olketa samting iumi needim for servem Jehovah long wei wea hem acceptim. (Prov. 1:2-4)
BIBLE READING EVRI WEEK
11. Hao nao David ‘mekem soul bilong hem feel gud and stap kwaet olsem wanfala smol pikinini wea mami bilong hem karem hem,’ and hao nao iumi savve followim example bilong hem? (Ps. 131:1-3) Olsem wei wea wanfala smol pikinini lane for kasem comfort and wei for satisfae from wei wea mami karem hem, David lane for mekem soul bilong hem feel gud and stap kwaet long wei for luksavve long olketa samting wea hem no fit for duim and for showimaot hambol fasin. Hem no lukaotem olketa haefala samting wea hem no fit for kasem, or mekius long position bilong hem for kamap king. Hem hambol and hem showimaot patient fasin taem hem weit long Jehovah. Iumi savve followim example bilong David long wei for no aftarem bignem and wei for pipol tinghae long iumi. Iumi mas no apim iumiseleva bat weit long Jehovah. [Sept. 11, w06-SP 9/1 “Word Bilong Jehovah Hem Laef—Olketa Main Point From Buk Faev Bilong Psalms”; w77 7/15 p. 445]
12. Wanem comfort nao stap long toktok long Psalm 139:7-12? No eni ples long earth hem haed from Jehovah. Nomata wanem ples iumi stap, iumi savve kasem holy spirit bilong hem. No eni samting savve happen wea stopem God for helpem iumi. Sapos iumi duim best for servem Jehovah and iumi dae, hem savve mekem iumi laef bak tu. Olketa faithful, loyal servant bilong Jehovah savve depend long hem for sapotim olketa. [Sept. 18, w06-SP 9/1 “Word Bilong Jehovah Hem Laef—Olketa Main Point From Buk Faev Bilong Psalms”; w93-SP 10/1 pp. 12-13]
13. Wanem nao samfala example long Psalm 145 abaotem wei wea Jehovah hem nambawan wea iumi savve givim praise long hem for datwan long olketa prea bilong iumi and taem iumi duim ministry? (Ps. 145:3) Samfala long olketa example wea showimaot Jehovah hem nambawan and fit for kasem praise hem olketa hia: olketa nambawan samting wea hem creatim (vss. 9, 10), olketa maeti samting wea hem duim for sevem olketa wea loyal long hem (vss. 4, 6, 14, 18-20), wei wea hem provaedem evri samting iumi needim for laef olowe wea showimaot gudfala fasin bilong hem (vss. 7, 15, 16), and fasin bilong hem (vss. 7-9, 17). [Sept. 25, w04-SP 1/15 pp. 10-14; w90 9/15 pp. 11-15]
14. Long wanem wei nao wei for fraet long Jehovah hem “start bilong savve” and “start bilong wisdom”? (Prov. 1:7; 9:10) Sapos man no fraet long Jehovah, hem no garem savve, from Jehovah nao Man wea wakem evri samting and hem nao givim kam Bible. (Rom. 1:20; 2 Tim. 3:16, 17) Evri trufala savve kam from Jehovah. Dastawe, wei for respectim and fraet long Jehovah hem start bilong savve. And tu, wei for fraet long God hem start bilong wisdom, bikos sapos man no garem savve bae hem no garem wisdom tu. Nara samting, man wea no fraet long Jehovah bae no iusim savve wea hem garem for honorim Creator. [Oct. 2, w06-SP 10/1 “Word Bilong Jehovah Hem Laef—Olketa Main Point From Buk Bilong Proverbs”; rs p. 289]
15. Long Proverbs 7:1, 2, wanem nao insaed long “olketa toktok bilong mi” and “olketa komandment bilong mi”? Insaed diswan hem olketa Bible teaching, and tu, olketa rul or law wea parents markem for famili. (Deut. 6:6, 7; Eph. 6:4) Sapos olketa rul hia no againstim law bilong God, olketa young wan need for followim olketa, from parents wea markem olketa rul olsem lovem olketa and laekem full famili for kasem gud samting. (Prov. 6:20-22) [Oct. 9, w06-SP 10/1 “Word Bilong Jehovah Hem Laef—Olketa Main Point From Buk Bilong Proverbs”; w00-SP 11/15 p. 28]