Theocratic Ministry Skul Review
Kongregeson bae ansarem olketa kwestin hia long Theocratic Ministry Skul long week wea start long December 25, 2006. Skul overseer bae iusim 30-minute for reviewim information wea kamap insaed olketa assignment start long week bilong November 6 go kasem December 25, 2006. [Samting for tingim: Taem iu lukim olketa kwestin wea no garem eni reference, bae iu need for duim research for faendem olketa ansa.—Lukim Ministry Skul buk, pp. 36-7.]
OLKETA POINT KAONSEL
1. Wanem nao iumi shud tingim taem iumi disaedem wanem toktok bae fitim for introducem wanfala scripture? [Nov. 6, be-SP p. 148 par. 4–p. 149 par. 2] Hem barava important for showimaot respect long Jehovah from hem nao givim kam Bible. For savve long olketa scripture wea stap raonem datfala verse, man wea verse story abaotem hem and man wea talem datfala story, and subject wea verse hem story abaotem bae helpem iumi tu for disaed hao for introducem wanfala scripture.
2. Wanem nao samfala wei wea iumi savve iusim for mek sure iumi strongim olketa word and toktok long stretfala wei? [Nov. 27, be-SP p. 151 par. 5–p. 152 par. 3] (1) Strongim voice: Wei for changem voice hem mekem toktok wea showim main point for showaot klia from olketa nara part long sentence. (2) Stop lelebet: Taem iu stop lelebet bifor iu readim wanfala main part bilong wanfala scripture hem mekem audience for luk forward long hem, and wei for stop lelebet bihaen hem strongim moa datfala point. (3) Talem moa: Bihaen iumi readim wanfala scripture, wei for readim moa olketa main word or toktok savve barava help for strongim wanfala point. (4) Olketa akson: Wei for muvim body and feis savve addim feeling long wanfala word or toktok.
3. From wei for teachim nara pipol Word bilong God hem serious samting, wanem nao iumi mas duim for “iusim word bilong truth long stretfala wei”? (2 Tim. 2:15) [Dec. 4, be-SP p. 153 par. 1-3, box; p. 154 par. 1-2] Iumi shud mek sure wei wea iumi explainim wanfala scripture hem fitim olketa verse wea stap raonem datwan, teaching bilong Bible, and olketa pablikeson wea “faithful and wise slave” pablisim. (Matt. 24:45) Iumi shud no talem tingting bilong iumiseleva or explainim datwan long wei wea mekem hem luk olsem hem talem samting wea iumi laekem hem for talem, bat datwan hem no really mining bilong hem. (Jer. 23:16) And tu, iumi trae for followim example bilong Jesus Christ, wea iusim Word bilong God for encouragem man and no for trae forcem narawan for duim wanem hem talem. (Matt. 11:28)
4. Wanem nao samfala wei wea iumi savve storyim long kliafala wei mining bilong olketa scripture wea iumi readim? [Dec. 11, be-SP p. 154 par. 4–p. 155 par. 3] Wanfala wei wea iumi savve mekem mining showaot klia hem for chusim olketa main word wea fitim subject iumi storyim. Jesus mekhae long disfala toktok “wan body” taem hem explainim mining bilong Genesis 2:24. (Matt. 19:3-6) Iumi savve askem olketa kwestin tu for mekhae long olketa main word insaed long scripture wea iumi laek for readim. Goal bilong iumi hem for mekhae long part bilong scripture wea hem join witim wanem iumi storyim mekem audience savve lukim klia hao subject wea iumi storyim and olketa scripture wea iumi storyim hem join tugeta.
5. Why nao hem barava important for showimaot klia gudfala samting wea man savve kasem from information wea iumi storyim, and wanem nao samfala wei wea iumi savve duim datwan? [Dec. 25, be-SP p. 157 par. 1-4, box; p. 158 par. 1] Sapos pipol no luksavve samting wea iumi talem hem savve helpem olketa, bae olketa no lisin and no kasem gud samting from information wea iumi storyim. Iumi encouragem olketa narawan for tingim samting wea savve helpem olketa taem iumi helpem olketa for minim olketa wei wea fasin for fraet long Jehovah hem affectim laef bilong olketa. (Ps. 111:10; 1 Tim. 4:8) Tok bilong iumi savve helpem pipol taem iumi tingim audience bilong iumi and askem iumiseleva, ‘Long wanem wei nao maet disfala information wea bae mi storyim helpem olketa long audience’?
TOK NO. 1
6. Long wanem wei nao Solomon hem man for hipimap pipol? [Nov. 13, bsi06-SP p. 25 par. 1-3] Solomon hem leader bilong pipol wea dedicate long Jehovah. From datwan, hem trae for fulfillim responsibility bilong hem for keepim pipol bilong God tugeta for faithful long dedication bilong olketa. Thru long wise kaonsel wea stap long Ecclesiastes, Solomon waka hard for encouragem pipol hia for duim olketa important waka and stap klia long olketa iusles waka bilong world wea no givim eni gud samting. (Eccl. 12:8-10)
7. Hao nao Ecclesiastes and olketa teaching bilong Jesus semsem? [Nov. 20, bsi06-SP p. 26 par. 16] Staka samting hem semsem long Ecclesiastes and olketa teaching bilong Jesus. Olsem example, Jesus hem showimaot wei wea waka bilong God hem big tumas taem hem sei: “Dadi bilong mi waka kam kasem distaem, and mi gohed for waka tu.” (John 5:17) Solomon tu storyim olketa waka bilong God olsem: “Mi lukim evri waka bilong tru God, hao olketa man no fit for faendemaot waka wea hem duim andanit long sun; nomata olketa man gohed for waka hard for lukaotem, bat olketa no savve faendemaot. And nomata sapos olketa sei olketa garem inaf wisdom for minim, olketa bae no fit for faendemaot.” (Eccl. 8:17)
8. Wanem pruv nao hem stap for sei Song of Solomon hem fit for stap insaed Bible? [Nov. 27, bsi06-SP p. 28 par. 3-4] Olketa putim Song of Solomon insaed long “Septuagint,” and Josephus putim insaed list bilong olketa holy buk, wea showimaot hao long bifor no eniwan kwestinim sapos hem fit for stap insaed Bible. And tu, wei wea disfala buk storyim long nambawan wei love wea tufala pipol garem for each other, wea hem nao kaen love wea hem stap midolwan Christ and “waef” bilong hem long spiritual wei, diswan mekem Song of Solomon hem part long Bible. (Rev. 19:7, 8; 21:9)
9. Hao nao Dead Sea Scroll bilong Isaiah givim strongfala pruv hao Bible bilong iumi distaem hem kam from olketa firstfala raeting? [Dec. 4, bsi06-SP p. 30 par. 6] Dead Sea Scroll bilong Isaiah hem samting olsem wan thousand year old winim copy bilong Isaiah wea stap insaed datfala barava old Masoretic manuscript, bat olketa teaching bilong hem semsem olsem datfala Masoretic manuscript. Taem olketa markem olketa raeting bilong manuscript hia witim datfala Dead Sea Scroll samfala spelling and grammar nomoa hem difren.
10. Wanem nao savve helpem wanfala speaker for lusim wei wea hem need for raetem staka samting for tok bilong hem? [Dec. 11, be-SP p. 42 par. 2] Speaker shud organizem information bilong hem anda long tu-thri main point nomoa, no iusim eni samting wea no sapotim olketa main point hia, and putim olketa idea bilong hem followim stretfala ples bilong olketa.
BIBLE READING EVRI WEEK
11. Hao nao “olketa wea lukaotem Jehovah savve minim evri samting”? (Prov. 28:5) “Evri samting” hem minim evri samting wea man need for duim mekem Jehovah hapi long worship bilong hem, wea insaed diswan hem for savve long standard bilong God saed long fasin. Olketa wea lukaotem Jehovah thru long wei for prea and studyim Bible minim wanem olketa mas duim for servem Jehovah long wei wea hem laekem. Bat olketa wea gohed for duim olketa nogud samting no minim samting wea stret and God rejectim olketa. [Nov. 6, w06-SP 10/1 “Word Bilong Jehovah Hem Laef—Olketa Main Point From Buk Bilong Proverbs”; w87 5/15 p. 30]
12. Hao nao “hard waka bilong olketa krangge man hem mekem olketa taed”? (Eccl. 10:15) Plande taem “olketa krangge man” talem and duim olketa krangge samting, wea diswan hem bikos olketa bighed for followim samting wea olketa seleva nomoa tingse hem stret. (Eccl. 10:12-14) Lelebet samting nomoa olketa kasem from hard waka wea olketa duim, and datwan mekem olketa taed nao. Olketa mekem laef bilong olketa seleva hard. [Nov. 20, w06-SP 11/1 “Word Bilong Jehovah Hem Laef—Olketa Main Point From Buk Bilong Ecclesiastes”; w77 pp. 698-9]
13. Hao nao Shulammite gele hem olsem “wanfala garden wea fence stap raonem,” and hao nao hem gudfala example for olketa Christian woman wea no marit yet? (Song of Sol. 4:12) Love bilong Shulammite gele hem olsem garden wea luk naes tumas wea garem wall raonem or fence wea gate hem lok, wea no eni man savve go insaed. Love bilong hem for datfala boy wea bae hem maritim nomoa. Datwan hem nambawan example for olketa singol Christian woman! [Nov. 27, w06-SP 12/1 “Word Bilong Jehovah Hem Laef—Olketa Main Point From Buk Bilong Song of Solomon”]